Ibalula kwa
Vahebulaniya
Imola yina yilongola
Ilitaafili ili lisimanyikha kiija yu naani wáyandikhaga. Leelo shiyooli yimanyikha kiija wáali muhuvililaaji wa Yeesu, muyimililaaji, yuna akhandi nu wutawulilwa mu fipuga fya vahuvililaaji, pa luhaavi luna uPawulo wáali ikifiyandishilaga ifipuga fya vahuvililaaji. Ilitaafili ili lyayandikhwagwa kwa Vayahuudi vamonga vina vakhandi vahuvililaaji va Yeesu, leelo vakhandi viijelwa kilekha kimuhuviilila uYeesu.
Ilitaafili ili likimuwonensa uYeesu shina ashwali kwa vahuvililaaji vaakwe woona. Iwonensa kiija uYeesu Lusawo lwa Nguluvi, khanji umwene mukhome kishila avamalayikha vina aVayahuudi vikivatiila. UYeesu, mukhome kivashila avakuwamalago ava Lufingo uLukuulu, khanji mukhome kimushila uMusa, yuna akhandi avapeelile aVayahuudi indaji isa Nguluvi. Khanji umuyandikhaaji ilogola kiija, uYeesu mukhome kivashila avatambule va Vayahuudi, kwa kiiva asinagahaje uwunansi, wáhumyaga uwuumi waakwe wuve sadaakha kwa kiiva ya wunansi wa vaanu woona, kwa luhaavi loona.
Muwudugo wa litaafili ili, itaviilila ulwa vambuya va Vayahuudi (insimo saanave sikwali mu Lufingo uLukuulu), shina woona vakhandi vikimufuunya uNguluvi na kimuhuviilila. Ndeeno ikivakumbusa avahuvililaaji kiija, woope visakulwa kiyitenekha kimuhuviilila uNguluvi, khanji vave vikumbukha gina uYeesu akhandi iigaha na kimanyisa.
| Umulyango | Gina gakwali mu litaafili ili |
| 1:1–4:13 | Umuyandikhaaji iwonensa kiija uYeesu mukhome kivashila avakuwamalago na vamalayikha va Nguluvi |
| 4:14–7:28 | UYeesu mukhome kivashila avatambule vina vakhandi visenga insengo mu nanda imbaagule iya kifuunyila |
| 8:1–10:18 | Imfwa ya Yeesu yaleeta ulufingo ulupya kishila luna uNguluvi wámupeelaga uMusa |
| 10:19–13:19 | Amaswi aga kivajinia avahuvililaaji va Yeesu na kivalogola avaanu ava pawukuulu avanya lihuuvi |
| 13:20-25 | Amaswi aga wudugo |