Ɨkalaata ɨya
Yaakobo
ɄYaakobo ahubhalamuha aBhayahuudi abhooziwa
1
Ɨkalaata ɨnɨ ɨfumile huliinɨ anɨ nɨYaakobo,
nɨmʼmomvi wa Ngʉlʉbhɨ nʉ wa Mwɨnɨ ʉYeesu ʉKilisiti.
a Ɨhubhalamuha amwɨ muBhayahuudi abhooziwa mubhɨ vikholo ishʉmi na vibhɨɨlɨ,
mwa munyampɨɨne mu nsi zyonti.
Ajimbiilile mu lwɨtɨho
2 Bhooziwa bhamwetu,
mushanje tee lwa mushilila mu njelo ɨzyɨ waaji wuwinji wuwinji.
3 Ɨnjanjile ɨsho,
pɨpo mumɨɨnye huje ajelwe hu lwɨtɨho lwenyu huhubhaleetela ʉjimbiilizu.
4 Leelo mujendeelele ajimbiilile huzitole ɨnjelo afishe hu malishilo,
huje mubhe mujinile mu njendo na‑abhombeshe hwa saga hubhuliiye na hohonti mu lwɨtɨho lwenyu.
5 Leelo hwɨ‑ɨgo,
nkashele alɨɨho ʉmo mwaliimwɨ wa‑abhuliililwa nʉ lutinu,
anʼnaabhe ʉNgʉlʉbhɨ,
wope ʉNgʉlʉbhɨ ahayihumʼpeela sha‑alaabhile.
Ɨnjanjile ɨsho,
pɨpo ʉNgʉlʉbhɨ ahubhapeela abhantu bhonti hu winji hu mwoyo ʉnʼzelu,
nantele sinta alongane.
6 Leelo ʉmuntu ʉyo ahwanziwa alaabhe hu lwɨtɨho sinta abhe nɨ nsyoho huje abhala hwambɨɨlɨle,
pɨpo ʉmuntu wa‑ali nɨ nsyoho mu mwoyo abha alɨngɨɨne nanshi amabhilingwa aga mu nsʉmbi,
ɨgo gahwegwa ʉhwu na‑ataagwe ʉhwo nʉ‑ʉhwo.
7 Ʉmuntu nanshi ʉyo agandi asʉʉbhɨle huje,
agambɨɨlɨla ahantu hohonti afume hwa Mwɨnɨ ʉNgʉlʉbhɨ.
8 Ʉmuntu ʉwɨ njendo ɨzyo akhɨɨte ɨnsɨɨbho zibhɨɨlɨ,
asingaamwa mu njendo zyakwe.
Abhapɨɨna na bhatabhazi
9 Ʉmwoziwa ʉmʼpɨɨna wowonti akhondɨɨye huje ashanje,
hu nongwa ya‑aje ʉNgʉlʉbhɨ anʼzʉvyɨzye.
10 Ʉnʼtabhazi wope ashanje,
hu nongwa ya‑aje ʉNgʉlʉbhɨ amʼmwisiizye.
Ʉnʼtabhazi ʉyo ahayishila nanshi ʉweezya ʉwa mwi‑igona.
11 Isanya lwa lyalama,
ʉlulamo lwakwe lwahawukhoma ʉweezya wuula,
wope wahʉʉma na‑alagale pa nsi.
Ɨpo ʉwinza waakwe wunanjiha.
Sha shɨɨsho wope ʉnʼtabhazi lwa‑ajendeelela mu mbombo zyakwe,
ahayifwɨla mwʉmwo.
ɄNgʉlʉbhɨ saga ahubhatʉʉsya abhantu mu njelo
12 Asayiiwe ʉmuntu wa‑ajimbiilila lwa‑ali mu njelo,
pɨpo lwa waatola,
ʉNgʉlʉbhɨ ahayihumʼpeela ɨmpeesya ɨyɨ wʉʉmi ʉwa wiila na wiila,
nanshi sha‑ahabhalapiiye bhaala bha bhahunʼgana.
13 Ʉmuntu nkashele ali ajelwe,
agandi ayanje huje,
“Ɨjelwa nʉ Ngʉlʉbhɨ.”
Ɨnjanjile ɨsho,
hu nongwa ya‑aje ʉNgʉlʉbhɨ saga abhajiiye ajelwe huje,
abhombe ɨmbiibhi,
nantele ʉmwene saga ahunʼjela ʉmuntu wowonti.
14 Leelo shila muntu ajelwa hu nsʉngwo zyakwe yʉʉyo zya zihunʼnongozya na hunʼgobele abhombe ɨmbiibhi.
15 Ɨshi,
ɨnsʉngwo lwa zyajina,
zihunʼtwala ʉmuntu abhombe ɨmbiibhi,
zyope ɨmbiibhi zihunʼtwala ʉmuntu ʉyo hu fwe.
16 Mwɨ bhooziwa bhamwetu bhakʉndwe,
mugandi agobelwe.
17 Ahantu hohonti ahinza nɨ shikʉnjɨlwa ɨshinza shoshonti vihutiishila afume hu mwanya hwa Ngʉlʉbhɨ ʉDaada weetu.
Ʉmwene wa‑ahapelile ɨhozyo zyonti.
ɄNgʉlʉbhɨ saga nʼgalunʼgalu nanshi izyʉngʉʉzi,
mwinza hu habhaazyo honti.
18 Ɨshi afumilane na shiila sha‑ahanzaga yʉʉyo,
ʉNgʉlʉbhɨ ahatibhɨɨha huje,
tibhe bhaana bhaakwe hwi‑idala ɨlya hwɨtɨshe izwi lyakwe ɨlya nalyoli.
Ahabhombile ɨgo huje,
tibhe bhakʉndwe bhaakwe abhasalulwe mu vintu vyonti vya‑ahavipelile.
Ʉhwo hukholane nɨ nsangub ɨyɨ viyabho ɨvya hwande yɨ‑ɨfumiziwa hwa mwene.
Hulyʉmvwe izwi lya Ngʉlʉbhɨ na hulitinishe
19 Bhooziwa bhamwetu bhakʉndwe,
mutejeelezye shinza!
Ʉmuntu wowonti mwaliimwɨ agandi abhe nʼkhalaganu ayanje,
lyoli abhe wa‑atejeelezye nasʉʉti.
Nantele,
agandi abhe wa‑aviitwa lubhilo,
20 hu nongwa ya‑aje ʉmuntu wa‑ali ni‑ilyoyo saga abhomba ga gakhondɨɨye pa maaso ga Ngʉlʉbhɨ.
21 Ɨshi leelo,
muleshe ʉwaavu weenyu wonti nɨ nsɨɨbho ɨmbiibhi zya zimemile mu mooyo geenyu.
Mulyambɨɨlɨle hu nshɨnshɨ izwi lya Ngʉlʉbhɨ,
ɨlyo alibhɨɨshɨle nzɨɨla mu mooyo geenyu hu nongwa ya‑aje lili ni‑ikhone ɨlya hubhafyʉle.
22 Nantele amwɨ mugandi ahwigobele hwa hulyʉmvwe izwi lya Ngʉlʉbhɨ lwene,
lyoli mubhombaje nanshi izwi sha liyanga.
23 Ʉmuntu wowonti wa‑ahwʉmvwa izwi lya Ngʉlʉbhɨ lwene,
leelo saga abhomba nanshi sha liyanga,
ʉyo ahayibha nanshi ʉmuntu wa‑ahwiyeenya hu maaso nɨ shilolwe.
24 Ɨpo lwa waamala ahwiyeenye,
hu habhaazyo hɨnɨɨho lwa wasogola pa shilolwe,
ahwɨwa sha‑alɨɨho.
25 Leelo ʉmuntu ya‑asɨbhɨɨlɨla shinza ɨndajizyo zya Ngʉlʉbhɨ ɨzyɨ golosu zya zihubhasatula abhantu,
agandi abhe wa hwʉmvwe na hwɨwe.
Leelo abhanje wa‑abhombe.
Ʉmuntu ʉyo ahayisayiwa nʉ Ngʉlʉbhɨ hu gonti ga‑abhomba.
26 Nkashele ʉmuntu ahwilola huje ahumʼmombela ʉNgʉlʉbhɨ,
leelo saga ahwiziga ayanje ga saga gakhondɨɨye,
ʉmuntu ʉyo ahwigobela mwene,
nantele abhombe hwakwe saga hugamʼmwavwa nka hamo.
27 Humʼmombele ʉNgʉlʉbhɨ ʉDaada weetu hwa hukhondɨɨye pitagaalila lyakwe,
hwa saga huli nʉ bhiibhi nka wumo hwa hwʉhwu,
hubhaavwe abhaana abhapɨɨna na bhafwɨle bha bhali mu mayɨmba gaabho,
na hwizijile nɨ njendo ɨmbiibhi ɨzya mu nsi ɨnɨ.