Uwiikhasi wuna wukimushendeefya uNguluvi
4
1 UKilisito wálavaga mu nyi muno,
lino na yuumwe muyipinyaje kilava ngaja umwene.
Nilogola ndeeno kwa kiiva umuunu yuna wálavaga asikwiliile kitemwa khanji nu wunansi.
2 Kihuma lino musikhajelaga kikhala kwa kifwata uwupafu weenyu uwa mu nyi,
leelo sengaji gina idobokha uNguluvi,
uluhaavi lwenyu luna mwikhala pa nyi panu.
3 Paanyuma mukhandi mufwata injendo isa vaanu vina vasikimuhuviilila uNguluvi.
Mukhandi mufwata uwupafu weenyu uwa mu nyi,
kiwaafukha na kigaala.
Khanji mwadobokhaga ishiwungo sha wupafu nu wugaasi,
na kifuunya amanguluvi kuna kukimukhalasa mandu uNguluvi.
4 Avaanu awo vina vasikimuhuviilila uNguluvi,
lino viswiga kwa kiiva musiigaha nawo uwunansi,
khanji vikivaliga omwe.
5 Avaanu awo,
visakulwa kilambiisila vaveene pa Nguluvi ulwa wuvi waanave uwo.
Umwene uNguluvi,
ayipinyile kivahiga avaanu woona vina wuumi na vina vafwile.
6 Lulwene avaanu vina vafwile woope vakhomelwagwa iMola iNofu iya Yeesu Kilisito pina vali wuumi.
Awo,
hata nda vahigwagwa ngaja avanji shina vahigwagwa,
lino viikhala ngaja shina uNguluvi isakula kwa ngufu ya Numbula waakwe.
7 Uwudugo wa njowo soona wuhejeelile,
lino muveesaje mukiyivavala na kiiva meeho mu goona gina mwisenga,
baheene mukwiliile kifuunya.
8 Mu goona,
mugananaje kwa numbula yoona,
kwa kiiva nda umugane umuunu ndeeno,
usiive uyipinyile kimusaajila hata nda akunanjiile uwunansi mala nyinshi mandu.a
9 Muveesaje mudobokha kivasaajisa avaanu mukhati ya nanda seenyu,
kwa numbula yoona.
10 UNguluvi ikivapeela avahuvililaaji va Yeesu Kilisito,
ifipeelwa finshi fina fili paayo.
Shila muunu ashisenjelaje wunofu ishipeelwa shaakwe kwa kivatanga avayine,
ngaja muyimililaaji munofu wa mota nyinshi sa Nguluvi.
11 Yoyoona yuna ana shipeelwa sha kikhoma na kimanyisa,
agahaje ndeeno ngaja muunu yuna afiliikhwe nu Nguluvi.
Woope yuna ana shipeelwa sha kitanjilisa,
avatanjilisaaje avayine kwa ngufu sa Nguluvi.
Kwa nsila iyi,
uNguluvi akwiliile kisufisiwa mu goona kwa kiiva ya Yeesu Kilisito.
Uwutupikho nu wutawulilwa,
wuve nu mwene shiluta na shiluta!
Amina!
Kilava kwa kiiva ya Kilisito
12 Vagani vangu,
amalava makhome gina gikivapata gina gikilijela ilihuuvi lyenyu,
musikhaveesaga ngaja musimeenye kiija,
kwashi mwilava.
13 Leelo mushendeevaje kiiva muhanga mu malava ga Kilisito,
baheene mukhava ni limwemwe mandu,
pina uwutupikho wa Kilisito wukhagubutulwa bahawuvalafu.
14 Avaanu nda vikivapiikha kwa kiiva mukilihuviilila ilitaawa lya Kilisito,
mumanyaje kiija muyimiililwa.
Iliswi ilyo liwonensa kiija uNumbula wa Nguluvi wa wutupikho,
ali lumo noomwe.
15 Nda mwilava,
musikhalavaji kwa kiiva mwigaha uwunansi,
kibuda,
kihiija,
na kihomegania.
16 Leelo nda mwilava kwa kiiva muli vahuvililaaji va Kilisito,
musikhawonaga nsoni.
Leelo mumusufyaje uNguluvi kwa kiiva mulisumwile ilitaawa lilila ilya Kilisito.
17 Uluhaavi ulwa kihigwa lwafikha,
uNguluvi akhatala kivahiga avaanu vaakwe.
Lino,
nda akhatala kituhiga ose vaanu vaakwe yumwene,
wuli,
awo vina vasihuviilila iMola iNofu iya Nguluvi,
kihigwa kwanave kusikhava kwa kitiisa mandu?
18 Aga gali ngaja shina aMayandikhwa aManofu giijova,
“Avagolofu nda vakhakulukha kwa malava,
yikhava wuli kwa vanansi vala vina vasikhamutiilile uNguluvi?”b
19 Lino,
vina viilava kwa kiiva uNguluvi isakula valave,
vayitenekhaje kigaha amanofu na kimuhuviilila uNguluvi,
uMuwumbaaji waanave umuyinatifu.