Avahuvililaaji va Yeesu visakulwa kiiva shiinu shimo
4
1 Lino one yuna nidindiilwe mu shifungo kwa kiiva ya kisenga insengo ya Mutwa uYeesu,
nikivalomba mandu muveesaje ni njendo sina silutana nu lushemeelo lwenyu,
luna mushemeliilwe nu Nguluvi.
2 Muyiyisaaje na kiiva vahuugu kwa goona.
Mugugumilanaje na kisajilana kwa lugano.
3 Muveesaje mwijimba kishiyangalila ishipuga sheenyu shina talunganisiwaagwa nu Numbula uMunofu,
kwa kikhala papaamo kwa wulindamafu.
4 Ose woona tilungeene ngaja filungo fya muvili gumo,
khanji tina Numbula uMunofu yumo.
Ndeeno,
tishemeliilwe nu Nguluvi kiiva mu luhuviililo lumo.
5 UMutwa weesu ali yumo,
ilihuuvi limo nu wutwiniaji weesu wuli wumo.
6 Tina Nguluvi yumo,
uyo yumwene Wiheesu woona.
Umwene ikivatema woona,
isenga insengo kwa woona,
khanji akwali mu vaanu vaakwe woona.
7 Leelo munyeesu uKilisito wátuyimililaga shila muunu,
kwa shipeelwa shaakwe,
kilingana shina idobokha umwene kitawula.
8 Lulwene aMayandikhwa aManofu giijova,
“Wáganaga kiluta kushaanya,
wálutaga na vina vagalwilwe vinshi,
wávapeela ulutono avaanu vaakwe.”a
9 Lino amaswi gina giijova,
“Wáganaga kiluta kushaanya,”
uluganulo lwakwe kiija shi?
Lulwene kiija,
pina asinaalute kushaanya kwa Nguluvi,
wáyiikhaga pansi mbakha mu nyi.
10 Umwene yuna wáyiikhaga mu nyi muno mbakha ku wusimu,
yumwene wálutaga kushaanya mandu,
baheene ave akwali shila luvala.
11 UKilisito wávayimililaga avaanu kwa fipeelwa paayo paayo.
Avanji wávabagulaga vave vanandeje,
avanji vave vakuwamalago,
avanji vave vakhomaaji va Mola iNofu,
avanji woope vave vadimaaji,
khanji vamanyisaaji.
12 Wágahaga ndeeno,
baheene avayandaale avahuvililaaji va Nguluvi kisenga insengo yaakwe uNguluvi,
na vahuvililaaji va Yeesu Kilisito vajine mu lihuuvi.
13 Iliswi ilyo,
likhalutiilila mbakha ose woona tikhava vavaamo mu lihuuvi lyesu na kimumanya uLusawo lwa Nguluvi.
Tikhava vaanu vina vakhajina mu lihuuvi,
khanji tikhakwilana ngaja uKilisito yumwene.
14 Baheene tisikhava ngaja vaana,
vina vali ngaja shipugo shina shivevelusiwa kuno na ukho ni lipepo na mavingu.
Lulwene kiija,
avamanyisaaji va wudehi vasikhatujanga kwa wusugu nu wudehi waanave.
15 Leelo tikhafwata ishiyooli kwa lugano,
baheene tikule na kifikha kiiva ngaja uKilisito mu goona.
Umwene kunyeesu ali ngaja mutwe gwa muvili.
16 Inkhole sa muvili,
silungeene ni filungo fyona ifya mu muvili.
Ngaja shina ifilungo fyona fisakulwa kisenga insengo,
shiisho ndeeno nagu muvili goope gwisakulwa kikula na kijina wunofu.
Shilushwali na yuuse woona ndeeno tilungeene kwa Kilisito.
Lino,
woona nda tisenga insengo yina umwene atupeelile,
baheene tikhajina kwa kiganana mandu.
Avavanda va Yeesu visakulwa kiiva ni njendo inofu
17 Lino,
nikivapavila na kivakuviilisa kwa ngufu isa Mutwa uYeesu.
Kiyansa lino,
musikhakhalaji ngaja vaanu vina vasikimuhuviilila uNguluvi,
amahiiva gaanave ga hofyo.
18 Khanji uluhala lwanave luli mu nshiisi,
uluganulo lwakwe vasishimeenye ishiyooli sha Nguluvi.
Avaanu awo vali kutali nu wuumi wuna uNguluvi ikivapeela avaanu vaakwe,
kwa kiiva vasiyimeenye insila yaakwe,
khanji inumbula saanave nyuumu.
19 Avaanu awo,
vangaya nsoni,
insengo yaanave kigaha uwushemi ni njowo inshaafu sina sili paayo paayo.
Vidobokha mandu kigaha ago.
20 Leelo omwe musikhayimanyiise ndeeno ulwa mola isa Kilisito,
21 umwene yuna shiyanso sha shiyooli shoona.
Nimeenye kiija,
mwapulikhaga wunofu imola na mamanyiso gaakwe.
22 Mwamanyisiwaagwa kilekha injendo seenyu imbi,
uwiikhasi weenyu uwa wunansi,
wuna winangwa nu wupafu wuna wukivajanga.
23 Khanji mwamanyisiwaagwa kiija,
uNumbula wa Nguluvi avaseetule amahiiva geenyu gave mapya.
24 Khanji muwuyinatile uwiikhasi weenyu uwupya,
ngaja shina uNguluvi wávawumbaga muhwanane nawo.
Muveesaje vanofu na vagolofu mu shiyooli.
25 Ndeeno muleshe kilogola uwudehi.
Shila muunu isakulwa ave ikimujovela umuyine injowo isa shiyooli,
kiiva woona tili lumo mwa Kilisito ngaja filungo fya muvili gumo.b
26 Pina mukhaleele,
musikhayitikhaji kitemwa ni nkhalasi yeenyu mbakha mugahe uwunansi.
c Khanji musikhaveesaji ni nkhalasi mbakha pina liisota ilijuva.
27 Musikhamupeelaji uShetaani imwenshe mu wiikhasi weenyu.
28 Umuhiiji asikhahiijaga khanji,
leelo asengaje insengo kwa mawokho gaakwe yumwene,
baheene ave iipata ifiinu ifya kimutanga umwene na kivagavila avanji vina vashepushiilwe.
29 Musikhalogolaji injowo imbi,
leelo mulogolaje injowo inofu sina sikivajinia avayeenyu ngaja shina yisakulwa,
baheene vina vipuliisa vave viipata ulutono.
30 Musikhamuhonsaaji uNumbula uMunofu wa Nguluvi kisugumilwa.
Kiiva umwene shivavilo sha Nguluvi kwa vaanu,
lwa kiwonensa kiija ilisiku limonga akhayinsa kivakulusa omwe.
31 Lino wulekhaji uwushungu ni nkhalasi na makhaananio,
amaligo nu wuvi woona wa paayo paayo.
32 Leelo mugahilanaje amanofu na kisungupilana.
Musajilanaje ngaja uNguluvi shina wávasajilaga kwa nsila ya Kilisito.