Vahebulaniya 7

Uwutambule wa Melikisedeki

1 UMelikisedeki uyo akhandi mutwa wa lijumbi ilya Salemu. Khanji akhandi mutambule wa Nguluvi uMukhome. UMelikisedeki wátangaanaga nu Abulahamu yuna wáhumile ku wulugu pina avamenile avatwa vana. Baheene uMelikisedeki wámuyimiilila uAbulahamu. 2 Woope uAbulahamu wáhumyaga lifungu limo kihuma mu mafungu ishumi mu fiinu fyona fina vafigalulaga kihuma ku wulugu na kimupeela uMelikisedeki. Ilitaawa lya Melikisedeki, uluganulo lwakwe, mutwa munya shiyooli, khanji mutwa wa ku Salemu, uluganulo lwakwe, mutwa wa wulindamafu. 3 Yiwonekha kiija avasafi va Melikisedeki vasimanyikha, ishikholo shaakwe shisimanyikha, kisawa na kiifwa kwakwe kusimanyikha. Umwene mutambule wa shiluta na shiluta ngaja uLusawo lwa Nguluvi.

4 Loleela shina uMelikisedeki akhandi mukhome! Hata umbuyeesu uAbulahamu wámupeelile ilifungu limo kihuma mu mafungu ishumi mu fiinu fina wáfigalulaga kihuma ku wulugu. 5 Kilingana ni ndaji sa Musa, avaanu woona kihuma mu shisafi sha Valaawi avatambule, visakulwa kiposheela ilifungu limo kihuma mu mafungu ishumi, ga fiinu fya Vaisilaheli vayaanave. Visakulwa kigaha ndeeno, hata yive woona viihuma kwa mbuyaanave yumo uAbulahamu. 6 Hata nda uMelikisedeki asikhahumile mu shisafi sha Valaawi, hata ndeeno wáposheelaga ilifungu limo kihuma mu mafungu ishumi kwa Abulahamu. UMelikisedeki wámuyimiilila uAbulahamu, umuunu yuna uNguluvi wátahisaaga kimuyimiilila. 7 Shila muunu iimanya ishiyooli kiija, umuunu yuna ikimuyimiilila uyunji, mukhome kishila yula yuna iyimiililwa. 8 Khanji avatambule awo kihuma mu shisafi sha Valaawi vina viposheela ilifungu limo kihuma mu mafungu ishumi, awo vaanu vina viifwa. Leelo uMelikisedeki yuna wáposheelaga ilifungu limo kihuma mu mafungu ishumi fina fyahumaga kwa Abulahamu, ilogolwa kiija, muumi mbakha iminsiyaano. 9 Ndeeno tikwiliile kilogola kiija, hata uLaawi yuna avaanu va shisafi shaakwe viposheela ilifungu limo kihuma mu mafungu ishumi mu fiinu fya vaanu, woope wáhumyaga ilifungu lyakwe limo, kishilila kwa Abulahamu. 10 Hata nda uLaawi akhandi asinaasawe, hata ndeeno akhandi akwali mu muvili gwa mbuye uAbulahamu pina itangaana nu Melikisedeki.

Uwutambule wa Yeesu nu wa Valaawi

11 Hata nda uwutambule wa Valaawi wukhandi wifwata indaji sa Musa, hata ndeeno uwutambule uwo wusikhakhamiliishe. Kwa kiiva ya ilyo, yikhandi yisakulwa uwutambule uwunji ngaja uwa Melikisedeki wuna wusili ngaja uwa Haluni. 12 Nda yive uwutambule wiseetukha, hata indaji soope siseetukha. 13 Umutambule uyo umupya yuna ilogolwa apa, yu Mutwa weesu uYeesu yuna asikhandi Mulaawi. Akhandi akwasiina umuunu yoyoona kihuma mu shisafi shaakwe yuna akhandi iigaha insengo ya wutambule. 14 Yimanyiishe kiija, umwene uMutwa weesu, wáhumile mu shisafi sha Yuuda, khanji uMusa pina ilogola ulwa vatambule, asikhalogwele ulwa shisafi isho.

15 Imola iso sina nikisilogola sili bahawuvalafu mandu, kwa kiiva umutambule uyunji yuna ali ngaja uMelikisedeki wáwonekha. 16 Umwene asikhandi mutambule kwa kikwisa indaji yina yiijova, avatambule vahume mu shisafi sha Laawi hela, leelo akhandi mutambule kwa ngufu isa wuumi waakwe wuna wungaya wudugo. 17 Ngaja shina yiyandiikhwe mu Mayandikhwa aManofu kiija,

“Owe yuuwe mutambule shiluta na shiluta,

ngaja shina akhandi uMelikisedeki.”

18 Ndeeno, uNguluvi wáwusaaga indaji yila iya pashiyanso kwa kiiva yisikhandi ni ngufu, khanji yisikhandi ni nsengo yoyoona. 19 Indaji iyo yisikhandi yikwiliile kikwisa shoshoona, ndeeno uNguluvi atupeelile uluhuviililo ulunji luna lunofu mandu, luna lukituviikha kiiva nkholeela nawo.

20 Uluhaavi luna aValaawi vakhandi viviikhwa kiiva vatambule, uNguluvi asikhayiyiijile shoshoona kunyaanave. Leelo uluhaavi uNguluvi amuviishile uYeesu kiiva Mutambule, wáyiyiigaga, 21 ngaja shina yiyandiikhwe mu Mayandikhwa aManofu kiija,

“UMutwa ayiyiijile,

khanji asiseetula amahiiva gaakwe kaa, iijova,

‘Owe yuuwe mutambule shiluta na shiluta.’ ”

22 Ndeeno kwa kiiva ya kiyiyiiga ukho, uYeesu muyimililaaji wa lufingo luna lunofu mandu kishila lula ulwa palwamwandi.

23 Mu luhaavi lwa Lufingo uLukuulu, avatambule vakhandi vinshi. Vasikhayiteneeshe kisenga insengo saanave kwa kiiva vakhandi viifwa. 24 Leelo uYeesu Mutambule shiluta na shiluta kwa kiiva umwene muumi shiluta na shiluta. 25 Kwa kiiva ya ilyo, umwene akwiliile kivakulusa khabisa avaanu woona vina viiluta kwa Nguluvi kishilila kunyaakwe. Umwene ikivafuunyila kwa Nguluvi luhaavi loona, kwa kiiva muumi shiluta na shiluta.

26 UMutambule uMukhome uwa shihwano isho, yumwene yuna isakulwa mandu kunyeesu kwa kiiva umwene munofu, mugolofu, khanji asikhagahile uwunansi wowoona. UNguluvi wámubagulaniaga na vanansi, wámutaania kiluta kunyaakwe kushaanya. 27 Avatambule avakhome vakhandi visakulwa kihumya ishadanda kwa kiiva ya wunansi waanave. Pina vagahile ndeeno, vakhandi viihumya ifyadanda ifinji kwa kiiva ya wunansi wa vaanu avanji. Khanji vakhandi viigaha ndeeno wiila. Leelo uYeesu asikhagahile ngaja avatambule avakhome awo. Umwene wáyihumyaga kiifwa pa musalaaba gwalimo hela kwa luhaavi loona, kwa kiiva ya wunansi wa vaanu woona. 28 Kilingana ni ndaji sa Musa, avaanu vakhandi viviikhwa kiiva vatambule hata nda vakhandi vipungania mu njowo nyinshi. Leelo lwaganile kishila luhaavi lutali, uNguluvi kwa nsila ya kiyiyiiga wámuviishile uLusawo lwakwe, kiiva Mutambule Mukhome yuna akhamiliishe shiluta na shiluta.