Luuka 13

Mulambiisile uwunansi weenyu baheene mukulushe

1 Uluhaavi luulo, avaanu vamonga vina vakhandi vikimupuliisa uYeesu, vamujovela kiija, uPilaato, umunjaajila wa Shiluumi, akhavabudile aVagalilaya vamonga, pina viihumya ishadanda shaanave kwa Nguluvi. 2 UYeesu wávagomosesa wáaja, “Aasi! Omwe muhiiva kiija aVagalilaya awo vakhagahiilwe ndeeno, kwa kiiva vakhandi vanansi kishila avanji woona? 3 Nikivajovela ndaali! Nda musilambiisila uwunansi weenyu, na yuumwe musiibudwe woona! 4 Hata avanji ishumi na munaana kula ku Silowamu, vina insimbili inali yikhavagwiliile vaafwa, lino muhiiva kiija, aveene vakhandi vanansi kishila avaanu woona, vina vakhandi viikhala mu Yelusalemu? 5 Nikivajovela ndaali! Nda musilambiisila uwunansi weenyu, na yuumwe musiibudwe woona tipu!”

Ishihwano sha mupishi guna gusiikhoma amakhomo

6 Apo uYeesu wávajovela avaanu awo ishihwano ishinji wáaja, “Akhandi akwali umuunu yumonga yuna wávyalile ilipishi lya mujombe mu mugunda gwakwe ugwa sabiibu. Kuunyuma wáaluta kiyava amakhomo, leelo asikhagaajile. 7 Baheene wámujovela umusenga nsengo waakwe uwa mugunda wáaja, ‘Loleela! Mu maakha gatatu nayinsa kiyava amakhomo mu mupishi ugu, leelo nisashaaga shiinu! Lino gudumula, kwa kiiva gwinanga umugunda hela!’

8 “Leelo, umusenga nsengo yula wámugomosesa wáaja, ‘Wee mutwa wangu, uguleshe umwakha ugu, nigukhasilile na kiponya ibuuli, 9 nda gukhome amakhomo ku mwakha, lukhava lunofu! Leelo nda gusikhomile, apo ugudumulaje.’ ”

UYeesu ikimuponia uwashimaayi mu lijuva ilya Sabaato

10 Ilijuva limonga ilya Sabaato, uYeesu akhandi ikivamanyisa avaanu mu nanda yimonga iya kifuunyila. 11 Mu nanda mula, akhandi akwali uwashimaayi yumonga, yuna akhandi ni lilungu lina likhandi limugahile kiiva mutamu maakha ishumi na munaana. Uwashimaayi uyo wáali ana lumbi pa mugongo, khanji akhandi ipootwa kigolokha.

12 UYeesu pina wámwajile, wámushemeela, alute pamwene. Baheene wámujovela wáaja, “Nyineesu, waapona uwutamu waakho, lino wayiyaawula!” 13 UYeesu wáviikha amawokho gaakwe pa washimaayi yula, baaho uwashimaayi yula wáyiima agolweshe umugongo gwakwe, wáyansa kimusufya uNguluvi.

14 Baheene umuyimililaaji wa nanda iya kifuunyila wákhalala, kwa kiiva uYeesu wámuponiise uwashimaayi yula mu lisiku lya Sabaato. Umukhome yula wávajovela avaanu wáaja, “Ijuma yoona yina nsiku mutanda isa kisenga insengo. Mwisakulwa kiyinsa kiponisiwa mu nsiku iso, leelo mu lisiku lya Sabaato musikhayinsaji!”

15 UMutwa uYeesu wámugomosesa wáaja, “Omwe muli vamyansi! Woona mwisenga insengo ilijuva lya Sabaato! Aasi, musidindula ulupanga lwa ngʼombe ni dogovi seenyu na kisitwala kiingʼwa amalenga? 16 Lino wuli, uwashimaayi uyu uwa shikholo sha Abulahamu, yuna akhandi ilafisiwa nu Shetaani kwa kipinywa maakha ishumi na munaana, asisakulwa kileshelwa na kiyiyeeshela mu lijuva lya Sabaato?”

17 UYeesu pina wálogola ago, avalugu vaakwe woona, vaweene nsoni. Leelo avanji woona vashendeevile mandu kwa kiiva ya nsengo inofu ya miitu yina uYeesu akhandi isenga.

UWutwa wa Nguluvi ngaja mbeyu ya mujombe

(Mataayo 13:31-32; Maluko 4:30-32)

18 Baheene uYeesu wáaposa, “UWutwa wa Nguluvi wuhwaneene ni shi? Niwuhwananise ni shi? 19 Wuhwaneene ni mbeyu iya mujombe yina nangʼana mandu, yina umuunu wávyalile mu mugunda gwakwe. Imbeyu yaamela, yaava mupishi, inyuni sayinsa kisenga ifiwanso mu mansamba.”

Ishihwano sha lihelu

20 UYeesu wáaposa khanji wáaja, “Niwuhwananise ni shishi uWutwa wa Nguluvi? 21 Wuhwaneene ni lihelu lina uwashimaayi yumonga wátoolile, wásapikha ilisapikhwa ilya debe sitatu isa wutine wa ngano. Pina wásapikha, ilihelu lila lyawumula ilisapikhwa lyona.”

Avanansi vasiyanushilwa mu Wutwa wa Nguluvi

(Mataayo 7:13-14, 21-23)

22 UYeesu pina akhandi iiluta ku Yelusalemu, wáshilile kivamanyisa avaanu mu majumbi amakhome na mu njinji. 23 Ilijuva limonga, umuunu yumonga wámuposaaga wáaja, “Wee mutwa, avaanu vina uNguluvi akhavakulusa vakhava vasheefu mandu?”

UYeesu wámugomosesa wáaja, 24 “Kihuluta mu Wutwa wa Nguluvi, kuli ngaja kishilila umulyango umubanu. Shiyooli nikivajovela kiija, vinshi vakhasakula kiyinjila, leelo vakhapootwa. 25 Uluhaavi luyinsa, pina umunya litembe akhadinda umulyango, baheene mukhayiima kunja, mukhayansa kihoodesa na kimulomba mwijova, ‘Wee mutwa, tilomba utudindulile!’ Leelo umwene akhavayankha kiija, ‘Nisivameenye, khanji nisimeenye kuna muhumile.’

26 “Omwe mukhajova, ‘Ose yuuse vina tikhandi tiilya na kiingʼwa lumo noowe! Khanji owe ukhandi ukitumanyisa mu njinji seesu!’ 27 Leelo umwene akhavajova, ‘Navajovela kiija nisivameenye, khanji nisimeenye kuna muhumile! Wuushi kunyangu, omwe muna muli vanansi!’

28 “Mukhamwaga uAbulahamu, uIsaaka, uYaakobo na vakuwamalago woona vali mu Wutwa wa Nguluvi. Leelo omwe mukhava mutajiilwe kunja. Ukho kukwene mukhava mwikhoola na kigegejula ameeno kwa kiiva ya wuvafi wukhome! 29 Avaanu kihuma mbali soona isa nyi vakhayinsa, vakhava viilya lumo mu Wutwa wa Nguluvi.

30 “Puliisi! Avaanu vina vali kuwudugo, vakhava va wutasi. Avaanu vina vali kuwutasi, vakhava va wudugo.”

UYeesu isugumilwa kwa kiiva ya vaanu va ku Yelusalemu

(Mataayo 23:37-39)

31 Uluhaavi luulo, aVafalisaayo avanji vaaluta kwa Yeesu vamujovela vaaja, “Uwuushe apa, ulute mu majumbi aganji, kwa kiiva umutwa uHelode isakula kikubuda.” 32 UYeesu wávagomosesa wáaja, “Mulute muyijovele insheve yila kiija, ‘Loleela! Iminsiyaano na pamulaawu, niidaga amalungu na kivaponia avatamu, mu lijuva lya wutatu, nikhamala ulugulumilo lwangu.’ 33 One nishuula mbakha nifishe ku Yelusalemu, nisiive mu lushuulo iminsiyaano na pamulaawu, pawaasha nikhafikha. Kwa kiiva yisisakulwa umukuwamalago kifwila uluvala ulunji, leelo ku Yelusalemu!

34 “Omwe vaanu va ku Yelusalemu, mukivabuda avakuwamalago vina uNguluvi wávafilikhaga kunyeenyu. Mu luhaavi lwinshi nisakula kivakungaania omwe ngaja shina inkuku yikungaania inyana nkuku saakwe mu mapikho gaakwe, leelo wiila mukhandi mwikhaana! 35 Loleeli! Lino uNguluvi wávalekha omwe ni nanda yeenyu imbaagule iya kifuunyila, kiija mutowe! Lino, nikivajovela kiija, shiyooli musikhanyaaga khanji, mbakha uluhaavi luna mukhajova, ‘Ayimililwajwe yuna iyinsa kwa litaawa lya Mutwa uNguluvi.’”