Ɨkalaata ɨya bhɨɨlɨ ɨya nʼsontwa
ʉPeeteli
ɄPeeteli ahubhalamuha abhooziwa
1
Anɨ nɨSiimoni Peeteli,
nɨmʼmomvi nantele nɨnʼsontwa wa Yeesu ʉKilisiti,
a ɨhubhasimbila amwɨ mwa mwambɨlɨɨye ʉlwɨtɨho luluula ʉlugoosi ʉlwo naatɨ tambɨlɨɨye.
Mwambɨlɨɨye ʉlwɨtɨho ʉlwo pɨpo ʉYeesu ʉKilisiti,
ʉyo yʉ Ngʉlʉbhɨ weetu nantele yʉ Mʼfyʉli weetu,
abhomba ɨgo gakhondɨɨye.
2 ɄNgʉlʉbhɨ abhonjelaje ɨmpyana nʉ tengaanu hwi‑idala ɨlya humʼmanye ʉmwene nʉ Yeesu ʉMwɨnɨ weetu.
Mukwiziiwe na‑asalulwe nʉ Ngʉlʉbhɨ
3 Hwi‑ikhone lyakwe,
ʉNgʉlʉbhɨ atipiiye gonti ga tihwanza,
huje tilembaje ʉlemvu ʉwa hunʼtinishe na humʼmwɨtɨshe.
Ʉmwene atipiiye ɨgo hwi‑idala ɨlya humʼmanye.
4 Hwi‑idala ɨlyo,
ʉNgʉlʉbhɨ alapile hutipeele ɨvintu ɨvigoosi nantele vinza tee.
Ɨvintu ɨvyo vihutaavwa atɨ huzileshe ɨnsʉngwo zyonti ɨmbiibhi zya zili mu nsi.
Nantele vihutaavwa abhe nʉ lwʉmvwano nʉ Ngʉlʉbhɨ.
5 Ɨshi,
hu nongwa ɨyo,
mudandamalaje hu mwoyo gwonti ahwonjele ʉwinza mu lwɨtɨho lwenyu,
mu winza weenyu mubhanje nʉ manyiihanyi.
6 Nantele mu manyiihanyi weenyu mubhanje bhantu bha hwizije.
Hwa hwizije hwenyu,
mwonjele nʉ jimbiilizu,
mu jimbiilizu weenyu mubhanje nɨ nshɨnshɨ hwa Ngʉlʉbhɨ.
7 Mu nshɨnshɨ yeenyu hwa Ngʉlʉbhɨ,
mwonjele ʉlugano hwa bhooziwa abhamwenyu,
mu lugano lwenyu ʉlwo mwonjele ʉlugano hwa bhantu bhonti.
8 Nkashele mubhe nɨ‑ɨgo gonti hu winji,
gahubhaavwa abhe bhabhomvi bhinza bha Mwɨnɨ weetu ʉYeesu ʉKilisiti huje mumʼmanye ʉmwene.
9 Leelo ʉmuntu wa saga ali nɨ njendo ɨzyo,
ʉyo yʉ nʼtonko,
saga abhajiiye alole.
Ayɨwɨɨlwe huje,
ʉNgʉlʉbhɨ anʼsangalusiizye ɨmbiibhi zyakwe ɨzyɨ mandɨ.
10 Ɨshi bhooziwa bhamwetu,
bagaji tee asimishizye huje,
ʉNgʉlʉbhɨ abhakwiziizye na hubhasalule.
Nkashele mukhala ɨsho mu lwɨtɨho,
saga mwahayihululeha dumu.
11 Nkashele mubhomba ɨsho,
ʉNgʉlʉbhɨ ahayihubhambɨɨlɨla shinza mu wumwɨnɨ ʉwa wiila ʉwa Mwɨnɨ nʉ Mʼfyʉli weetu ʉYeesu ʉKilisiti.
12 Ɨshi,
ɨnza‑ajendeelele hubhiizusye wiila ɨga gonti,
hwope nkashele mugamɨɨnye na‑adandamale mu lyoli ya mwahamanyiiye.
13 Ɨlola huje,
hantu hinza huliinɨ aje ɨmbiizusye hu nongwa ɨzi,
hu habhaazyo honti lwɨ‑ɨlemba mu nsi ʉmu.
14 Ɨyanga ɨsho hu nongwa ya‑aje,
ɨmɨɨnye huje,
ɨnsiku zyanɨ ɨzya‑asogole mu nsi ʉmu zipalamiiye.
Ɨsho sha shɨɨsho ʉMwɨnɨ weetu ʉYeesu ʉKilisiti aniluliiye pa pazelu.
15 Ɨshi,
sha shɨɨsho ɨbaga tee hubhabhʉʉzye ɨgo gonti huje hu habhaazyo honti lwa naafwa mwahagizuhaje.
Abhasimishizi abhɨ mwamu ʉwa Kilisiti
16 Hu habhaazyo ɨho lwa tahabhamanyizyaga hu nongwa yi‑ikhone lya Mwɨnɨ weetu ʉYeesu ʉKilisiti na hwɨnze hwakwe,
saga tahavisʉbhɨɨye ɨvilaale ɨvi‑ilenga ɨvyo vyahayangwilwe hu njeele zya bhantu.
Lyoli,
atɨ tahawulolile ʉmwamu waakwe hu maaso geetu tɨɨtɨ.
17-18 Enya,
atɨ tahali peeka nʉ Yeesu pa mwanya pi‑igamba liila ifinjile,
lwa‑ahambɨlɨɨye ɨnshɨnshɨ ɨngoosi nʉ mwamu afume hwa Daada ʉNgʉlʉbhɨ.
Hu habhaazyo ɨho,
atɨ tɨɨtɨ tahʉmvwɨzye izwi afume hu mwanya hwa Ngʉlʉbhɨ ʉwɨ mwamu ʉgoosi.
Izwi ɨlyo lyahaga,
“Ʉnʉ Mwana waanɨb ʉnʼkʉndwe,
ahungwɨzya ʉmwoyo.”c
Amazwi agɨ shikuwi
19 Nantele amazwi aga bhakuwi bha Ngʉlʉbhɨ gahutipeela ʉsimishizi ʉwɨ lyoli,
namwɨ mubhomba shinza nkashele muhugakhata.
Amazwi ɨgo gali nanshi ʉlukhozyo lwa lukhozya pa pali nɨ hiisi afishe hu habhaazyo lwa hwahayisha.
Ɨpo ʉKilisiti ahayihubhakhozya mu mooyo geenyu nanshi ɨntondwe ɨya shampwi.
20 Ɨshi,
igoosi ashile gonti,
mwizuhaje huje,
nawumo ʉkuwi ʉwɨ Nsimbo ɨMfinjile ʉwo abhakuwi bhahiluuye afumilane nɨ nsɨɨbho zyabho bhɨɨbho.
21 Nantele nawumo ʉkuwi ʉwo wahafumilɨɨne nʉ kʉndwe wa bhantu,
leelo abhantu bha bhahafumyaga ʉkuwi afume hwa Ngʉlʉbhɨ,
bhahalongolwaga nʉ Mʼpepo ʉMʼfinjile.d