Ibalula ya Pawulo kwa
Filimoni
UPawulo ikimuhunjila uFilimoni
1
1 Ibalula iyi yihumile kunyangu one Pawulo,
yuna nidindiilwe kwa kiiva ya kikhoma imola sa Kilisitoa Yeesu.
Nikikuyandishila owe Filimoni.
One nu muhuvililaaji muyeesu uTimoteo,
tikikuhunjila owe mugani weesu nu muvanda muyeesu.
2 Tikimuhunjila nayu wulumbu weesu uAfiya nu musulukhali muyeesu uAlikipo,
muyeesu mu nsengo ya Nguluvi,
na vahuvililaaji va Yeesu vina vikungaana mu nanda yaakho.
3 Imota nu wulindamafu kihuma kwa Nguluvi uWiheesu nu Mutwa uYeesu Kilisito,
five lumo noomwe.
Ulugano ni lihuuvi lya Filimoni
4 Wiila pina nikikufuunyila,
nikimuhonjesa uNguluvi wangu,
5 kiiva nipulikha imola ya lihuuvi lyakho kwa Mutwa uYeesu,
nu lugano lwakho kwa vahuvililaaji va Yeesu.
6 Nikimufuunya uNguluvi kiija,
ilihuuvi lina uhanjile lumo na vanji,
likugahe umanye mandu imota soona sina tinaso kwa kilungana nu Kilisito.
7 Lukholo lwangu,
ulugano lwakho lunipeelile uwushendeefu wukhome na kinijinia,
kiiva wasiyishilisa inumbula sa vahuvililaaji va Yeesu.
UPawulo ikimulomba uFilimoni amusaajile uOnesimo
8 Lino,
kwa kiiva ya wutawulilwa wuna napelwagwa nu Kilisito,
naali nikwiliile kikulajisa shina wisakulwa kisenga,
leelo nisiigaha ndeeno.
9 Kiiva ya lugano,
one yuune Pawulo yuna nigosiipe,
nidindiilwe mu shifungo kwa kiiva ya Kilisito Yeesu,
10 one nikikulomba ulwa muswamu wangu uOnesimo.
b Uyu ngaja muswamu wangu,
kiiva namutanjilisa umwene kimuhuviilila uYeesu Kilisito uluhaavi pina nikwali mu shifungo.
11 Uyu,
pina wákusijile,
asikhandi shiinu kunyaakho,
lino uyu lutango kunyangu na kunyaakho.
12 Nikimutinia kunyaakho,
uyu yumwene nimugeene kwa numbula yangu yoona.
13 Khanji,
nikhandi nidobokha akhale noone ave ikinisunga,
baheene apyanile panyaakho anitanjilise,
pina nili mu shifungo kwa kiiva ya Mola iNofu.
14 Leelo lino naawona lusili lunofu kisenga lyolyona lina usigeene owe,
awu kikukhamiilisa kiija uOnesimo anitanjilise.
One nisakula usenje shina widobokha owe.
15 Pamonga lulwene wálekhanaga noowe kwa luhaavi lufupi,
baheene kuunyuma ave noowe nsiku soona,
16 kihuma lino asili muvanda hela,
leelo kishila umuvanda,
uyo lukholo umugani.
One nimugeene mandu,
owe usimugane kishila,
ngaja lukholo,
khanji muhuvililaaji muyeesu.
17 Lino,
nda unimeenye one kiija nili muyaago,
umuyanushilaje uyo ngaja shina ndi waniyanushila one.
18 Nda akunanjiile,
awu ana mukhole kunyaakho,
nisikuhombe one.
19 One ni Pawulo,
nayandikha kwa liwokho lyangu yuune,
one nisikuhombe.
Khanji owe umeenye kiija nikikudaayi uwuumi waakho kwa kiiva nakujovelaga iMola iNofu ya Yeesu Kilisito,
baheene wakulusiwaagwa.
20 Lino,
lukholo lwangu,
unisenjele ulu kwa kiiva ya Mutwa.
c Uyishilise inumbula yangu ngaja shina yisakulwa kwa muhuvililaaji wa Kilisito.
21 Niyandikha aga,
kwa kiiva nimeenye kiija usiyinatile,
khanji usiigahe kishila gina naajova.
22 Lumo na aga,
uninosese inanda ya kifishila,
kiiva niyihuviliile kiija mu mafuunyo geenyu,
uNguluvi asinitanje niyinse kunyeenyu.
Inyunjila iya wudugo