Insengo ya Pawulo kwa vina vasili Vayahuudi
3
1 Kwa kiiva ya ago,
one Pawulo yuna nidindiilwe mu shifungo kwa kiiva ya kisenga insengo ya Kilisito Yeesu,
kunyeenyu omwe muna musili Vayahuudi,
nikivafuunyila kwa Nguluvi.
2 Shiyooli nihuviilila kiija,
mupuliishe kiija uNguluvi kwa lusungu lwakwe aniviishile nive muvanda waakwe wa kikhoma iMola yaakwe kunyeenyu.
3 Ngaja shina navayandishila,
a uNguluvi wánigubutulilaga iliswi lya wufiho waakwe,
kwa nsila ya kinitwiwushila.
4 Pina muyimba ago gina navayandishila,
hambi mwimanya shina nimeenye iliswi ulwa Kilisito,
lina likhandi lifihiilwe.
5 Uluhaavi loona ulwa pawukuulu,
uNguluvi asikhavajoveele avaanu iliswi ilya wufiho uwo.
Leelo lino,
wávajovelaga avanandeje na vakuwamalago,
awo vabaagule vaakwe kwa nsila ya Numbula waakwe.
6 Iliswi ilya wufiho ilyo lilyene ili,
kwa nsila ya kiyihuviilila iMola iNofu,
woona vina vasili Vayahuudi na Vayahuudi,
vihaala lumo imota sina uNguluvi wávayandalilaga avaanu vaakwe.
Viiva lumo ngaja filungo fya muvili.
Lulwene kiija,
kishilila kwa Kilisito Yeesu viposheela lumo ulutaahiso luna uNguluvi wátahisaaga kivayimiilila aVayahuudi.
7 UNguluvi kwa lusungu lwakwe ni ngufu saakwe inkhome,
aniviishile nive muvanda waakwe wa kikhoma iMola iNofu.
8 Hata nda nisikwiliile kiiva ngaja shina vashwali avagolofu woona,
uNguluvi wánipeelaga imota.
Wánipeelaga insengo iya kikhoma kwa vina vasili Vayahuudi uwusi winshi wuna wungaya shijelo,
yina yipatinkhana mwa Yeesu Kilisito.
9 UNguluvi yumwene Muwumbaaji wa fiinu fyona,
wánibagulaga kiija,
nivasoonele avaanu woona iliswi lya wufiho shina lisenjekha.
Iliswi ilyo,
likhandi lifihiilwe kihuma pashiyanso sha nyi.
10 Leelo kwa luhaavi ulu,
uwumanyi waakwe wuna wuli winshi,
wumanyishe kwa vina viitema na vanya wutawulilwa mu nyi yina yisiwonekha,
kwa nsila ya shipuga sha vahuvililaaji.
11 Ulo lulwene lukhandi lugoto lwa Nguluvi kihuma uluhaavi loona ulwa pawukuulu.
Wáwukwisaaga kishilila insengo yina uMutwa weesu uKilisito Yeesu wágahaga.
12 Kwa nsila ya kilungana nu Yeesu Kilisito na kimuhuviilila umwene,
tivejeela pa Nguluvi bila kitiila.
13 Lino nikivalomba musikhayolopwaji,
kwa kiiva ya malava gina niilava kwa kiiva yeenyu.
Amalava ago,
gikivaleetela uwutupikho shiluta.
UPawulo ikivafuunyila avahuvililaaji ava ku Efeso
14 Baheene nda nihiive ulugoto ulo ulwa Wiheesu,
nifugama pamwene na kimufuunya.
15 Umwene yu shiyanso sha wuumi kwa fiwumbwa fyona fina fili kushaanya na fina fili mu nyi.b
16 Nilomba kiija,
kilingana nu wutupikho waakwe uwukhome,
avapeelaje ingufu kishilila uNumbula waakwe,
mujine mu numbula seenyu.
17 Khanji nikivafuunyila kiija,
kwa nsila ya lihuuvi,
uKilisito ave iikhala mu numbula seenyu.
Apo baheene ulugano lwakwe,
lusiive lukivapeela ingufu ya kiyiima kwa wukhangafu ngaja mupishi guna guyisiise mandu indela saakwe mu nyi,
awu ngaja nanda yina yisenjiilwe mu luutu uluumu.
18 UNguluvi avapeelaje omwe lumo na vagolofu vaakwe avanji woona,
ingufu isa kimanya shina uKilisito atuganile.
Umwene atuganile kwa lugano lwa kiswiga,
khanji luna lusina shijelo.c
19 Nilomba kiija,
mumanye shina ulugano lwa Kilisito shina lukhome,
ulwene lwishila uwumanyi wa vaanu woona.
Baheene musiive vagolofu ngaja uNguluvi.
20 UNguluvi atunwajwe!
Shiyooli akwiliile kitugahila amakhome mandu kishila gina tilomba na kihiiva!
Akwiliile kitugahila ago,
kwa kiiva ingufu saakwe sisenga insengo mu numbula seesu.
21 UNguluvi atupikhwe shiluta na shiluta,
kwa wukhome waakwe wuna wuwonekha mu shipuga sha vahuvililaaji vaakwe na kwa Kilisito Yeesu!
Amina.