1 Petulo 3

Amamanyiso kwa mugoosi nu mudala

1-2 Omwe vashimaayi, vapulisaaji avagoosi veenyu. Kwa nsila iyo, avagoosi vina vasiyinatila amamanyiso ga Yeesu, vasiyiitishe injendo seenyu inofu nu lugoto. Baheene avagoosi vamuhuviilile uNguluvi bila kijovelwa liswi lyolyona. 3 Kiyikogola kwenyu, kusikhaveesaga kwa kunja hela, ngaja kitava inyele, kifwala isahaabu na menda aga lutono, 4 leelo uwunofu weenyu wuyansisaaje mu numbula. Uwunofu wuna wusinanjikha awu kisakhala na wula wuna wiiva ni numbula ya wuhuugu nu wulindamafu. Uwu wuweene uwunofu wuna wisakulwa pa Nguluvi. 5 Ndeeno shilushwali shina yikhandi pawukuulu, avashimaayi avabaagule vina vamuhuvililaga uNguluvi na kimuyinatila, vayikogolaga kwa njendo inofu isa kivagota avagoosi vaanave. 6 Uwashimaayi yumonga yuna wágahaga ndeeni yu Saala, umudala wa Abulahamu. Uyu akhandi ikimupuliisa wunofu umugoosi waakwe na kimutiila, akhandi ikimushemeela iija, “Mutwa wangu.” Na yuumwe mwiva vaana va Saala, nda mwisenga gina manofu pina musitiila lyolyona.

7 Na yuumwe vagoosi, mwisakulwa mukhalaje wunofu na vadala veenyu, kwa kiiva mumeenye kiija, vagaya ngufu ngaja omwe. Muvagotaje, kwa kiiva uNguluvi wávatahisaaga omwe woona kiija, mukhahaala imota ya wuumi wa shiluta. Lino musengaje ndeeni, baheene amafuunyo geenyu gasikhakhanwagwa.

Kilafisiwa kwa kiiva ya kisenga amanofu

8 Kuwudugo niijova ndeeni, muveesaje ni numbula yimo, khanji woona musajilanaje na kitanjilisania. Mugananaje ngaja vanyalukholo, muveesaje vanya lusungu na kiyiyiisa. 9 Musikhahombesaaji kwa vina vikivagahila uwunansi, awu amaligo kwa maligo, leelo muvagahilaje amanofu. Ndeeno shilushwali uNguluvi isakula mugahe, baheene avayimiilile omwe. 10 Aga gali ngaja shina aMayandikhwa aManofu giijova,

“Yoyoona yuna isakula kikhala wunofu na kiyimiililwa,

asikhalogolaga injowo imbi ku vaanu na kilogola uwudehi.

11 Isakulwa asikhasengaga uwunansi, asengaje amanofu.

Ave iikhala kwa wulindamafu na vayine, awuyinatilaje mandu.

12 Ndeeno shilushwali uMutwa uNguluvi ikivaloleela kwa wunofu avagolofu,

woona vina viigaha gina gikimushendeefya umwene,

khanji ipulikha amafuunyo gaanave.

Leelo vina viigaha uwunansi, ikivagunjila.”

13 Yu naani yuna akwiliile kivagaha fivi nda mujimba kisenga amanofu? 14 Leelo hata nda mwilava kwa kisenga isa wugolofu, uNguluvi akhavayimiilila. Lino, musikhatiilaga pina vikivatiisa wala musikhatungumalaji. 15 Leelo musufyaji uKilisito mu numbula seenyu, kiija Mutwa. Muveesaje muyipinyanjile uluhaavi loona kimuyankha umuunu yoyoona yuna iiposa aga lihuuvi lyenyu. Muveesaje mwisenga ndeeni kwa wuhuugu nu lugoto. 16 Khanji muveesaje na mahiiva manofu kwa kiiva omwe muli vavanda va Kilisito, baheene awo vina vikivalogola uwudehi kwa kiiva ya njendo seenyu iso, vawone nsoni. 17 Nilogola ndeeno kwa kiiva uNguluvi nda isakula ulave, shiba ulave kwa kiiva ya kigaha amanofu, kulikho ulave kwa kiiva ya kigaha uwunansi.

18 Woope uKilisito wálavaga, wáafwa gwalimo hela kwa kiiva ya wunansi weesu, lulwene ndeeno umugolofu wáfwisaga kwa kiiva ya vanansi, kiija atulingaanie nu Nguluvi. Vamubuda uluhaavi ana muvili gwa muunu, leelo wáfyukha kwa ngufu ya Numbula uMunofu. 19 Kwa ngufu iya Numbula uyo, wálutaga kwa vamalayikha avavi vina vafunjiilwe ku shifungo, wávakhoma imola ya lumeno lwakwe. 20 Avamalayikha awo, vaveene vina vakhaanaga kimuyinatila uNguluvi pawukuulu, pina uNuhu akhandi itenda ishipugo ishikhome. UNguluvi wágugumilaga uwunansi waanave mbakha uluhaavi pina ishipugo ishikhome shitendwa. Leelo kuwudugo avaanu vasheefu, vaanu munaana hela, vaveene uNguluvi wávakulusaaga, vasikhafwile na malenga ga lufuwukho. 21 Amalenga ago shihwano sha wutwiniaji weenyu wa nsiku isa luhaavi ulu. Uluhaavi luna mutwinisiwa yiwonekha kiija, uNguluvi wávakulusa kwa ngufu ya kifyukha kwa Yeesu Kilisito. Lino, uwutwiniaji wusili wa kiyiyooga na kiwuwuusa uwushaafu wa muvili, leelo kiyihumya kwa Nguluvi kwa numbula yoona. 22 UYeesu Kilisito uyo wálutile kwa Nguluvi, lino akheele ku liwokho ilya kundiilo ilya Nguluvi, mu luvala ulwa lishima likhome mandu. Ikivatema avamalayikha, ifiwumbwa ifya wutawulilwa, ni finya ngufu.