Ɨnsundo hwa bhatabhazi
5
Ɨshi tejeelezyi shinza amwɨ mubhatabhazi!
Lilaji na‑azonde hu nongwa yɨ malabha amagoosi ga mwahayihugaaga.
2 Ɨshʉʉma sheenyu shinanjiishe na menda geenyu galɨwɨɨlwe nʉ muswa.
3 Ɨzahaabu nɨ mpɨɨya zili nɨ hama.
Ɨhama ɨyo yahayihubhalonga hwi‑idala ɨlya‑abhe simishizi ʉwa‑aje,
mwahabhombelaga shibhiibhi ʉtabhazi weenyu.
Yope yahayihugayazya amabɨlɨ geenyu nanshi shiila ʉmwoto sha gulʉngʉlɨzya ɨvintu.
Ɨnjanjile ɨsho,
pɨpo amwɨ muhwibhɨɨshɨla nzɨɨla ɨmfuha ɨyɨ shʉʉma sheenyu mu nsiku ɨzi ɨzya hu malishilo.
4 Tejeelezyi,
abhabhomvi bheenyu sha bhahubhabhuna na hubhataake!
Abheene bhahamalile avune mu magʉnda geenyu,
leelo amwɨ saga mwahabhasombile.
Ɨshi,
izwi ɨlya hwibhune hwabho lyʉmvwɨha mu makutu ga Mwɨnɨ ʉNgʉlʉbhɨ,
ʉMwɨnɨ ʉwi‑ikhone lyonti.
5 Mulemba na hwikhondeezye mu tabhazi weenyu mu nsi ɨnɨ.
Mubhombile agɨ nsʉngwo ɨzyɨ mooyo geenyu hu habhaazyo ɨho ʉNgʉlʉbhɨ ha‑apalamiiye hubhalonje.
Ɨpo mulɨngaana lwene nanshi ɨvyʉma vya vibʉlʉʉshe hu habhaazyo aha‑abhoolwe.
6 Mwahabhakhootile na hubhabude abhantu bha bhahali bhagolosu pitagaalila lya Ngʉlʉbhɨ,
bhope saga bhahali ni‑idala ɨlya‑adindizanye naamwɨ.
Ajimbiilile mu mayɨmba
7 Ɨshi bhooziwa bhamwetu,
jimbililaji afishe ɨpo ʉMwɨnɨ weetu ʉYeesu ʉKilisiti lwa‑ahayɨnza.
Enyaaji ʉjimbiilizu wa nʼnimi.
Ʉmwene agʉlɨɨlɨla ʉnʼgʉnda gwezye ɨviyabho vya vili nɨ zya pa mwanya hwa mwene.
Ajimbiilila ahwande ɨmvula ɨya hwande afishe ɨya hu malishilo,
ɨviyabho lwa vihwela.
8 Ɨshi naamwɨ jimbililaji na‑akhamantane mu mooyo geenyu hu nongwa ya‑aje ahwɨnze hwa Mwɨnɨ ʉYeesu hupalamiiye.
9 Bhooziwa bhamwetu,
mugandi ahwibhunanzye mwɨmwɨ hu mwɨmwɨ huje mugandi alongwe.
Mubhe maaso,
pɨpo ʉNʼnonzi apalamiiye ahwɨnze,
ali pa lyango!
10 Bhooziwa bhamwetu,
manyilaji ashilile hwa bhakuwi bha bhahayanjile hwi‑ikhone lya Mwɨnɨ ʉNgʉlʉbhɨ.
Abheene bhahajimbiliiye peeka na‑aje bhahalabhaga.
Ɨshi amwɨ mubhe nanshi abheene.
11 Tihubhakwizya abhantu ɨbho huje bhasayiiwe hu nongwa ya‑aje,
bhajimbiliiye.
Mwʉmvwɨzye wope ʉjimbiilizu ʉwa Ayuubu na shiila ʉMwɨnɨ ʉNgʉlʉbhɨ sha‑ahanʼsayile pamandɨ.
ɄMwɨnɨ ʉNgʉlʉbhɨ ʉmwene mwinza,
nantele amemile ɨnkʉmbʉ.
12 Bhooziwa bhamwetu,
igoosi ashile ɨgo gonti,
mugandi alape,
hubhe hu hantu hohonti aha hu mwanya,
awe mu nsi,
awe hu hanjɨ hohonti.
Nkashele muhwɨtɨha,
mugaje “Ena” lwene,
awe nkashele mukhaana,
mugaje “Ndaadi” lwene huje mugandi alongwe nʉ Ngʉlʉbhɨ.
Hunʼnaabhe ʉNgʉlʉbhɨ hu lwɨtɨho
13 Wɨlɨ,
muuhati yeenyu muli nʉ muntu wa‑ayɨmba?
Ʉyo ahwanziwa hunʼnaabhe ʉNgʉlʉbhɨ.
Wɨlɨ,
huli nʉ muntu wa‑ashiiye?
Ʉyo ahwanziwa ateele ɨnteelo ɨzya humʼmwamishe ʉNgʉlʉbhɨ.
14 Wɨlɨ,
mwaliimwɨ muli nʉ mʼminu?
Ɨshi abhakwizye abhagoosi abhɨ shibhanza huje,
bhɨnze bhamʼpuutile na humʼpotozye ɨnyembaa hwi‑itaawa lya Mwɨnɨ ʉYeesu.
15 Bhope nkashele bhapuute hwa Ngʉlʉbhɨ hu lwɨtɨho,
ʉmʼminu ʉyo anza‑apone.
Wope ʉMwɨnɨ anza humʼmwɨmɨɨlɨsye afume paala pa‑ahagonile.
Nantele,
nkashele wabhomba ɨmbiibhi,
anza‑akhobhoshelwe.
16 Ɨshi laataji ɨmbiibhi zyenyu mwɨmwɨ hu mwɨmwɨ na‑aputilane,
huje ʉNgʉlʉbhɨ abhaponie.
Ɨmpuuto zya muntu ʉnʼgolosu pitagaalila lya Ngʉlʉbhɨ zibha ni‑ikhone tee,
nantele zibhomba ɨmbombo.
17 Ʉnʼkuwi wa Ngʉlʉbhɨ ʉEliya ahali muntu nanshi atɨ.
Lwa wapuuta hwa Ngʉlʉbhɨ hu mwoyo gwonti huje,
ɨmvula ɨgandi atoonye,
yope ɨmvula lyoli saga yahatoonya mu nsi hu habhaazyo ahɨ maaha gataatu na meezi nʼtanda.
18 Pamandɨ,
ahanʼnaabha ʉNgʉlʉbhɨ nantele huje ɨmvula ɨyande atoonye.
Ɨpo ɨmvula yahatoonya,
ɨnsi yope yahamezya amamelela nantele.b
19 Bhooziwa bhamwetu,
tije ʉmuntu ʉmo mwaliimwɨ ateejile hwi‑idala ɨlya‑aleshe ɨlyoli ya Ngʉlʉbhɨ,
pamandɨ ʉwamwabho ahanʼgalusya nantele.
20 Ɨpo mumanye shinza huje ʉmuntu wowonti wa‑ahunʼgalusya ʉmuntu ʉyo afume mu mbiibhi,
ahuwufyʉla ʉwʉʉmi wa muntu ʉyo afume mu fwe ʉwa wiila na wiila.
Nantele abhomba aje ʉmʼmomba mbiibhi ʉyo akhobhoshelwe ɨmbiibhi zyakwe ɨnyinji.