Vahebulaniya 9

Ulugoto ulwa Lufingo uLukuulu

1 Ulufingo ulukuulu lukhandi nu lugoto luna avaanu vakhandi vikiluyinatila pina vikimufuunya uNguluvi. Khanji ulufingo ulo lukhandi nu luvala ulubaagule ulwa kimufuunya uNguluvi mu nyi iyi. 2 Pasengwagwa iliheema ilya kimufuunyila uNguluvi. Iliheema ilyo likhandi lina fyumba fivili. Ishumba sha wutasi shikhandi shina nsimbili ya lumuli ni meesa ya kiviikha amakhaate pa Nguluvi, ishumba ishi vashitambulaga Panofu. 3 Mu liheema ilyo, mukhandi nu mwenda umukhome guna gukhandi gubagulania ishumba sha wutasi ni sha wuvili. Ishumba sha wuvili, vashitambulaga Panofu pa Panofu. 4 Mu shumba isho isha wuvili, mukhandi nu luvala luna lupashiilwe isahaabu apa kitinshilisisa ingaagulwa sina sinunshilila. Khanji yikhandi yikwali isandikho iya Nguluvi, iya lufingo yina yipashiilwe isahaabu imbali soona. Mu sandikho iyo, mukhandi ni shigaana sha sahaabu shina shikhandi ni mana nu lukwegu lwa Haluni luna lwalembulaga. Khanji mu sandikho iyo mukhandi ni mbawo sivili sa mangʼanga, sina sikhayandiikhwe indaji ishumi isa lufingo. 5 Pashaanya ya sandikho iyo sikhandi sikwali isanaamu isa fiwumbwa fivili fina fikhandi fiwonensa kiija Nguluvi akwali apo. Ifiwumbwa ifyo fikhandi na mapapanikho, gina gagubiishe uluvala ulwa pashaanya ya sandikho. Uluvala ulo lulwene luna umutambule akhandi isansa idanda, kwa kiiva ya kisaajilwa avaanu uwunansi waanave. Leelo uluhaavi ulu lusili lwa kitaviilila shila shiinu kwa wunofu.

6 Shiisho ndeeno ifiinu ifi mu liheema ilya kifuunyila fikhandi fipanjiilwe. Mu shumba shila isha wutasi, avatambule vayinjilaga wiila kisenga insengo yaanave iya kimufuunya uNguluvi. 7 Leelo mu shumba shila isha wuvili, umutambule umukhome mwene duguli hela, yumwene akhandi itawulwa kiyinjila, woope akhandi iyinjila gwalimo hela kwa mwakha. Khanji wásakulwagwa kiyinjila ni danda ya nkhanu, yina vashinjile na kihumya kwa Nguluvi, kwa kiiva ya kisaajilwa uwunansi waakwe nu wunansi wa vaanu avanji, wuna vakhandi vagahile bila kimanya. 8 Kilingana nu lugoto loona ulo, uNumbula uMunofu ikituwonensa kiija, pina iliheema lila ilya wutasi nu lugoto lwakwe lipisenga insengo, insila ya kiyinjila aPanofu pa Panofu yisinadindulwe kwa vaanu woona.

9 Insengo soona sina sikhandi sisenjekha ku liheema lila, isho shihwano sha luhaavi ulu. Kiiva ifyadanda fina viihumya kwa Nguluvi, fisikwiliile kivalasa inumbula sa vaanu vina viihumya ifyadanda ifyo. 10 Kiiva, ulugoto ulo lukhandi lwa mavili hela, ngaja ifyakiilya, ifyakiingʼwa na kiyivalasa umuvili. Goona ago gasilaga pina uNguluvi wáleetaga ulugoto ulupya.

UYeesu shadanda shina shikhamiliishe

11 UKilisito wáyinsa, baheene ave Mutambule Mukhome wa lugoto ulupya luna lwatuleetela injowo soona inofu. Yumwene yuna isenga insengo mu liheema ilinji lina linofu, khanji likhamiliishe kishila lila ilya wutasi. Iliheema ilyo lisikhasenjiilwe na vaanu, uluganulo lwakwe kiija liheema lina lisili lya mu nyi iyi. 12 Umwene wáyinjilaga aPanofu pa Panofu gwalimo hela, kwa luhaavi loona. Asikhayinjiile ni danda ya mene awu ya gida ingoyo, leelo wáyinjilaga ni danda yaakwe yumwene, baheene tikulusiwe shiluta na shiluta. 13 Kilingana ni ndaji sa Musa, avatambule vakhandi visansila idanda ya mene ni ya gida ingoyo na mafuliikho ga ngwada kwa vaanu vina vashaafu, baheene vavalasiwe amavili gaanave. 14 Leelo idanda ya Kilisito, yiishila idanda ya nkhanu iso! Kwa nsila ya Numbula wa shiluta na shiluta, umwene wáyihumyaga kwa Nguluvi kiiva shadanda, shina shisipiikhwa. Idanda yaakwe yiyeene yina yikituvalasa inumbula seesu mu wunansi wuna wupinsa imfwa, baheene timusenjele uNguluvi yuna muumi.

15 Kwa kiiva ya ilyo, uYeesu yumwene yuna ikivalingaania avaanu nu Nguluvi mu lufingo ulupya, baheene avaanu vina uNguluvi avashemeelile, vapate uwuumi wa shiluta na shiluta avaanu vina wátahisaaga kivapeela. Aga gakwiliile kisenjekha ndeeno kwa kiiva uYeesu wáfwisaga, baheene avakuluse avaanu kihuma mu wunansi wuna vakhandi viigaha mu luhaavi ulwa Lufingo uLukuulu.

16-17 Nda umuunu ayandiishe wuhaasi uwa kihaala ifiinu fyakwe, indaji yaakwe iyo yisenga insengo nda kuna wulunjikhaaji kiija, umuunu uyo afwile. Leelo yisisenga insengo nda umuunu uyo ashaanali muumi. 18 Lulwene hata ulufingo lula ulukuulu lusikhandi ni ngufu, nda vasikunwile idanda ya nkhanu.

19 UMusa wáganaga kimala kiyalaalisa indaji soona sa Nguluvi pa vaanu woona, wátoolaga idanda ya gida ingoyo ni ya mene, wáhansa na malenga. UMusa wátoolaga uwaaji wa nkholo, wuna wapinywagwa mu linsamba lya mupishi guna gwatambulwagwa hisopo, baheene wásansila idanda iyo mu litaafili lya ndaji na kwa vaanu woona. 20 Baheene uMusa wávajovela avaanu woona wáaja, “Iyi danda yina yiijinia ulufingo lwa Nguluvi luna avalajiise kiija, mulufwataje.” 21 Shiisho ndeeno, uMusa wásansilaga idanda mu liheema ni fiinu fyona fina vakhandi vikifisenjela pina vikimufuunya uNguluvi. 22 Kilingana ni ndaji sa Musa, idanda yiyeene yina yivalasa shila shiinu ndeeni. Nda idanda yisikunwishe, avaanu vasikwiliile kisaajilwa uwunansi waanave.

Kiyihumya kwa Kilisito

23 Iliheema ilya kifuunyila ni fiinu fyona fina avatambule vakhandi vikifisenjela kimufuunya uNguluvi, fikhandi shihwano sha fiinu fina fikwali kushaanya. Iliheema ni fiinu ifyo fikhandi fivalasiwa kwa nsila ya danda ya nkhanu, leelo ifiinu fya kushaanya fisakulwa kivalasiwa ni shadanda shina shinofu kishila idanda iyo iya nkhanu. 24 UKilisito asikhayinjiile aPanofu pa Panofu pina pasenjiilwe na vaanu, apo shihwano hela isha luvala lwa shiyooli luna luli kwa Nguluvi. Ila wáyinjilaga aPanofu pa Panofu kwa Nguluvi, pina uluhaavi ulu ikitufuunyila pa Nguluvi. 25 Umutambule umukhome wa Vayahuudi akhandi iyinjila Panofu pa Panofu shila mwakha ni danda ya nkhanu. Leelo uKilisito asikhayinjiile kiyihumya mala nyinshi. Umwene wáyihumyaga kiiva shadanda, gwalimo hela. 26 Nda uKilisito wásakulwagwa kiyihumya mala nyinshi kiiva shadanda ngaja shina umutambule umukhome akhandi iihumya ishadanda mala nyinshi, ino ndi wáava isakulwa kilava mala nyinshi kihuma pina uNguluvi wáwumbile inyi yoona. Leelo umwene mu nsiku isi isa wudugo, wáyinsile na kiyihumya ave shadanda gwalimo hela, baheene awuwuuse uwunansi weesu. 27 Ngaja shina avaanu viifwa gwalimo hela, pina vaafwa, uNguluvi ikivahiga, 28 shiisho ndeeno uNguluvi wámuhumyaga uKilisito ave shadanda gwalimo hela, baheene uNguluvi avawuusise avaanu vinshi uwunansi waanave. Khanji uKilisito akhayinsa ulwa wuvili. Asikhayinsa kiija uNguluvi avawusiise avaanu uwunansi, leelo akhayinsa kivapeela uwukulukho avaanu vina vikimuheepa kwa ludali.