Korɛnti tɛ́ngɛfɔlilɔ piyē nɛ tíin bɛ̀ pìyirile tíɛlɛ
3
1 Nɛ siinyɛninɛ,
gìi ki 'mi kúɔ wè,
mi sì jáa nɛ̀ mi siɛnrɛ juu dè yeli mɛ́ majo yeli yē Kulocɛliɛ Pìle siɛnnɛ wīʔ.
Ki 'nyaa mi 'ti juu yeli mɛ́ bɛ̀ yeli yē nɛ tári yeli céri kanɛdanʔana koliyo nī yè.
ʔéʔe,
mi 'ti juu yeli mɛ́ bɛ̀ pìyirile tíɛlɛ Kirisi koligo nī gè wī.
2 Nɛ̀yirimɛ mi 'kɛn yeli mɛ́ a yeli 'gbuɔ,
suro bɛ̀ʔ.
Á kire 'laa yeli sǐ gbɛ̀ ti lìiʔ.
Bɛ̀ ki cɛ́ni tíin ŋɔ̀ wè,
yeli sǐ gbɛ̀ ti lìiʔ.
3 Ki 'nyaa yeli céri kanɛdanʔana keli yeli nɛ kúu nɛ tíin.
Bɛ̀ nyabiɛnnɛ nɛ́ kàsii yē baa yeli sunʔɔmɔ nī bè,
céri kanɛdanʔana bɛ̀ʔ lé kire gè ?
Yeli wè ki tìí yeli yē bɛ̀ duniya wuulo tíɛlɛ bèle wī lé ?
4 Á kire 'laa wè,
bɛ̀ wàa cî kɛ́nì jo:
«Mi wè,
Pɔli ní mi yē»,
ŋìi nɛ̂ jo:
«Mi wè,
Apolɔsi ní mi yē».
Kire tiʔɛ gáà nī gè wàlimɛ yē baa lé yeli nɛ́ siɛnsɛnminɛ ní bèle ?
5 Apolɔsi wire cé kɛ́nì puu ŋáasiɛn ?
Pɔli wire cé puu ŋáasiɛn ?
Piyē baakuɔlɔ wī,
nɛ̀ pínɛ pe mìɛni nigbe nigbe pe 'pe baara kúɔ dè nɛ̀ yɛli nɛ́ dìi Kàfɔli wi 'kɛn pe mɛ́ dè,
á yeli sí tɛ́ngɛ Zezi nɛ̄ wè peli nyúmɔ nī.
6 Mi wè,
mi 'tiige cɔ́ri gè,
a Apolɔsi wi 'ki fuɔn.
Kulocɛliɛ sí wi nyɛ́ni ki kpínʔini ki liʔi.
7 Kire kɛnmɛ nɛ̄,
ŋàa wi 'ki cɔ́ri gè,
wire wè yakaaʔ,
nɛ̀ pínɛ ŋàa wi 'ki fuɔn gè,
wire bɛ̀ʔ.
Ki 'nyaa Kulocɛliɛ wire ŋáà wi 'ki kpíʔile gè,
wire wī kayugofɔli wè.
8 Ŋàa wi 'tiige cɔ́ri gè,
nɛ́ ŋàa wi nyɛ́ni ki fuɔnri gè,
yanugo kire nɛ̄ pe yē.
Pe mìɛni nigbe nigbe pe bé sí ga pe sàri taa wè bè yɛli nɛ́ pe baara kúɔgɛnmɛ ní bè.
9 Ki 'nyaa weli nɛ pínɛ nɛ baara nɛ́ Kulocɛliɛ ní wè wī.
Yeli bīɛlɛ Kulocɛliɛ siʔi gè,
nɛ́ yɛgɛ gáà wiī nɛ faanri gè.
10 Nɛ̀ yɛli nɛ́ kpuʔɔrɔ díì Kulocɛliɛ wi 'kpíʔile m'mɛ́ dè,
mi nyɛ́nì saʔa ki kàkpuɔn kɛ́n wè majo bɛ̀ saafaansiciliwe cî ki kpíʔile gè.
A wàa míɛni 'pɛn nɛ̀ pɛ́ni ki suʔu.
Siɛn ó siɛn wi sí de ciʔige mɛni wiī nɛ faanri nɛ taʔala baa wè díɛ !
11 Nɛ́ ki cɛ́n siɛn sǐ ní gbɛ̀ kàkpuɔn wáà wiiyɛ yɛ̀gɛ cíginiʔ ŋàa táanni wi 'yɛ̀gɛ nɛ̀ kúɔ wèʔ,
kire 'jo Zezi Kirisi wè.
12 A siɛn sí faan kàkpuɔn ŋáà nɛ̄ wè nɛ́ tiɛ ní,
á kire 'laa nɛ́ wali ní,
nɛ́ lagbɛnrɛ sìndɛnidɛ ní,
nɛ́ tiire ní,
á kire 'laa nɛ́ nyàsige ní,
á kire bɛ̀ʔ nɛ́ tùɔnrɔ ní,
13 siɛn ó siɛn baara ti bága yiri kpànʔanɛ,
ti bága cɛ́n.
Nɛ̀ taʔa gíi nɛ̄,
kàyuʔujuujɛngɛ gè,
ti bé yiri kpànʔanɛ wálilɛ.
Ki 'nyaa kàsun ki bé ti kányiʔɛ tìɛ gè.
Nɛ́ ki cɛ́n a baara díì yē felige ó felige nɛ̄,
kàsun ki bé ti felige tìɛ gè.
14 A siɛn ŋíì baara 'yéri nɛ̀ kò baa dè,
kire siɛn wi bé sàri taa.
15 A ŋìi baara sí súʔu nɛ̀ tuu dè,
kire siɛn wi bé yɛ̀ waʔanɛ.
Siɛn wi bé tɔ̀ni bè suɔ yoʔ,
ki bé sí puu majo wi 'sùuri kàsun nī wī.
16 Yeli sì ki cɛ́n lé yeli yē Kulocɛliɛ gbùʔɔrɔsaʔa wī lé,
nɛ̀ pínɛ Kulocɛliɛ Pìle niī yeli nī kòrilo lé ?
17 A siɛn ŋíì 'Kulocɛliɛ gbùʔɔrɔsaʔa cúʔɔ gè,
Kulocɛliɛ bé siɛn wi woli cúʔɔ lè.
Nɛ̀ taʔa gíi nɛ̄,
Kulocɛliɛ gbùʔɔrɔsaʔa kiī tiɛwalidɛngɛgɛ wī,
kire sí gī yeli bèle.
18 Siɛn fǎri wìi fáanniʔ.
A ŋìi nɛ wìi sɔ̀ngí wire yē síciliwe yeli nī bèle nɛ̀ yɛli nɛ́ duniya ŋáà wi kɛnmɛ ní bè,
siɛn wi- wìi kpíʔile leyiʔɛgɛ.
Kire ki bé tí wi bé nɛ́ péli kò síciliwe.
19 Ki 'nyaa duniya ŋáà wi sìnjilige gè,
kàala gīɛlɛ Kulocɛliɛ yiʔɛ mɛ́ gè,
nɛ́ ki cɛ́n Kulocɛliɛ siɛnsɛbɛrɛ ti 'jo:
Wi nɛ̂ sìnjiligefɔlilɔ taa bèle
nɛ̀ cò pe sìnjilige nī gèa.
20 A ti ń'nɛ̀ jo:
Kàfɔli wi 'siɛnsicilile
pe funzɔngirɔ cɛ́n dè,
nɛ̀ ki cɛ́n tiī wíra wīb.
21 Kire nɛ̄,
siɛn fǎga de nàgbuʔɔrɔ kpínʔini bé wi sɔ̀ngirɔ taʔa dè siɛnnɛ nɛ̄ʔ,
nɛ́ ki cɛ́n kele ke mìɛni kiyē yeli kiyɛ nī wī.
22 Ma 'jo Pɔli yo,
ma 'jo Apolɔsi yo,
ma nɛ́ jo Sefasi yo,
á kire bɛ̀ʔ duniya wè yo,
sìi wè yo,
kùu wè yo,
á kire 'laa pàngɛ ŋáà wè yo,
mbànʔa ŋáà wi báan wè yo:
ti mìɛni yē yeli wori.
23 Yeli sí yē Kirisi wuulo;
Kirisi wire sí ní Kulocɛliɛ wuu.