Isiku ɨlya hwɨnze hwa Mwɨnɨ ʉYeesu
3
Bhakʉndwe bhaanɨ,
ɨkalaata ɨnɨ yɨ‑ɨhubhasimbila ya bhɨɨlɨ.
Mu kalaata zyonti ɨzyo zibhɨɨlɨ,
ɨndɨnjɨle huzidaamuzye ɨnsɨɨbho ɨnyinza mu matwe geenyu hwi‑idala ɨlya hubhiizusye.
2 Ɨhwanza aje mwizushe amazwi ɨgo agɨ mandɨ ɨgo abhakuwi bha Ngʉlʉbhɨ bhahayanjile,
nɨ ndajizyo zya Mwɨnɨ nʉ Mʼfyʉli weetu zya bhahabhaletɨɨye abhasontwa bhaakwe.
3 Nasʉʉti muhwanziwa mumanye huje,
ɨnsiku ɨzya hu malishilo bhahayɨnza abhantu abhɨ nsyoho,
ɨbho bhahayihubhasyonshela amwɨ na huzilondolezye ɨnsʉngwo zyabho bhɨɨbho.
4 Abhantu ɨbho bhahayihubhasyonshela bhahayiga,
“ɄKilisiti ahalapile huje,
ahayiweela!
Wɨlɨ,
ɨshi ali hwi?
Afume abhamaama bheetu lwa bhahafwiye,
ɨnongwa zili shishiila nanshi sha zyahali hu wandilo wɨ nsi!”
5 Abhantu ɨbho bhahwibhɨɨha nkati bhɨwɨɨlwe huje,
ɨmandɨ ʉNgʉlʉbhɨ ahayanjile lizwi lwene,
ɨmwanya nɨ nsi zyahapelwa.
Ahapelile ɨnsi afumilane na mɨnzɨ,
na‑azyʉngʉʉlwe na mɨnzɨ.
6 Hu mɨnzɨ ɨgo,
ɨnsi ɨyɨ habhaazyo haala yahayaziwa.
7 Nantele hwi‑izwi ɨlyo,
ʉNgʉlʉbhɨ ahabhɨɨshɨle ɨmwanya nɨ nsi ɨyɨ habhaazyo ɨha,
hu nongwa ya‑apembwe hu mwoto.
Azibhɨɨshɨle hu nongwa yi‑isiku liila lya‑ahayihubhalonga abhantu bha saga bhahunʼtiniha ʉmwene,
nantele ahayihubhayazya.
8 Leelo bhakʉndwe bhaanɨ,
mugandi ahwɨwe izwi ɨli huje,
pitagaalila lya Mwɨnɨ ʉNgʉlʉbhɨ,
isiku lyeka lilɨngɨɨne nanshi amaaha ɨelufu yeeka,
nantele amaaha ɨelufu yeeka galɨngɨɨne nanshi isiku lyeka.a
9 ɄMwɨnɨ saga akhaabha hugabhombe ɨgo ahalapile.
Saga nanshi shiila abhantu bhamo sha bhasɨɨbha huje,
akhaabha.
Ʉmwene ali nʉ jimbiilizu hu nongwa yeenyu,
saga ahwanza huje,
ʉmo mwaliimwɨ ateeje,
lyoli ahwanza aje bhonti bhalambe ɨmbiibhi zyabho.
10 Hwope ɨsho,
isiku ɨlya‑aweele hwa Mwɨnɨ lyahayɨnza lubhilo,
nanshi ʉmwibha.
Isiku ɨlyo,
ɨmwanya zyahayeepa hu nshinto ɨngoosi,
ɨvintu vya vili ʉmwo vyahayipya hu mwoto,
yope ɨnsi yahayiyaziwa peeka nɨ vintu vyonti vya vili ʉmwo.
11 Ɨshi,
hu nongwa ya‑aje ɨvintu vyonti vyahayinangaanywa hwi‑idala ɨlyo,
amwɨ muhwanziwa alembe hu sangalusu na hunʼtinishe ʉNgʉlʉbhɨ.
12 Ligʉlɨlaji isiku liila ɨlya Ngʉlʉbhɨ na hwanze tee aje lyɨnze nalinaali.
Isiku ɨlyo ʉNgʉlʉbhɨ ahayipemba ɨmwanya nʉ mwoto na huyiyazye.
Ɨvintu vya vilɨɨho ʉmwo vyahayiyenguha ni‑ilyoto ɨlyɨ mwoto ʉgwo.
13 Ɨshi,
atɨ tigʉʉlɨla ɨmwanya ɨmpya nɨ nsi ɨmpya nanshi sha‑ahatilapiiye,
ɨyo ɨmemile ʉgolosu.
14 Ɨshi bhakʉndwe bhaanɨ,
hu habhaazyo lwa mugʉʉlɨla isiku ɨlyo,
mudandamalaje hu mwoyo gwonti alembe mu golosu huje,
mubhe sinta bhiibhi pitagaalila lya Ngʉlʉbhɨ,
na‑abhe nʉ tengaanu.
15 Mwizuhaje huje ʉMwɨnɨ ajimbiilila hu nongwa ya‑aje asʉngwa huje abhantu bhafyʉlwe.
Ɨsho sha shɨɨsho ʉwamwetu ʉnʼkʉndwe ʉPaulo ahabhasimbiiye hu tengamazu nanshi ʉNgʉlʉbhɨ sha‑ahamʼpiiye.
16 Ɨgo ga gɨɨgo ayanga mu kalaata zyakwe zyonti.
Galɨɨho ga gali makhome hugaaganye mu kalaata zyakwe ɨzyo.
Amazwi ɨgo,
abhantu abhafwasu ɨbho bha saga bhali nɨ lyoli mu lwɨtɨho,
bhahugateezanya nanshi sha bhateezanya ɨNsimbo ɨMfinjile ɨzyɨnjɨ.
Abhombe ɨsho,
bhahwiyanzila bhɨɨbho ayaziwe hwabho.
Amazwi aga hu malishilo
17 Amwɨ bhakʉndwe bhaanɨ,
ɨshi mwazimanya ɨnongwa ɨzya bhamanyizyi ɨbho abhi‑ilenga.
Ɨshi,
mubhanje maaso huje mugandi agobelwe nʉ shevu ʉwa bhabhomba mbiibhi na‑agwe afume mu dandamazu ʉwɨ lwɨtɨho lwenyu.
18 Lyoli jendelelaji alembe mu mpyana na humʼmanye ʉMwɨnɨ weetu,
ʉMʼfyʉli ʉYeesu ʉKilisiti.
Ʉmwamu wubhe hwa mwene,
ahabhaazyo ɨha na wiila!
Aameni.