Korɛntiyé 1 4

Kulocɛliɛ wire nigbe wī kàyuʔujuuwo wè

1 Kire nɛ̄, siɛnnɛ pe 'yɛli peri weli tɔ́ri baakuɔlɔ, á Kulocɛliɛ wi 'wi kalarigɛlɛ kɛn gèle weri ke nyu de tìí. 2 Gìi sí pe caa gè, siɛn ŋáà mɛ́ pe 'kele kɛn gèle, siɛn wi- puu tɛ́ngɛmɛ siɛn. 3 Mi wè, kiì mi líɛ yafiɛn mɛ́ʔ, a ki yē yeli ye je mi kɛnmɛ siʔɛ bè bè wéli wèʔ, á kire 'laa siɛnwarilɛ pálì bèleʔ. Mi tíimɛ wè, mi wè káala mìɛ nɛ̄ʔ. 4 A ki 'tɔ̀ni nɛ̀ yéri kire nɛ̄ gè, mi fungo ki wè mi túngu kaala láà fáala nīʔ. Nɛ̀ sí ki taa, kire bɛ̀ʔ ki 'mi juu nɛ̀ yige kaala nī díɛʔ. Ki 'nyaa wire wi bé gbɛ̀ kàyuʔu juu gè. 5 Kire nɛ̄, ye fǎri yakaa nyu de celile siɛn wori nɛ̄ʔ, lɛ̀lɛ ni de tíin niì fìɛ nɔ̀ wèʔ. Ye- ki yaʔa fúɔ Kàfɔli wi ga pɛn. Kele gálì gīɛlɛ baa puɔdɔngɔlɔ gèle, wire wi bé pa ke yige kpìɛnmɛ nɛ̄, bé sí siɛnnɛ pe funyɔ kasɔngigɔlɔ yige gèle kpànʔanɛ wálilɛ gàli gīɛlɛ baa yebilige nī gè. Kire cɛngɛ gè, siɛn ó siɛn wi bé wi taa dè Kulocɛliɛ mɛ́ wè.

6 Nɛ siinyɛninɛ, kire nɛ̄ mi 'siɛnrɛ dáà juu dè, bè ti tɔ́nminɔ nɛ́ weli sìi ní wè, mi nɛ́ Apolɔsi ní wè. Gìi ki bé tí ye fǎga ki líɛ bè tórigo gìi ki 'sɛbɛ baa Kulocɛliɛ siɛnrɛ nī dèʔ. Ye fǎga wàa líɛ bè wire kpúʔɔ bè tóri bìli nɛ̄ bèleʔ, bé sí de yìye nyíɛnɛ bèri wàa cúɔnnɔʔ. 7 A kire 'laa wè, ŋáasiɛn wi kɛ́nì jo muɔ 'pɔ́ri bìli nɛ̄ bèle ? Gáa gī muɔ mɛ́ ga laa piyè muɔ kɛn wīʔ ? A ki sí yē pe 'muɔ kɛn wī wè, gáa nɛ̄ muɔ nɛ mìɛ nyíɛnɛ, ma cɛ jo dùʔɔ wàa bɛ̀ʔ wi 'muɔ kɛnʔ ?

8 Bɛ̀ ki yē ŋɔ̀ wè, yeli 'yɛrɛ taa dè nɛ̀ tín ti nɛ̄, yeli yē lɔrifɔlilɔ. Yeli 'kùlofɔligɔ taa gè nɛ̀ kúɔ nɛ́ weli yaʔa. ʔé, a ki sí yē yeli tɔ̀ni yē kùlofɔlilɔ bèle, weli míɛni bèle we- puu kùlofɔligɔ nɛ̄ gè nɛ́ yeli ní ! 9 Á kire 'laa wè, mi 'ki nyaa majo weli bálì bīɛlɛ tundunminɔ bèle, Kulocɛliɛ wi 'weli wáa nɛ̀ yaʔa weli yē kàdotɔnminɔ, nɛ́ ní còjaanna kùu mɛ́ wè. Ki 'nyaa weli 'kò duniya nī wè mɛ́ bèle nɛ́ siɛnnɛ ní bèle yawelige, pe weli wéli. 10 Weli yē kàalafɔlilɔ Kirisi wire kɛnmɛ nɛ̄ bè, yeli sí yē sícilile bɛ̀ yeli yē kòrilo nɛ́ Kirisi ní wè. Weli yē ŋɔri fùn, yeli sí yē nɛ́ ŋɔri ní. Piyē nɛ kpuʔɔrɔ tari yeli nɛ̄, weli bèle, wàa sí wè tɔ́ri nɛ́ weli níʔ. 11 Bɛ̀ ki yē ŋɔ̀ wè, fungo yē weli nɛ̄, luʔɔwuʔɔ yē weli nɛ̄, weli yē bururo fùn, piyē nɛ weli kpúɔn nɛ́ sápile ní, kòridiʔɛ wè weli mɛ́ʔ. 12 Weli yē nɛ wuʔɔ níɛ baara weli tíimɛ bèle. A pe 'weli tiʔɛlɛ, weli nɛ̂ diba kpíʔile pe mɛ́. A pe weli wuʔɔ, weli nɛ̂ ki kpàri nɛ̀ cò. 13 Piyē nɛ weli míʔɛ córi gè, weli nɛ siɛntaanra nyu pe mɛ́. Weli 'kò bɛ̀ kànyaʔara tíɛlɛ duniya nī wè, weli 'yē pe mìɛni mɛ́ bɛ̀ kari wáadiʔɛ tíɛlɛ fúɔ nɛ̀ pɛ́nì taa ŋɔ̀ wè.

14 Mi wè nɛ siɛnrɛ dáà sɛbɛ dè bè fìɛrɛ tɔ́n yeli nɛ̄ wīʔ. Ki 'nyaa bɛ̀ yeli yē mi pìile bèle, á yeli woli ni 'mi dɛ́ni wè, kire nɛ̄ mi je juu bè tìɛ yeli nɛ̄. 15 A yeli nɛ́ cɛ́nì tɛnmɛfɔlilɔ taa a pe 'niʔɛ nɛ̀ nyuɔ kúɔ yeli kodanʔara nī dè nɛ́ Kirisi ní wè, yeli tuu wiī nigbe ! Nɛ̀ taʔa gíi nɛ̄, mi wī yeli tuu wè Zezi Kirisi koligo nī gè, jáarigɛ kire fànʔa nɛ̄ gè. 16 Mi nɛ ye fiɛn wī, yeri mi nyadanʔagɛlɛ tári gèle. 17 Kire kɛnmɛ nɛ̄ mi 'Timote tórigo wè baa yeli mɛ́. Wire wī mi jaa wè, ŋàa wi 'mi dɛ́ni wè, wiī tɛ́ngɛmɛ siɛn nɛ̀ pínɛ wi koligo nī gè. Wi bé yeli sɔ̀ngi bè taa nɛ́ mi sìi tánʔagɛnmɛ ní bè Zezi Kirisi kɔli mɛ́ gè, majo mɛni mi nɛ ki nyu nɛ siɛnnɛ tɛnmɛ bèle ke mìɛni nī gèle, a mi gbɛ̀nɛ kɛ́ tiʔɛ ó tiʔɛ nī wè.

18 Pàli 'puu nɛ ki sɔ̀ngí nɛ̀ jo dùʔɔ miì ga kɛ́ baa yeli mɛ́ wīʔ, a pe 'yɛ̀ nɛ pìye nyíɛnɛ. 19 Nɛ̀ sí ki taa, a Kulocɛliɛ 'fɔ̀li wè, ki 'kò cɛ̀ m'bé kɛ́ baa yeli mɛ́. Bìli pe nyɛ́ni nàgbuʔɔrɔ siɛnrɛ nyu dè, tire kɛnmɛ nɛ̄ bɛ̀ʔ mi nɛ waaʔ. A ki yē fànʔa yē pe mɛ́, bà m'bé ki cɛ́n. 20 Nɛ́ ki cɛ́n ki wè siɛnjuuro yakuɔ wīʔ, kiī nɛ́ fànʔa ní wī. 21 Gíi ki 'pɔ́ri yeli mɛ́ ? Mi gari waa yeli tiʔɛ nī gè nɛ́ sɔ̀migɔ ní lé, dí mi gari waa nɛ́ wìyedɛnigɛ fungo ní, nɛ́ funnyige ní ?