UMutambule uMukhome uwa Lufingo uLupya
8
1 Imola inkhome mu goona ago yiyeene iyi,
ose tinawo uMutambule uMukhome uwa shihwano isho,
yuna akheele ulubali lwa liwokho ilya kundiilo pa shitengo sha shitwa sha Nguluvi uMunya Wutupikho kushaanya,
mu luvala ulwa lishima ilikhome mandu.
2 Ukho ikimusenjela uNguluvi pa luvala ulubaagule,
lulwene kiija mukhati mu liheema ilya shiyooli,
lina lisenjiilwe nu mwene uMutwa uNguluvi,
lisisenjiilwe na vaanu.
3 UNguluvi iiva amubagwile umutambule umukhome,
baheene ave iihumya isadaakha ni shadanda,
shiisho ndeeno uMutambule weesu uMukhome uyo,
isakulwa woope ave nasho ishiinu sha kihumya kwa Nguluvi.
4 Nda uYeesu waali ayiteneshe kikhala mu nyi iyi,
ndi asaava mutambule hata padoodo,
kwa kiiva mu nyi iyi,
vakwali avatambule vina viihumya isadaakha kilingana ni ndaji sa Musa.
5 Gala gina avatambule awo viigaha mu liheema,
shihwano hela sha gala aga shiyooli gina gali kushaanya kwa Nguluvi.
Lulwene uMusa pina wáyipinyangaga kisenga iliheema ilya kimufuunyila uNguluvi,
a uNguluvi wámujovelaga kiija,
“Tenda shila shiinu kilingana na goona gina nakusonelaga ku shidunda shila isha Sinayi.”b
6 Leelo uNguluvi amupeelile uYeesu insengo iya shitambule yina nofu mandu kishila yila iya vatambule ava palwamwandi.
UYeesu yumwene yuna ikivalingaania avaanu nu Nguluvi mu lufingo luna lunofu,
kulikho ulufingo ulukuulu luna aveene vakhandi vikulusenjela.
Khanji ulufingo ulo lusenjiilwe pashaanya ya lutaahiso ulunofu mandu,
kulikho ulutaahiso lula ulwa Lufingo uLukuulu.
7 Nda ulufingo ulwa wutasi lwali luve lukwilene,
ino uNguluvi nda asafinga ulufingo ulwa wuvili.
8 Leelo uNguluvi wáganaga kiwaaga uwunansi wa vaanu vaakwe,
wálogolaga kiija,
“Puliisi,
uluhaavi luyinsa,
luna nikhafinga ulufingo ulupya
na vaanu va Isilaheli na vaanu va Yuuda.
9 Ulufingo ulupya ulu lusikhava ngaja lula ulwa apo palwamwandi,
luna nafingaga na vambuyaanave,
uluhaavi lula luna nikhandi nivakhatiliile amawokho kivalongosa wunofu kihuma mu nyi ya Misili.
Aveene vasikhandi viyinatila ulufingo lwangu.
Ili lilyene lina lyanigahaga nivaleshe ngaja shina vashwali.
10 Ulu lulwene lufingo lupya
luna nikhalufinga na Vaisilaheli insiku sina siyinsa.
Nikhasiviikha indaji sangu mu luhala lwanave,
nikhasiyandikha mu numbula saanave.
One nikhava Nguluvi waanave,
woope vakhava vaanu vangu.
11 Akwasiina umuunu yoyoona yuna akhava ikimumanyisa umuyine,
awu kimujova ulukholo lwakwe kiija,
‘Umumanye uMutwa uNguluvi.’
Shila muunu akhanimanya one,
kiyansa avanangʼana mbakha avakhome.
12 Kiiva,
nikhavasaajila uwunansi waanave,
nisikhawukumbukha khanji uwunansi waanave.”c
13 UNguluvi pina ilogola kiija ulufingo ulu “lupya,”
iwonensa kiija ulufingo ulwa wutasi lusakheele.
Ino ishiinu shoshoona shina shiveele shikuulu khanji shisakheele,
shingaya nsengo yoyoona,
shili nkholeela kiyaga.