Ulujendo luna lufwaya kwa vahuvililaaji va Yeesu
5
1 Lino muveesaje mufwatanisa shina iigaha uNguluvi,
kwa kiiva omwe muli vanaakwe vina avageene mandu.
2 Vaganaji avaanu luhaavi loona,
ngaja shina uKilisito atuganile na kiifwa kwa kiiva yeesu.
Wáyihumyaga ngaja shadanda sha mununsi munofu guna gukimushendeefya uNguluvi.
3 Lino omwe musikhasengaji injowo sina sihonsa avaanu vavajove kiija,
muli vashemi,
vaafu na vapafu va fiinu,
kwa kiiva injendo iso sisisakulwa kwa vagolofu va Nguluvi.
4 Khanji musikhalogolaji injowo isa nsoni ni sa wuyasu awu isa wuyegufu.
Leelo mumuhonjesaaje uNguluvi luhaavi loona.
5 Yisakulwa mumanye kiija,
umushemi,
umwafu yuna ijenda na vadala va kunja nu mupafu uwa fiinu,
vasikhahaala uWutwa wa Kilisito nu Nguluvi.
a Umuunu umupafu wa fiinu,
uyo muunu yuna ifuunya amanguluvi.
6 Musikhayitikhaji umuunu yoyoona kivalulungania kwa njowo isa hofyo,
kwa kiiva inkhalasi ya Nguluvi yivayinsiile avaanu woona vina vasikimutiila.
7 Baheene lino,
musikhahangaji na vaanu vina viigaha ago.
Uwiikhasi wa vahuvililaaji va Kilisito wuve ngaja wuvalafu
8 Ulwamwandi omwe mukhandi mu nshiisi,
leelo kihuma pina mwalunganisiwaagwa nu Mutwa uYeesu,
mukhandi mu wuvalafu.
Baheene lino muve mwikhala ngaja avaanu vina vali mu wuvalafu.
9 Nilogola ndeeno,
kwa kiiva avaanu vina vali mu wuvalafu,
viigaha amanofu,
amagolofu na ga shiyooli,
uluhaavi loona.
10 Sakulaji kisenga gina gikimushendeefya uMutwa uNguluvi.
11 Musikhahangaji na vaanu vina viigaha injowo sa nshiisi,
sina sisifwaya.
Leelo ago mugakhajilaje.
12 Shiyooli,
usikwiliile hata kigalogola ago gina avaanu awo vikigasenga kwa wufiho,
kwa kiiva ga nsoni.
13 Leelo nda gave mu wuvalafu,
giwonekha shina gashwali,
kiiva uwuvalafu wusigamulishe.
14 Uwuvalafu wuweene wuna wiigaha ifiinu fiwoneshe.
Aga gageene gikivaviikha avayandikhaaji va njeyemo kiija ndeeni,
“Lamukha owe muunu yuna ugoneleele utulo!
Fyukha owe muunu yuna ufwile.
Baheene uKilisito woope,
asikumulishe.”
15 Baheene lino,
muyiyangalilaje mu wiikhasi weenyu,
musikhaveesaji ngaja vayasu,
leelo ngaja vanya wumanyi.
16 Sengaji amanofu luhaavi loona,
kwa kiiva insiku isi mbi.
17 Musikhaveesaji vayasu,
leelo sakulaji kigaha gina uMutwa uYeesu idobokha mugasengaje.
18 Khanji musikhagaalaji,
kwa kiiva uwugaasi wunanga uwiikhasi wa muunu.
Leelo mwisakulwa mumemesewaajwe uNumbula wa Nguluvi.
19 Baheene muve muyeyemelelana kwa numbula seenyu,
injeyemo sa sabuli,
kwa njeyemo isa kimutupikha uMutwa.
20 Muve mukimuhonjesa uNguluvi uWiheesu mu goona kwa luhaavi loona,
kwa litaawa lya Mutwa weesu uYeesu Kilisito.
Uwiikhasi wuna wisakulwa kwa mugoosi nu mudala waakwe
21 Muve mutiilana yuumwe kwa yuumwe,
kwa kiiva mukimutiila Kilisito.
22 Omwe vashimaayi,
vatiilaji avagoosi veenyu,
ngaja shina mukimutiila uMutwa weesu uYeesu.
23 Nilogola ndeeno,
kwa kiiva umugoosi yumwene mutwe gwa mudala waakwe.
Yiiva ngaja uKilisito woope mutwe gwa shipuga sha vahuvililaaji.
Uyo yumwene mukulusaaji wa vahuvililaaji,
vina muvili gwakwe.
24 Baheene lino,
omwe vashimaayi mwisakulwa muvatiilaje avagoosi veenyu mu goona,
ngaja avahuvililaaji shina vikimutiila uKilisito.
25 Na yuumwe vagoosi,
muvaganaje avadala veenyu,
ngaja uKilisito shina wáshiganaga ishipuga shaakwe isha vahuvililaaji,
wáyihumyaga na kiifwa kwa kiiva ya isho.
26 Wáyihumyaga kiifwa,
kiija ashivalase ishipuga sha Nguluvi na malenga ga liswi lyakwe,
shive shigolofu.
27 Wágahaga ndeeno,
baheene ayileetele ishipuga sha vahuvililaaji vina vingʼaala,
vangaya wushaafu wala nkwaji,
hata wuvi wowoona.
28 Shiisho ndeeno avagoosi woope visakulwa kivagana avadala vaanave ngaja shina vikigagana amavili gaanave.
Umugoosi yuna ikimugana umudala waakwe,
uyo iiva ayigeene yumwene.
29 Kusiina umuunu yuna ikigukhalalila umuvili gwakwe,
leelo shila muunu iilya ishakiilya na kiyisunga.
Shiisho ndeeno shilushwali,
uKilisito woope ikishisunga ishipuga sha vahuvililaaji vaakwe,
30 kwa kiiva ose tili ngaja filungo fya mu muvili gwakwe.
31 Ngaja shina giijova aMayandikhwa aManofu kiija,
“Kwa kiiva ya ilyo,
umugoosi akhamulekha uwiihe nu maayi waakwe,
baheene asiikhale nu mudala waakwe,
vavili awo vasiive muvili gumo.”b
32 Amaswi aga,
uluganulo lwakwe lutyejile mandu,
leelo one niijova kiija amaswi aga,
gilogolela ulwa Kilisito ni shipuga sha vahuvililaaji vaakwe.
33 Lino na yuumwe nikivajovela woona kiija,
shila mugoosi amuganaje umudala waakwe ngaja shina ikiyigana yumwene,
khanji nayu mudala woope amutiilaje umugoosi waakwe.