Pɔli siɛnrɛ ti nyùgo gè Zezi Kirisi ŋáà pe 'kóri wè
2
1 Nɛ siinyɛninɛ,
bà mi 'kɛ́ baa yeli tiʔɛ nī gè nɛ̀ sɛ́nì Kulocɛliɛ kalarilɛ wori juu dè yeli mɛ́ wè,
mi sì ki tìɛ mi 'juu macɛ́n nɛ̀ tóri sɛnminɛ nɛ̄ bèle wīʔ,
bé nɛ́ cɛ jo bè juu bè mi sícilimɛ tìɛ bè wīʔ.
2 Bè tɔ̀ni bè ki juu gè,
mi sì kɛ́nì ki sɔ̀ngi bè yakaa caa bè cɛ́n yeli wáà wori nīʔ,
ga laa Zezi Kirisi wire wori bɛ̀ʔ dèʔ,
wire ŋáà pe 'kóri tiiparigɛ nɛ̄ gè.
3 Nɛ̀ pínɛ mi wè,
mi 'kɛ́ baa yeli tiʔɛ nī gè nɛ ní ŋɔri fùn,
nɛ fìʔɛ́,
nɛ fún nɛ yàʔará.
4 Mi siɛnrɛ dè nɛ́ gìi mi 'puu nɛ nyu nɛ ki jáari gè,
tiì 'puu mi tíimɛ sìnjilige siɛnrɛʔ,
dàa pe sî nɛ nyu bè siɛn nyùgo yiʔɛ gèʔ;
ki 'nyaa mi 'puu nɛ ti nyu nɛ tìí nɛ́ Kulocɛliɛ Pìle lire fànʔa ní wī.
5 Gìi ki bé tí yeli fǎga yeli tɛ́ngɛlɛ taʔa lè siɛnnɛ sícilimɛ pire nɛ̄ʔ,
ye- ni taʔa Kulocɛliɛ fànʔa kire nɛ̄.
Kirisi sɔ̀ngirɔ tiī weli nī
6 Nɛ̀ sí ki taa bìli pe 'liɛ nɛ̀ láʔa tɛ́ngɛlɛ nī lè,
weli nɛ nyu nɛ́ peli ní sícilimɛ siɛnrɛ nī,
duniya ŋáà wi sícilimɛ pire bɛ̀ʔ,
duniya ŋáà wi kàfɔlilɔ sícilimɛ bɛ̀ʔ nɛ̀ pínɛʔ peli bálì pe waa cúʔɔgoligo nī gèʔ.
7 ʔéʔe,
ki 'nyaa Kulocɛliɛ sícilimɛ pire ní weli nɛ nyu;
piī kafɔnnɔ nɛ́ ní làribɛ.
Kulocɛliɛ wi cé tíi nɛ̀ pi wori juu dè nɛ̀ yaʔa duniya sélimɛ nɛ̄ bè,
nɛ́ jo wire bé weli nyɔ́gɔ kpuɔmɔ nī bè.
8 Yirile náà ni kpolilo bèle,
piyè kire cɛ́nʔ.
A ki yē pe cé ki cɛ́n wè,
piyè cî kpuɔmɔ pi Kàfɔli kóri wè tiiparigɛ nɛ̄ gèʔ.
9 Nɛ̀ sí ki taa,
ti 'yɛli baa,
dàa Kulocɛliɛ siɛnsɛbɛrɛ ti 'juu dè,
ti 'jo:
Gìi nyapile sì nyaa lèʔ,
nɛ́ gìi ngbóli sì lúʔu lèʔ,
gìi kiì sɔ̀ngi nɛ̀ tìgi siɛn fungo nī gèʔ,
kire Kulocɛliɛ wi 'gbòbori
nɛ̀ yaʔa bìli mɛ́
wire woli ni 'pe dɛ́ni wèa.
10 Nɛ̀ sí ki taa weli bèle,
Kulocɛliɛ wi 'ki kalarilɛ tìɛ lè weli nɛ̄ wi Pìle lire fànʔa nɛ̄ gè.
Ki 'nyaa wi Pìle niī nɛ kele ke mìɛni laamɛ pii bè,
nɛ̀ Kulocɛliɛ fungo laamɛ pínɛ bè.
11 Á kire 'laa wè,
ŋáasiɛn wī bile siɛnnɛ nī bèle,
ŋàa wi 'ki cɛ́n gàa gī baa siɛn fungo nī gè,
ga laa siɛn wi pìle lire bɛ̀ʔ lè ?
Bɛ̀ sí ki yē nɛ̀ pínɛ,
Kulocɛliɛ kele gèle,
siɛn sì ke cɛ́nʔ,
nɛ̀ yiri Kulocɛliɛ Pìle lire nīʔ.
12 Nɛ̀ sí ki taa weli bèle,
duniya wi pìle lire bɛ̀ʔ weli mɛ́ʔ.
Ki 'nyaa Pìle náà ni 'kɔ́n Kulocɛliɛ mɛ́ wè,
lire nī weli mɛ́,
gìi ki bé tí kpuʔɔrɔ díì ti 'kɔ́n Kulocɛliɛ mɛ́ wè,
á wi 'ti kɛn weli mɛ́ waʔanɛ wè,
we- ti cɛ́n.
13 Kire kɛnmɛ nɛ̄ weli míɛni bèle,
weli wè nɛ ti nyu nɛ́ siɛnnɛ sìnjilige siɛnrɛ níʔ.
ʔéʔe,
ki 'nyaa gìi nɛ̄ Kulocɛliɛ Pìle niī nɛ we tɛnmɛ lè,
bìli mɛ́ wi Pìle ni yē lè,
weli nɛ pe tɛnmɛ nɛ̀ yɛli nɛ́ wi Pìle siɛnrɛ ti juugɛnmɛ ní.
14 Siɛn ŋáà wiì Kulocɛliɛ cɛ́n wèʔ,
wi wè gbɛ̀nɛ Kulocɛliɛ Pìle kele cɛ́ngi gèleʔ.
Wi nɛ̂ ti nyaa bɛ̀ kàalafɔlilɔ kele tíɛlɛ.
Kire nɛ̄ wi nɛ̌ gbɛ̀ jáa bè ti còʔ.
Nɛ̀ taʔa gíi nɛ̄,
siɛn 'yɛli bè puu nɛ́ Kulocɛliɛ Pìle sɔ̀ngirɔ ní wī,
bé nɛ́ gbɛ̀ ti kacɛ́nmɛ cɛ́n bè.
15 Siɛn ŋáà sí wī nɛ́ Kulocɛliɛ Pìle sɔ̀ngirɔ ní dè,
wi 'kele ke mìɛni kacɛ́nmɛ cɛ́n bè.
Wire wè,
siɛn sí wè gbɛ̀nɛ wire kɛnmɛ cɛ́ngi bèʔ.
16 A kire 'laa wè,
ŋáasiɛn wi 'jo wire nyɛ́nì Kàfɔli wi sɔ̀ngirɔ cɛ́n dè,
bè juu bè wi tìɛ wèb ?
Nɛ̀ sí ki taa weli bèle,
Kirisi sɔ̀ngirɔ tiī weli nī.