6
1 Ino,
tisikhayitenekhaga kisigala kwa gala gina tayimanyisaaga ulwa Kilisito kihuma ulwamwandi,
ila tijimbaje kiyimanyisa,
baheene tive vavanda vina vajinile mu lihuuvi.
Tisikhawuyiilaga khanji kisenga uluutu lwa mamanyiso ga kilambiisila injendo sila sina sipinsa imfwa na mamanyiso aga kimuhuviilila uNguluvi.
2 Tisikhaveesaga tiwuyiilila kimanyisa amamanyiso ga wutwiniaji,
aga kivaviishila amawokho avaanu,
aga kifyukha kwa vina vafwile na ga wuhigo uwa wudugo wa nyi.
3 Nda uNguluvi agane,
tisiyiteneshe kikula na kikhangala mu lihuuvi kwa nsila iyo.
4 Kiiva avaanu vina valeshile kimuhuviilila uNguluvi,
tikwiliile kivagomosa wuli?
Ulwamwandi vamanyisiwaagwa ishiyooli sha Nguluvi,
vapelwagwa ifipeelwa ifya kihuma kwa Nguluvi,
vakhandi vahanjile nu Numbula uMunofu.
5 Khanji vawuwonjaga uwunofu wa Liswi lya Nguluvi ni ngufu sa wulongosi uwupya uwa Nguluvi,
pina akhava ilongosa inyi imya.
6 Leelo valileshile ilihuuvi lyanave!
Kusiina insila yoyoona iya kivagomosa kiija vaseetushe khanji,
kwa kiiva vikimukhomeelela pa musalaaba ulwa wuvili uLusawo lwa Nguluvi,
na kimuyegula bahawuvalafu.
7 Umugunda guna guposheela inoonya mala nyinshi na kilemfya imbeyu sina sikimupeela ulutono umulimaaji,
umugunda ugo guyimiliilwe nu Nguluvi.
8 Leelo umugunda guna gulemfya amimfwa na magugu,
gusikimutanjilisa shoshoona umulimaaji,
uNguluvi ikiguyiijila.
Kuwudugo,
gunyaanywa mu mooto.
9 Omwe vagani vangu,
hata nda navayandishila kwa maswi makhali,
hata ndeeno one nina shiyooli kiija mwisenga amanofu gina giwonensa kiija mukulusiiwe.
10 UNguluvi umunya shiyooli,
asikwiliile kisaamwa insengo inofu yina mwamusenjelaga.
Khanji asikwiliile kisaamwa ulugano lula luna mwamuwonensaaga kwa nsila ya kivatanga avahuvililaaji avayeenyu,
kihuma ulwamwandi mbakha lino.
11 Nina lihaahi mandu kiija,
shila muunu ajimbaje kigaha shiisho mbakha kuwudugo,
baheene mugayanushile goona gala gina mugahuviliile kiija,
mukhagapata.
12 Musikhaveesaga woolo,
leelo fwatanisaaji vala vina kwa nsila ya kihuviilila na kiyijimfilisa,
vaposheelile gala gina uNguluvi wátahisaaga kivapeela aveene.
Gala gina uNguluvi agatahiise ga shiyooli
13 Ino,
ulwamwandi pina uNguluvi wátahisaaga kwa Abulahamu,
wáyiyiigaga kwa litaawa lyakwe yumwene,
kwa kiiva akhandi akwasiina yoyoona yuna akhandi mukhome kimushila umwene.
14 UNguluvi wáyiyiigaga kwa Abulahamu wáajova,
“Shiyooli nikiyiyiiga kiija,
nisikuyimiilile na nisikuyoolose ishisafi shaakho shisiive shikhome.”a
15 Ndeeno uAbulahamu wáhepelesaaga na kiyijimfilisa na wáapata gala goona gina uNguluvi wátahisaaga kunyaakwe.
16 Nda avaanu vikiyiyiiga,
vikiyiyiiga kwa litaawa lya yula yuna mukhome kulikho aveene,
khanji kiyiyiiga ukho kuwonensa kiija,
gala goona gina vikigalogola,
ga shiyooli.
Kigaha ndeeno,
kukwene kimala ulukhaananio.
17 Woope uNguluvi wákhangasaaga ulutaahiso lwakwe kwa kiyiyiiga.
Kigaha ndeeno,
wávawonensa bahawuvalafu vala vina wávatahisisaaga kiija,
asikhaseetula ulugulumilo lwakwe.
18 UNguluvi wátahisaaga na kiyiyiiga.
Amaswi gavili ago gasiseetukha kaa,
kwa kiiva umwene asili mudehi.
Kwa kiiva ya ilyo,
ose vina tisijiile kunyaakwe,
tikhangasiiwe inumbula tive nu luhuviililo kwa gala gina giyinsa pamwandi yeesu.
19 Uluhuviililo ulo luna tinalo mu numbula seesu,
lukitupinsa kiyiima wunofu ngaja shiinu isha shuuma ishifuno,
shina shiyiimya ishipugo.
Uluhuviililo ulo yu Yeesu yuna wátalaga kiyinjila aPanofu pa Panofub kwa Nguluvi kishilila pa mwenda.
20 UYeesu wátalaga kiyinjila mu luvala ulo,
kwa kiiva ya kunyeesu.
Woope wáava Mutambule Mukhome shiluta na shiluta,
ngaja shina akhandi uMelikisedeki.