2
1 Lino,
muwuleshe uwunansi woona,
uwudehi,
uwumyansi,
ishooyo,
nu wuhomegania woona.
2 Ngaja avaana avashaali shina vana lihaahi nu tupyo twa vamaayi vaanave,
na yuumwe muveesaje ni lihaahi ilya kiingʼwa utupyo utunofu,
utupyo uto,
Liswi lya Nguluvi.
Nda mukilidobokha mandu iLiswi ilyo,
mukwiliile kikula mu wukulukho.
3 Lino mwajesa,
khanji mwayansa kimanya kiija,
uMutwa munofu.a
Avabaagule va Nguluvi ngaja mangʼanga gina muumi
4 Mumulutilaje uMutwa uYeesu yumwene lingʼanga lya wuumi lya kisenjela.
Ilingʼanga ilyo avaanu valikhaanaga,
leelo uNguluvi wálihagulaga,
khanji lya lishima pa meeho gaakwe.
5 Na yuumwe uNguluvi asivasenjele ngaja mangʼanga aga wuumi aga kisenjela inanda ya Nguluvi.
Omwe vatambule vabaagule va Nguluvi muna mwihumya isadaakha isa shinumbula sina sikimushendeefya uNguluvi kwa ngufu sa Yeesu Kilisito.
6 AMayandikhwa aManofu giijova,
“Puliisi,
niviishile ilingʼanga ilikhome lya luutu
ku lijumbi lya Sayuni,
b
khanji ilingʼanga lya lishima lina nilibagwile.
Shila muunu yuna ikimuhuviilila uKilisito yuna ali lingʼanga ilyo, asikhayegukha kaa!”c
7 Ilingʼanga ili lya lishima kunyeenyu omwe muna mukimuhuviilila.
Leelo kwa vala vina vasikimuhuviilila uNguluvi,
aMayandikhwa aManofu giijova,
“Ilingʼanga lina avasengaaji valikhaanaga,
lilyene liveele lingʼanga likhome ilya ku mbogonyo ya luutu lwa nanda.”d
8 Khanji giijova kiija,
“Ilingʼanga ili lilyene lina avaanu vakhakuvala,
ilingʼanga lina likhavapinsa avaanu vave viigwa.”
e
Vakhakuvala kwa kiiva vasikhalihuviliile iLiswi lya Nguluvi, ndeeno shilushwali shina vapanjiilwe nu Nguluvi kihuma pawukuulu.
9 Leelo omwe,
uNguluvi avabagwile muve vaanu vaakwe.
Omwe vatambule va shitwa,
khanji nyi yina yikimusenjela uNguluvi mwene duguli.
Mwabagulwagwa kiija muve vakhomaaji va nsengo inofu isa Nguluvi.
Wávashemeela kiija muhume mu nshiisi ya wunansi,
baheene muve kunyaakwe mu wuvalafu uwunofu.f
10 Apo pashiyanso musikhandi vaanu va Nguluvi,
leelo lino muli vaanu vaakwe.
Khanji musikhasungupiilwe nu Nguluvi,
lino leelo musungupiilwe.
Kivatiila avalongosaaji woona
11 Vagani vangu,
nikivalomba kwa kiiva muli vahensa khanji muli vashila nsila mu nyi,
wusigaji uwupafu wuvi weenyu,
wuna witovana ni numbula seenyu.
12 Muveesaje ni njendo inofu pa vaanu vina vasikimuhuviilila uNguluvi.
Baheene nda vikivalogola wudehi kiija,
mwisenga uwunansi,
vasaagaje insengo seenyu inofu.
Baheene vasimusufye uNguluvi kwa kiiva yeenyu,
mu lijuva lina akhayinsa kivahiga.
13 Yinatilaji indaji isa nyi yeenyu,
kwa kiiva omwe mukimuyinatila uMutwa uYeesu.
Mumutiilaje umutwa weenyu uwa nyi,
kwa kiiva umwene mulamulaaji mukhome wa vaanu woona.
14 Khanji muvatiilaje avalongosaaji va booma vina umukhome wa nyi avahagwile.
Muveesaje mwigaha ndeeno kwa kiiva aveene vavishiilwe kiija,
vavapeele ululawo avaanu vina viigaha uwuvi na kivasufya vala vina viigaha amanofu.
15 Niijova ndeeno kwa kiiva uNguluvi isakula mugahaje amanofu,
baheene vala vina vayasu vasikhaveesaga na lyolyona ilya kilogola kivapiikha omwe.
16 Kiiva omwe muyiyesheele,
musikhawugahaga uwuyeeshelo weenyu kiiva nsila ya kigaha uwunansi,
leelo mukhalaje ngaja shina avavanda va Nguluvi shina visakulwa kikhala.
17 Muvatiilaje avaanu woona na kivagana avahuvililaaji vayeenyu.
Yiyisaaji kwa Nguluvi na kimutiila umukhome weenyu.
Mugugumilaje ngaja uYeesu shina wágugumilaga
18 Omwe vavanda,
vatiilaji avakhome veenyu,
khanji muyiyisaaje,
yisikhaveesaga kwa vala vina vanofu na vahuugu hela,
leelo na vala vina vakhali.
19 Omwe nda mugugumile amalava gina musisakulwa,
kwa kiiva ya kimuyinatila uNguluvi,
baheene umwene akhavayimiilila.
20 Musikwiliile kimushendeefya uNguluvi kwa nsila ya kigugumila,
nda vikivalafya kwa kiiva ya wunansi weenyu.
Leelo nda mugugumila kilava kwa kiiva mwagagahaga amanofu,
apo baheene uNguluvi asivashendeevele.
21 Mwisakulwa kiija mugugumilaje ndeeno,
kwa kiiva uKilisito yumwene wávalavilaga omwe.
Khanji wávaleshelaga ishihwano,
kiija muhwananisaaje kisenga gina wágasengaga.
22 “Umwene asikhagahile uwunansi,
awu kiiva nu wudehi wowoona.”g
23 Uluhaavi luna vikimuliga asikhayanshile liswi lyolyona ilya kiliga.
Pina vikimulafya asikhajelile kihombesa lyolyona ilya kivatiisa,
leelo goona wámuleshelaga uNguluvi yuna iihiga avaanu kwa shiyooli.
24 UKilisito yumwene wásumulaga uwunansi weesu mu muvili gwakwe pa musalaaba.
Wágahaga ndeeno baheene ose tisikhatemwagwa khanji nu wunansi,
leelo tive nu wiikhasi wuna wukimushendeefya uNguluvi.
Umwene wálemesewaagwa,
baheene omwe mukulushe.
25 Mwayagaga ngaja nkholo sina sikhandi siyajile,
leelo lino mwamutinila uMutwa uYeesu,
uMudimaaji khanji Muyangalilaaji wa numbula seenyu.