Ɨmbombo zyɨ lumɨlɨ
3
Bhooziwa bhamwetu,
mugandi abhe na bhantu abhinji mwaliimwɨ bha bhahwanza abhe bhamanyizyi bhi‑izwi lya Ngʉlʉbhɨ.
Ɨnjanjile ɨsho,
pɨpo mumɨɨnye huje pi‑isiku ɨlya‑alongwe,
alongwe hwetu atɨ tibhamanyizyi hwahayibha hukhali tee.
2 Atɨ tenti titeega hu minji.
Nkashele ʉmuntu saga ateega hu gaala ga‑ayanga,
ʉyo nʼgolosu,
nantele ali ni‑ikhone ɨlya‑alongozye nʉ mʼbɨlɨ gwakwe gwonti.
3 Lwa tibhɨɨha ɨshijela sha shigondɨɨne mwi‑ilomu lyɨ falaasi,
a tihwanza huje ɨtɨtɨshɨlaje.
Hwi‑idala ɨlyo,
tilongozya ʉmʼbɨlɨ gwakwe gwonti hwohwonti hwa tisʉngwa atɨ.
4 Zyope ɨmeeli ɨngoosi tee zibuuhwa nɨ haala ɨngoosi mu mɨnzɨ.
Hwope ɨsho,
bhahuzijenzya na hagombelo ahadoodo lwene abhale hwohwonti hwa‑asʉngwa ʉnʼnongozi ʉwɨ meeli.
5 Sha shɨɨsho,
lwope ʉlumɨlɨ hantu hadoodo mu mʼbɨlɨ,
leelo luhwibaada hu mabaado amagoosi tee.
Amwɨ sɨɨbhaji nantele shiila ʉmwoto ʉnʼdoodo sha guhwazya apye isengo igoosi.
6 Ʉlumɨlɨ lwope luli nanshi ʉmwoto.
Lumemile ʉbhiibhi ʉwinji ʉwa mu nsi.
Ʉlwene hapelwa hamo mu vipelwa vyonti ɨvyɨ mʼbɨlɨ,
leelo luhwambuzya ʉmuntu abhe mʼmiibhi.
Luhwazya na‑apembe ʉwʉʉmi wonti ʉwa muntu,
lwope ʉlumɨlɨ lupembwa nʉ mwoto ʉgwa huzimub gwa saga guzima nka lumo.
7 Ɨvipelwa vyonti visugwa.
Abhantu bhabhajiiye asuje ɨhanu,
ɨnyonyi,
vya vikwesushila,
peeka na viila vya vili mu nsʉmbi.
8 Hwope ɨsho nʉʉmo ʉmuntu wa‑abhajiiye asuje ʉlumɨlɨ huje luleshe ayanje ɨmbiibhi.
Ʉlwene lumemile ʉbhiibhi,
saga lugasujiha,
lyoli lumemile ʉkʉʉla wa wugoga.
9 Hwi‑idala ɨlyɨ lumɨlɨ tihumʼmwamiha ʉMwɨnɨ ʉNgʉlʉbhɨ,
ʉDaada weetu.
Nantele hwi‑idala ɨlyɨ lumɨlɨ lwʉlwo,
tihubhaguna abhantu ɨbho ʉNgʉlʉbhɨ ahabhapelile hu shifwani shaakwe.
10 Mwi‑ilomu lyeka gafuma amazwi aga‑amwamishe na gɨ nguno.
Bhooziwa bhamwetu,
saga ɨhwanziwa huje ɨbhanje ɨsho!
11 Wɨlɨ,
ɨmbwiwi yeeka ɨgaafumya amɨnzɨ aminza na mɨnzɨ amakhali?
12 Bhooziwa bhamwetu,
saga ɨbhajiiye huje ikʉ lyezye amantongooni agɨ mizeyituuni.
c Zyope ɨzabiibud shɨnɨɨsho saga zihwezya amantongooni agɨ makʉ.
Ɨmbwiwi ɨyɨ mɨnzɨ agi‑ibheeya yope saga ɨbhajiiye afumye amɨnzɨ aminza.
Ʉlutinu afume hwa Ngʉlʉbhɨ
13 Yʉ naanu mwaliimwɨ ʉwɨ lutinu awe ʉmanyiihanyi ʉwɨ lyoli?
Ɨshi alolesye ɨlyo hu njendo ɨnyinza na hu mbombo zyakwe zya zibhombeha hu woloolo na hu lutinu lwakwe.
14 Leelo,
amooyo geenyu nkashele gamemile ɨjɨɨla ɨngoosi na hwisaaje,
leshi ahwisʉmbe huje,
muli nʉ lutinu.
Nantele leshi ayanje ilenga pa pahwanziwa ayanje ɨlyoli.
15 Ʉlutinu nanshi ʉlwo saga lufuma hu mwanya hwa Ngʉlʉbhɨ,
lyoli ʉlwo lufuma mu nsi,
hwa bhantu na hu mapepo.
16 Ɨnjanjile ɨsho,
pɨpo poponti pa pali na bhantu bha bhali nɨ jɨɨla nʉ wiimi,
ɨpo pabha nʉ lwese,
peeka na‑abhombe ɨmbiibhi ɨzyɨnjɨ zyonti.
17 Leelo,
bha bhali nɨ njeele zya zifuma hu mwanya hwa Ngʉlʉbhɨ,
ɨbho bha bhali bhasangalusu,
bha bhasʉngwa abhe nʉ tengaanu na bhantu abhanjɨ,
bholoolo,
bhʉmvwa.
Ɨbho bha bhali nɨ nkʉmbʉ tee,
nantele bhabhomba ɨnjendo ɨnyinza,
saga bhahubhabaagula abhantu bhamo,
nantele saga bhali nʉ gulugulu.
18 Abhantu bha bhaleeta ʉtengaanu paahati pa bhantu,
bhabha nanshi bhatota ɨmbeyu ɨyɨ tengaanu.
Pamandɨ bhahayambɨɨlɨla amantongooni agɨ golosu pitagaalila lya Ngʉlʉbhɨ.