Abhamanyizyi abhi‑ilenga
2
Enya,
ɨmandɨ mu Bhaizilaeeli bhahafumiiye abhakuwi abhi‑ilenga.
Ɨsho sha huli na huliimwɨ,
mwaliimwɨ bhahayifumila abhamanyizyi abhi‑ilenga.
Abhamanyizyi ɨbho bhahayitʉʉsya ɨmanyizyo ɨzyɨ malenga hu mfiso.
Hwi‑idala ɨlyɨ manyizyo ɨzyo bhahayilɨnga hubhateezye amwɨ na hunʼkhaane ʉMwɨnɨ ʉyo ahabhagombʉʉye.
Hwi‑idala ɨlyo,
bhahayihwileetela ʉyazyo lubhilo.
2 Abhantu abhinji bhahayibhɨnjɨɨlɨla amadala gaabho agɨ njendo ɨmbiibhi,
nantele hu nongwa yaabho,
bhamo bhahayiliga idala ɨlyɨ lyoli.
3 Hu nsʉngwo zyabho ɨmbiibhi ɨzyɨ shʉʉma,
abhamanyizyi ɨbha abhi‑ilenga bhahayambɨɨlɨla ɨshʉʉma huliimwɨ hu madala agɨ mazwi agi‑ilenga.
Leelo afume halɨ,
ʉNgʉlʉbhɨ ahwilɨngɨɨnye nzɨɨla hubhalonje,
nantele saga ahayikhaabha hubhayazye!
4 Abhantumi bhamo lwa bhahabhombile ɨmbiibhi,
ʉNgʉlʉbhɨ saga ahabhalolɨɨye ɨnkʉmbʉ,
lyoli ahabhatajiiye mu mwoto.
Ʉhwo hu hiisi hwa bhapinyiilwe na manyololo,
bhagʉʉlɨla isiku liila ɨlya‑alongwe.
5 Nantele ɨmandɨ,
hu habhaazyo haala aha Noowa,
ʉNgʉlʉbhɨ saga ahabhalolɨɨye ɨnkʉmbʉ abhantu ɨbho bha saga bhahanʼtinihaga,
leelo ahabhaletɨɨye ɨmvula ɨya hubhayazye mu nsi ɨla,
abhantu bhahafwa.
Hwope ɨsho,
ahamʼfyʉlɨle ʉNoowa peeka na bhantu abhanjɨ pʉnga (7).
Ɨgo lwa gasɨɨle abhombeshe,
ʉNoowa yʉʉyo ahabhalʉmbɨlɨlaga abhantu huje bhabhombe ga gahwanziwa pitagaalila lya Ngʉlʉbhɨ.
6 Nantele,
ʉNgʉlʉbhɨ ahabhayazya nʉ mwoto abhantu abha mu mabooma agɨ Sodoma nɨ Gomola na‑abhe malota.
Ahabhabhɨɨha huje bhabhe shifwani hu gaala ga gahayihubhaaga ɨbho bha saga bhahumʼmwɨtɨha ʉNgʉlʉbhɨ.
7 Ahamʼfyʉla ʉLooti,
ʉmuntu ʉnʼgolosu,
ʉyo ahazugumiiye tee mu mwoyo gwakwe hu nongwa yɨ njendo ɨmbiibhi ɨzya bhabhomba mbiibhi.a
8 ɄLooti,
ʉmuntu ʉnʼgolosu ʉyo,
ahali akhala peeka na bhantu ɨbho,
hu nsiku ɨnyinji ʉmwoyo gwakwe gwahatenguha hu nongwa yɨ njendo zyabho ɨmbiibhi ɨzyo ahʉmvwɨzye na huzilole.
9 Ɨshi leelo,
ʉMwɨnɨ ʉNgʉlʉbhɨ amɨɨnye sha‑abhajiiye hubhafyʉle mu njelo abhantu ɨbho bhahunʼtiniha ʉmwene.
Nantele amɨɨnye ɨsho sha‑ahayihubhafunda abhabhomba mbiibhi pa lyahayifiha isiku liila ɨlya hubhalonje,
10 na bhaala bha bhalondolezya tee ɨnsʉngwo ɨmbiibhi ɨzyɨ mʼbɨlɨ na hulishente ikhone lya Ngʉlʉbhɨ.
Abhamanyizyi ɨbho abhi‑ilenga bhali ni‑idali,
nantele bhali na mabaado,
saga bhahwogopa huvilije ɨvipelwa ɨvimwamu ɨvya hu mwanya.
11 Leelo abhantumib bha bhali ni‑ikhone tee ashile ɨvipelwa ɨvyɨ mwamu ɨvyo,
saga bhahuvitaaka na huvilije pitagaalila lya Mwɨnɨ ʉNgʉlʉbhɨ.
12 Abhantu ɨbho bhaliga shoshonti sha saga bhashimɨɨnye.
Bhali nanshi ɨvyʉma vya saga vili nɨ njeele,
ɨvyo vipaapwa huje pamandɨ vikhatwe na‑abhoolwe!
Ɨsho,
sha shɨɨsho ʉNgʉlʉbhɨ sha‑ahayihubhayazya.
13 Nantele bhahayisombwa amalabha hu malabha ɨgo bhaleetile hwa bhantu abhanjɨ.
Bhaseshela lwa bhabhomba ɨnsʉngwo zyabho ɨmbiibhi pa pazelu.
Bhaseshela hubhagobele hu habhaazyo ɨho bhalya peeka naamwɨ.
Hwi‑idala ɨlyo bhahubhabhomba abhe nɨ nsoni nanshi amadona amabhiibhi mu mwenda ʉnʼzelu.
14 Amaaso gaabho gamemile ʉweegu nɨ nsʉngwo zyabho ɨzya‑abhombe ɨmbiibhi saga zili na pa‑adujile.
Bhahubhagobela abhantu abhagolosu bha saga bhajinile mu lwɨtɨho.
Amooyo gaabho galʉbhɨɨye mu nsʉngwo ɨzyɨ shʉʉma.
Ɨbho bhaguniilwe nʉ Ngʉlʉbhɨ!
15 Bhalileshile idala igolosu,
bhateejile na‑alondolezye idala lya‑ahalondoleziizye ʉBalaamu,
ʉmwana wa Beyoli.
Ʉmwene ahasʉngwɨlwe hushaaje ɨshʉʉma hwi‑idala ɨlya‑abhombe ɨmbiibhi.
16 Leelo ahadaamilwa hu nongwa yɨ mbiibhi zyakwe.
Ɨndogobhi saga ɨyanga,
leelo yahayanjile hwi‑izwi lya muntu,
yahadindizya ʉbwalusu ʉwa nʼkuwi ʉyo.c
17 Abhantu ɨbho bhali nanshi ɨmbwiwi zya zyʉmɨle amɨnzɨ nantele nanshi amabheesu ga gakhomwa nɨ nkʉngʉ.
ɄNgʉlʉbhɨ abhabhɨshɨɨye nzɨɨla apantu pa pali nɨ hiisi ɨngoosi.
18 Bhayanga amazwi aga hwibaade tee ga saga gahwavwa.
Bhahuzibhombela ɨmbombo ɨnsʉngwo zyabho ɨmbiibhi ɨzyɨ mʼbɨlɨ huje bhabhateje abhantu bha bhɨtɨɨshe shɨɨshi lwene,
ɨbho bhaleshile abhombe ɨgo abhabhiibhi bhabhomba.
19 Bhahubhasʉʉbhɨzya abhantu ɨbho huje bhahayibha bhasatuliilwe,
fwandi abheene bhɨɨbho bhali bhakalwe bhɨ mbiibhi.
Sha zili,
pɨpo hohonti ha hahunʼnongozya ʉmuntu,
abha nʼkalwe wɨ‑ɨho.
20 Abhantu ɨbha bhaleshile abhombe ɨmbiibhi ɨzya mu nsi hwi‑idala ɨlya humʼmanye ʉMwɨnɨ weetu nantele Mʼfyʉli weetu,
ʉYeesu ʉKilisiti.
Leelo nkashele bhɨtɨɨshe akhatwe na‑alongozewe nantele nɨ mbiibhi ɨzyo,
ɨpo ʉbhiibhi wa bhantu ɨbho wubha goosi tee ashile hu wandilo.
21 Ɨnjanjile ɨsho,
pɨpo hwahali shinza tee hwa bheene nkashele saga bhahamanyaga dumu idala ɨlyo ɨlyɨ golosu,
ashile aje bhalimanye,
nantele bhazikhaane ɨndajizyo ɨmfinjile zya bhambɨlɨɨye.
22 Ʉhwo hubha husimishizya ɨlyoli yɨ njango ɨyo ɨyiga,
“Ɨmbwa ɨweelela alye amatapisi gaakwe,”
d nɨ njango ɨyɨnjɨ ɨyiga,
“Ɨngʉlʉbhɨ ya bhahayoziizye,
ɨweelela nantele avugale mu matoto!”