Yakuba wi 'nɔ̀ Laban tiʔɛ nɛ̄ gè
29
1 A Yakuba ń'nɛ̀ yɛ̀ nɛ̀ tánʔana séli lè nɛ waa cɛngɛnyɛnifoligɔli siɛnnɛ kùlo mɛ́ lè. 2 Cɛngɛ káà a Yakuba kɛ́nì kɔ̀lɔ wáà nyaa baa kágorigo nī gè, baa pe 'puu nɛ kóri nɛ yajuuro kanʔa dè ti‑ gbun dè. Sìnbatoyo taanri sí puu sínɛyɛ kɔ̀lɔ táanni wè. Kàdɛnigbuʔɔ 'puu tɔ́ngɔ kɔ̀lɔ nyuɔ nɛ̄ gè. 3 A síkaala nɛ́ sìnbaara ti gbɛ́nɛ tìi pínɛ dè, pe nɛ̂ cé sìndɛnigɛ ŋɔrigɔ gè nɛ̀ láʔa kɔ̀lɔ nyuɔ nɛ̄ gè níɛ yajuuro kɛn dè ti nɛ̂ gbuɔ; pe nɛ̂ kúɔ níɛ sìndɛnigɛ tɔ́n gè baa kɔ̀lɔ nyuɔ nɛ̄ gè.4 A Yakuba 'yajuunaʔana yúgo bèle nɛ́ jo: «Nɛ wuulo, yeli 'kɔ́n sé ?»
A pe 'wi yɛ: «Weli 'kɔ́n Karan kàʔa mɛ́.»
5 A wi ń'nɛ̀ pe yúgo nɛ́ jo: «Yeli 'Laban cɛ́n lé, Nakɔri jaa wè ?»
A pe 'wi yɛ: «ʔaan, weli nyɛ́nì wi cɛ́n.»
6 A wi sí ń'nɛ̀ pe yúgo nɛ́ jo: «Wiī baa gbɛ̀nwɛ í ?»
A pe ń'nɛ̀ wi yɛ: «ʔaan, wiī gbɛ̀nwɛ. Wi póri tíimɛ Arasɛli wire cɛ wi báan baa ŋàa wè nɛ́ sìnbaala nɛ́ síkaala ní bèle.»
7 A Yakuba sí jo: «ʔá ! Cɛngɛ kiì fìɛ kúɔʔ, lɛ̀lɛ niì fìɛ nɔ̀ bè yajuuro gbuʔulo dè tìi nɛ̄ʔ. Gáa nɛ̄ yiyě gbɛ̀ luʔɔ kɛn ti mɛ́, ti‑ gbuɔ, bé sari ti náriʔ ?»
8 A pe 'wi yɛ: «Weli sǐ gbɛ̀ jáaʔ, fúɔ macɛn yajuuro ti mìɛni kɛ́nì tìi pínɛʔ. Píra ŋáà nī wè pe nɛ̂ nɛ́ sìndɛnigɛ ŋɔrigɔ gè nɛ̀ láʔa kɔ̀lɔ nyuɔ nɛ̄ gè, we nɛ̂ yajuuro kɛn dè ti nɛ̂ gbuɔ.»
9 Bà wi 'puu nɛ nyu nɛ tíin nɛ́ pe ní wè, a Arasɛli 'fali nɛ̀ nɔ̀ nɛ́ wi tuu sìnbaara ní dè. Ki 'nyaa sìnbanaʔawa wi 'puu. 10 Bà Yakuba 'Arasɛli nyaa wè, wi nàa Laban póri wè, nɛ́ wi nàa Laban sìnbaara ní dè, a wi 'sìʔɛrɛ nɛ̀ sɛ́nì kàdɛnigɛ ŋɔrigɔ gè nɛ̀ láʔa kɔ̀lɔ nyuɔ nɛ̄ gè, nɛ̀ Laban sìnbaara kɛn dè a ti 'gbuɔ. 11 A wi 'fali nɛ̀ Arasɛli suɔn suɔn wè gàangbuʔulo nɛ̄ gèle nɛ́ fali nɛ kɔngɔ le nɛ nyɛni fundaanra nɛ̄ dè. 12 A Yakuba 'fali nɛ̀ Arasɛli yɛ wè, dí wire yē wi tuu wi nàa, dí Erebɛka jaa wī wire wè. A Arasɛli 'fali nɛ̀ fɛ̀ nɛ̀ sɛ́nì ti juu wi tuu mɛ́ wè.
13 Bà Laban 'siɛnrɛ dáà lúʔu dè, Yakuba wori dè, wi cɔni jaa siɛnrɛ dè, a wi 'fali nɛ̀ fɛ̀ nɛ̀ kɛ́, nɛ̀ sɛ́nì wi kpàli, nɛ̀ wi wáa nɛ̀ mígi nɛ́ 'fali nɛ̀ wi suɔn suɔn, nɛ́ wi kɔ́ri nɛ̀ pɛn wi kpáa mɛ́ gè. A Yakuba 'wi kele ke mìɛni juu nɛ̀ tìɛ Laban nɛ̄. 14 A Laban sí jo: «Kányiʔɛ gī ! Muɔ nɛ́ mi ní wè, je wiyē sìsiɛn nugo nɛ́ mi ní wī !»
A Yakuba 'kò baa Laban tiʔɛ nī gè fúɔ nɛ̀ taa yege.
Yakuba wi 'cɛlilɛ siin líɛ
15 Cɛngɛ káà, a Laban wi sí kɛ́nì Yakuba yɛ wè: «Muɔ béri baara waʔanɛ lé mi tiʔɛ nī gè, bɛ̀ muɔ yē mi nàa wè lé ? ‑Ki juu mi mɛ́ jori muɔ nɛ caa mi de muɔ sàri.»
16 Ki 'nyaa sinborilo siin 'puu baa Laban mɛ́. Pe 'puu nɛ juɔfɔli yeri wè Leya, níɛ cɔnifɔli yeri wè Arasɛli. 17 Leya wire nyapigele ke yé tɔ̀ni nɛ puu cɛ̀ngɛlɛa nɛ̀ ki yaʔa Arasɛli wire sí yé tɔ̀ni nɛ puu cɛ̀nwɛ cetinnɛ nɛ̄ lè, wi yiʔɛ míɛni ki 'puu cɛ̀ngɛ. 18 Arasɛli wire wi yé Yakuba dɛ́ni wè. A wi sí jo: «M'béri baara muɔ mɛ́ bè ba taa yiʔɛlɛ kɔlisiin, dí muɔ sí muɔ póri siinwuu Arasɛli kɛn wè m'mɛ́ mi‑ wi pɔri.»
19 A Laban sí jo: «Ki 'mi dɛ́ni bè wi kɛn muɔ mɛ́ sɛ́ni mi sa wi kɛn wàa wiiyɛ mɛ́ wè. Kò náʔa mi tiʔɛ nī gè.»
20 A Yakuba 'baara yiʔɛlɛ kɔlisiin Arasɛli nɛ̄ wè, a wi cɛ́nì ki nyaa majo yiʔɛlɛ gálì ke yé puu cɛnyɛ cɛ̀ri wī, bɛ̀ Arasɛli wi yé wi dɛ́ni kpuʔɔ wè. 21 Kire kàduʔumɛ gè, a Yakuba sɛ́nì ki juu Laban mɛ́ wè nɛ́ wi yɛ: «‑Mi cuɔ kɛn wè m'mɛ́, mi‑ wi nyɔ́gɔ saʔa nī, nɛ́ ki cɛ́n mi lɛ̀lɛ ni 'nɔ̀.»
22 A Laban sí cepɔrigɔ ki cɛngɛ tɛ́ngɛ gè, nɛ́ sɔ́migɔ nɛ̀ suʔɔ, nɛ̀ ki tiʔɛ siɛnnɛ pe mìɛni yeri. 23 Bà pìlige ki pɛ́nì wúɔ gè, a Laban sɛ́nì Leya cò nɛ̀ pɛ́nì kɛn Yakuba mɛ́ wè, a Yakuba 'wi cɛ́n cɛliwɛ.
24 Laban cé sùkulocuɔ Zilipa láʔa wè nɛ̀ kɛn wi póri Leya mɛ́ wè wi‑ puu wi sùkulowo.
25 Bà kpìɛnmɛ pi kɛ́nì tuu wè, a Yakuba 'ki nyaa, Leya wī. A wi sí Laban yúgo wè nɛ́ jo: «Kiī mɛni wī mmɛ gè ? Gáa muɔ 'kpíʔile mi nɛ̄ mmɛ gè ? Arasɛli nɛ̄ bɛ̀ lé mi 'baara muɔ mɛ́ wè ? Gáa nɛ̄ muɔ 'mi fáannib ?»
26 Á Laban wi 'jo: «Ki wè weli kaliɛlɛ bè cɔnifɔli kɛn wè nàgaʔa nɛ̄ bé juɔfɔli yaʔa wèʔ. 27 ‑Cégboli kúɔ lè nɛ́ Leya ní wè. Kire kàduʔumɛ m'bé Arasɛli kɛn wè muɔ mɛ́, dí muɔ sí ní baara m'mɛ́ yiʔɛlɛ kɔlisiin kálì cíginic.»
28 Kire sí Yakuba 'kpíʔile, a wi 'cégboli kúɔ lè nɛ́ Leya ní wè, á Laban 'Arasɛli kɛn wè wi mɛ́.
29 Laban cé sùkulocuɔ Biliya láʔa wè nɛ̀ kɛn wi póri Arasɛli mɛ́ wè ‑wi puu wi sùkulowo.
30 A Yakuba 'Arasɛli nyɔ́gɔ wè wi saʔa nī gè. Arasɛli wi yé tɔ̀ni nɛ̀ wi dɛ́ni nɛ̀ tóri Leya nɛ̄ wè. A Yakuba ń'nɛ̀ koli nɛ̀ baara yiʔɛlɛ kɔlisiin kálì cígini wi nàa mɛ́ wè, Arasɛli nɛ̄ wè.
Yakuba wi 'pìile taa
31 Bà Yewe 'ki nyaa Leya sì cé Yakuba dɛ́ni wèʔ, a wi 'cesiʔi tɛ́ni gè Leya nɛ̄ wè, nɛ̀ ki yaʔa Arasɛli wi yé puu sìndigicuɔ. 32 A Leya 'laala taa nɛ̀ nàgabile sii, nɛ̀ wi míʔɛ le gè nɛ wi yeri Wurubɛni (ki kɔri wire wī: mi 'jaafɔli taa). Á wi 'ki juu nɛ́ jo: «Yewe nyɛ́nì mi wuʔɔgɔ nyaa gè; píra ŋáà nī wè, mi bé mi pɔli dɛ́ni wèd.»
33 A Leya wi ń'nɛ̀ laala láà taa nɛ̀ nàgabile láà sii cígini. A wi 'jo: «Yewe nyɛ́nì ki nyaa mi sì mi pɔli dɛ́ni wèʔ, a wi ń'nɛ̀ ŋàa kɛn wè m'mɛ́.» A wi 'pùɔ wi míʔɛ le gè nɛ wi yeri Simɛyɔ (ki kɔri wire wī: Yewe wi nyɛ́ni lúru).
34 A Leya wi ń'nɛ̀ laala láà taa nɛ̀ ń'nɛ̀ nàgabile láà sii cígini. A wi 'jo: «Píra ŋáà nī wè, mi pɔli wi bé mi cò cɛ̀ngɛ, nɛ́ ki cɛ́n mi nyɛ́nì nàgabigele taanri sii wi mɛ́.» A wi 'pùɔ wi míʔɛ le gè nɛ wi yeri Levii (ki kɔri wire wī: wi bé mi cò cɛ̀ngɛ).
35 A wi ń'nɛ̀ koli nɛ̀ laala láà taa cígini, nɛ̀ nàgabile láà sii. A wi 'jo: «Lɛ̀lɛ náà nī lè m'béri Yewe síɛri bèri wi gbùʔɔrɔ.» Kire nɛ̄ a wi 'wi míʔɛ le gè nɛ wi yeri Zuda (ki kɔri wire wī: síɛrigɛ). A wi cesiʔi ki 'yéri.