Kimushendeefya uNguluvi
13
1 Yitenekhaji kiganana yuumwe kwa yuumwe ngaja shina yisakulwa kwa vahuvililaaji.
2 Khanji yitenekhaji kivaposheela avahensa mu nanda seenyu,
kwa kiiva kwa nsila ya kigaha ndeeno,
avaanu vamonga vavasajisaaga avamalayikha va Nguluvi bila kimanya.
3 Vakumbukhaji vala vina vadindiilwe mu shifungo,
na yuumwe muve ngaja mudindiilwe lumo nawo.
Vakumbukhaji vala vina viilava,
na yuumwe muve ngaja mwilava lumo nawo.
4 Inoolana yisakulwa kitiilwa na vaanu woona,
khanji umugoosi nu mudala vahegukhaje uwushemi,
kwa kiiva uNguluvi akhavalafya avaanu woona vina viigaha uwushemi.
5 Musikhaveesaji vapafu va kidobokha ihela,
leelo mukwilanaje ni fiinu fina munafyo.
Kiiva uNguluvi wálogolaga kiija,
“Nisikulekha wala nisikusaamwa kaa.”a
6 Lulwene tikwiliile kilogola bila kitiila kiija,
“UMutwa yumwene yuna ikinitanjilisa one,
nisitiila shoshoona.
Wuli,
umuunu asinigahe shishi?”b
7 Vakumbukhaji avayimililaaji vala vina vakhandi vikivamanyisa iLiswi lya Nguluvi.
Hiivaji insengo saanave sina vakhandi vikisisenga kihuma ulwamwandi,
mbakha kuwudugo wa wiikhasi waanave na kimuhuviilila uNguluvi ngaja aveene shina vamuhuvililaga uNguluvi.
8 UYeesu Kilisito asihambukha.
Umwene ali ngaja shina akhandi ulwamwandi,
uluhaavi ulu mbakha shiluta na shiluta.
9 Musikhagayinatilaji amamanyiso aganji amahensa.
Ulusungu lwa Nguluvi lukitupeela ingufu mu numbula seesu,
leelo indaji sina sikhaana ifyakiilya,
sisikivatanga shoshoona vina vikisiyinatila.
10 UYeesu shadanda sheesu.
Avaanu vina vikiyitenekha kihumya ifyadanda mu liheema lya Vayahuudi,
vasiyiitikhwa kiilya ishadanda shina ose tinasho.
11 Kilingana ni ndaji sa Musa,
umutambule umukhome akhandi itoola idanda ya nkhanu na kihumya aPanofu pa Panofu,
baheene uNguluvi avasaajile avaanu uwunansi waanave.
Leelo inyama sa nkhanu iso,
akhandi itoola na kisinyaanya kunja ya luvala lula.
12 Lulwene kiija,
uYeesu woope wálavaga na kibudwa kunja ya shikwilo ishikhome sha lijumbi ilya Yelusalemu,
c baheene avagahe avaanu vave vabaagule vaakwe kwa nsila ya danda yaakwe.
13 Ndeeno na yuuse timufwataje panja ya shikwilo isho isha lijumbi na kiyijimfilisa kiyegulwa,
ngaja shina woope wáyijimfilisaaga.
14 Tigahaje ndeeno kiiva mu nyi iyi tisiina ilijumbi lina lisigala shiluta na shiluta,
leelo tiheepile kiluta kiyinjila mu lijumbi ilya kushaanya lina liyinsa.
15 Kwa kiiva ya Yeesu,
tiyitenekhaje kimusufya uNguluvi,
kiiva amaswi geesu gikilisufya ilitaawa lyakwe,
ngaja sadaakha yina tikimuhumisa.
16 Yitenekhaji kivatanga avayeenyu na kitanjilisania nawo ifiinu fina munafyo,
kwa kiiva kigaha ndeeno,
yiyeene sadaakha yina yikimushendeefya uNguluvi.
17 Vatiilaji avayimililaaji veenyu na kiyinatila gina vikivalajisa,
kwa kiiva lulwene luna vikiyitenekha kivasunga omwe bila kikhatala.
Aveene vasitaviilile insengo saanave pa Nguluvi.
Ndeeno vatiilaji,
baheene vave visenga insengo yaanave kwa wushendeefu.
Kiiva nda musikivatiila,
vasiive visenga insengo kwa kisugumilwa,
insengo yaanave iyo yisiiva yikivatanga omwe shoshoona.
18 Yitenekhaji kitufuunyila.
Tina shiyooli kiija,
inumbula seesu sisikituhiga lyolyona kwa kiiva,
tijimba kisenga gina ga wugolofu kwa vaanu woona.
19 Nilomba munifunyilaje kwa Nguluvi,
baheene anitinie nyangu kunyeenyu.
Amaswi aga wudugo
20 UNguluvi yuna ikitupeela uwulindamafu,
yuna wámufyusaaga uMutwa weesu uYeesu,
uMudimaaji uMukhome wa nkholo,
kwa kiiva wákunulaga idanda yaakwe yina yiijinia ulufingo lwa shiluta na shiluta,
21 umwene ayiteneshe kivapeela ingufu isa kisenga insengo soona,
sina isakula musisenje.
Khanji agahe mu numbula seenyu gina gikimushendeefya,
kwa nsila ya Yeesu Kilisito.
Umwene atupikhwe shiluta na shiluta!
Amina.
22 Omwe vahuvililaaji vayangu,
nikivalomba mandu mugayinatile amaswi ga kivakhangasa inumbula,
gina navayandishila kwa wufupi mu balula iyi.
23 Nisakula mumanye kiija,
umuhuvililaaji muyeesu uTimoteo,
wádindulilwa mu shifungo.
Nda ayinse nyangu panu pina nikwali,
nikhayinsa nawo kunyeenyu,
baheene tivahunjile.