Hunʼtinishe ʉNgʉlʉbhɨ
4
Heenu ha hakhonzya amadali ni‑ibho muuhati yeenyu?
Vileetwa nɨ nsʉngwo ɨmbiibhi zya zili muuhati yeenyu zya zilwa wiila naamwɨ!
2 Munyonywa tee abhe nɨ vintu,
leelo saga muhuvyaga,
ɨpo pa mubha nzɨɨla agoje.
Nantele mukhatwa nɨ jɨɨla hu vintu vya bhantu.
Lwa mupootwa huvyaje,
ɨpo pa muhwanda adaliihane na‑alwe.
Ɨshi mubhuliliilwe hu nongwa ya‑aje,
saga mulaabha hwa Ngʉlʉbhɨ!
3 Hwope lwa mulaabha saga muhwambɨɨlɨla,
pɨpo mulaabha shibhiibhi.
Mulaabha,
huje muvibhombele alɨngaane nɨ nsʉngwo zyenyu ɨmbiibhi.
4 Amwɨ mwa muli nanshi abheegu!
Wɨlɨ,
saga mumɨɨnye huje,
abhe bhamanyani bhɨ nsi,
hubhe bhalʉgʉ bha Ngʉlʉbhɨ?
Ɨshi,
wowonti wa‑asʉngwa abhe mʼmanyani wɨ nsi ɨnɨ,
ahwibhɨɨha abhe nʼnʉgʉ wa Ngʉlʉbhɨ.
5 Mugandi asɨɨbhe huje,
ɨNsimbo ɨMfinjile ziyanga lwene lwa ziyiga,
“ɄNgʉlʉbhɨ asʉngwa atɨ tibhe bhantu bhaakwe lwene,
sha shɨɨsho avwalala tee mu mwoyo,
nkashele tileha hunʼgane ʉmwene lwene.”a
6 Peeka nɨ‑ɨgo,
ʉNgʉlʉbhɨ ahutonjela ɨmpyana,
ɨsho sha shɨɨsho ɨsimbwilwe mu Nsimbo ɨMfinjile huje,
“ɄNgʉlʉbhɨ ahubhakhaana bha bhahwisʉmba,
leelo bha bhahwiyiisya,
ahubhapeela ɨmpyana.”b
7 Ɨshi leelo,
munʼtinihaje ʉNgʉlʉbhɨ.
Munʼdindizyaje ʉSeetano,
c wope anza hubhashɨmbɨle.
8 Nʼzʉmbɨlɨlaji ʉNgʉlʉbhɨ,
wope anza hubhazʉmbɨɨlɨle amwɨ.
Muleshe abhombe ɨmbiibhi,
amwɨ mubhabhomba mbiibhi,
d sangalusyaji amooyo geenyu,
amwɨ mubhɨ nsɨɨbho zibhɨɨlɨ.
9 Zugumililaji,
zondaji na‑alile hu mbiibhi zyenyu.
Aseshe hwenyu hugalushe hubhe hulile,
ʉluseshelo lwenyu lugalushe abhe zugumizu.
10 Hwiyisyaji mwɨmwɨ pitagaalila lya Mwɨnɨ ʉNgʉlʉbhɨ,
wope anza hubhazʉvye.
Ɨnsundo hu nongwa ya hubhalonje abhanjɨ
11 Bhooziwa bhamwetu,
mugandi ayangane shibhiibhi mwɨmwɨ hu mwɨmwɨ.
Ɨnjanjile ɨsho,
pɨpo ʉmuntu wa‑ahunʼnyanga shibhiibhi ʉwamwabho,
awe hunʼnonje,
ʉmuntu ʉyo ahuziyanga shibhiibhi ɨndajizyo zya Ngʉlʉbhɨ na huzisyonshele.
Nkashele ʉhuzisyonshela ɨndajizyo,
saga ʉhuzikhata,
leelo wabha nʼnonzi wɨ ndajizyo.
12 Yʉ Ngʉlʉbhɨ mwene ya‑abhɨɨha ɨndajizyo,
nantele ʉmwene yʉ Nʼnonzi.
Ʉmwene ya yʉʉyo ya‑abhajiiye afyʉle nantele ya‑abhajiiye ayazye.
Ɨshi aawe we naanu wʉ‑ʉhunʼnonga ʉwamwenyu?#
Mugandi ahwisʉmbe hu nongwa yɨ ndaabhɨ
13 Ɨshi,
tejeelezyi shinza,
amwɨ mwa muyanga huje,
“Asanyʉʉnʉ awe ɨndaabhɨ,
tɨnza‑abhale hwi‑ibooma limo.
Tɨnza‑akhale ʉmwaha gwonti,
tahayichuluzyaga na huzyaje tee ɨzya pa mwanya.”
14 Leelo amwɨ saga mumɨɨnye lya lyahayibha ɨndaabhɨ!
Ʉwʉʉmi weenyu wɨ habhaazyo hashe lwene!
Wulɨngaana nanshi ilyosi lya liloleha hu habhaazyo hashe,
na‑ateeje lwʉlwo!
15 Ɨshi leelo,
ɨhwanziwa aje muyangaje ɨshi,
“Nkashele ʉMwɨnɨ ʉNgʉlʉbhɨ wasʉngwa,
tahayibha bhʉʉmi,
tahayibhomba ahantu ɨha awe haala.”
16 Leelo amwɨ saga mubhomba ɨsho,
muhwisʉmba hu gaala ga musɨɨbha abhombe.
Ahwisʉmbe hwenyu hwonti nanshi ʉhwo hubhiibhi.
17 Ɨshi,
ʉmuntu wowonti wa‑amɨɨnye abhombe ɨlinza,
leelo saga ahulibhomba,
ʉmuntu ʉyo abhomba mbiibhi.