Alembe nanshi ʉNgʉlʉbhɨ sha‑ahwanza
3
Ɨshi mwanzaje aga hu mwanya,
ʉhwo ʉKilisiti akhɨɨye hu nʼkhono ʉgwa hu lɨɨlo ʉgwa Ngʉlʉbhɨ,
apantu apɨ nshɨnshɨ tee,
pɨpo muzyʉsɨɨwe peeka nʉ Kilisiti.
2 Sɨbhɨlɨlaji ga gali hu mwanya,
mugandi asɨbhɨɨlɨle amabhiibhi aga mu nsi ʉmu.
3 Ɨnjanjile ɨsho hu nongwa ya‑aje,
ʉwʉʉmi weenyu ʉwɨ mandɨ wufwiye,
ʉwʉʉmi weenyu ʉpya hukhale peeka nʉ Kilisiti pitagaalila lya Ngʉlʉbhɨ.
Leelo ʉwʉʉmi ʉwo ʉpya saga wuloleha na maaso.
4 Ʉwʉʉmi weenyu wufumilana nʉ Kilisiti.
Hu habhaazyo lwa‑aloleha mu nsi nantele,
ɨshi ɨpo namwɨ mwahayiloleha peeka nawo mu mwamu waakwe.
5 Ɨshi muleshe abhombele amabɨlɨ geenyu hu mbiibhi ɨzya mu nsi,
nanshi ʉweegu,
ʉwaavu,
ɨnsʉngwo ɨmbiibhi,
ɨnsɨɨbho ɨmbiibhi na‑anyonywe ɨvya mu nsi,
pɨpo anyonywe ʉhwo hulɨngaana na‑apuute abhangʉlʉbhɨ.
6 Hu nongwa ɨyo,
ʉNgʉlʉbhɨ ahayihubhafunda abhantu ɨbho saga bhahunʼtiniha.
7 Ɨmandɨ,
namwɨ mwahabhombaga ɨgo,
lwa mulemba alɨngaane nɨ‑ɨgo pɨpo gahabhatabhaalaga.
8 Ɨshi leelo muleshe ɨnjendo nanshi ɨzi zyonti,
ʉzanzabhazu,
ilyoyo,
ʉbhiibhi,
ɨndigo nɨ njango ɨmbiibhi ɨzyɨ nsoni ɨzyo saga zihwanziwa ayangwe.
9 Mugandi ayanjilane ilenga hu nongwa ya‑aje muleshile ʉwuntu weenyu ʉwɨ mandɨ peeka nɨ mbombo zyakwe,
10 nantele mwambɨlɨɨye ʉwuntu weenyu ʉwɨ‑ɨshi.
ɄNgʉlʉbhɨ alɨngaanya ʉwuntu weenyu ʉwɨ‑ɨshi muuhati yeenyu,
na hubhabhombe huje mulɨngaane tee nʉ mwene ʉyo Mʼpeli weenyu,
aje mwonjele humʼmanye shinza.
11 Ɨshi hu nongwa ɨyo,
nawumo ʉlegano ʉwa Bhayahuudi na bha saga Bhayahuudi,
hwa bhaala bha bhatendiilwe ɨngoola ɨzya hwitagaalila ɨzyɨ lume nɨ‑ɨbho bha saga bhatendiilwe,
hwa bhajenu bha bhali bhapezu na bhalʉgʉ,
hwa nʼkalwe na hwa saga nʼkalwe.
Lyoli ʉKilisiti ya yʉʉyo ya‑agabhombile gonti,
nantele ali muuhati mwa bhonti.
12 Ɨshi amwɨ muli bhasalulwe bha Ngʉlʉbhɨ,
nantele bhasangalusu mwa mugɨɨnwe.
Hu nongwa ɨyo mubhanje nʉ mwoyo ʉgwɨ nkʉmbʉ,
ʉmwoyo ʉmwinza,
ahwiyiisye,
ʉwoloolo nʉ jimbiilizu.
13 Mujimbilanaje na‑akhobhoshelane,
nkashele ʉmuntu ali nɨ nongwa hwa wamwabho.
Muhwanziwa akhobhoshelane nanshi ʉMwɨnɨ sha‑ahabhakhobhoshɨɨye amwɨ.
14 Igoosi tee ashile ɨgo gonti,
mugananaje.
Ɨnjanjile ɨsho hu nongwa ya‑aje,
ʉkʉndwa wa wuhutileeta tenti peeka mu lwʉmvwano ʉlwinza sinta abhuliililwe.
15 Ʉtengaanu wa Kilisiti wubhalongozyaje mu mooyo geenyu.
ɄNgʉlʉbhɨ ahabhakwiziizye mwenti huje mubhe palishimo nanshi ɨvipelwa mu mʼbɨlɨ gweka,
huje mubhe nʉ tengaanu ʉwo.
Nantele mubhanje bhantu bha bhahunʼsalifya ʉNgʉlʉbhɨ.
16 Izwi lya Kilisiti mulikhataje tee,
mumanyizanyaaje na‑asundane hu tengamazu wonti,
ʉhwu muhunʼteelela ʉNgʉlʉbhɨ ɨnteelo ɨzyɨ nsalifyo nɨ nteelo ɨzyo zifuma hwa Mʼpepo ʉMʼfinjile peeka na hunʼsalifye hu mwoyo gwonti.
17 Gogonti ga muyanga awe abhombe,
bhombaji nanshi shɨ‑ɨhwanziwa hwa bhantu bha bhamʼmwɨtɨɨshe ʉMwɨnɨ ʉYeesu,
munʼsalifyaje ʉDaada ʉNgʉlʉbhɨ ashilile hwa mwene.
Ga gahwanziwa abhombwe hwa bhooziwa
18 Amwɨ mubhashɨ,
bhatinihaji abhalume bheenyu nanshi shɨ‑ɨhwanziwa hwa bhantu bha bhahumʼmwɨtɨha ʉMwɨnɨ ʉYeesu.
19 Namwɨ mubhalume,
bhaganaji abhashɨ bheenyu,
mugandi abhe bhakhali hu bheene.
20 Namwɨ mubhaana,
bhatinihaji abhapaafi bheenyu hu gonti hu nongwa ya‑aje,
abhombe ɨsho hwa hunʼkhondeezya ʉMwɨnɨ ʉYeesu.
21 Namwɨ mubhayise,
mugandi hubhaviisye abhaana bheenyu huje,
bhagandi atengushe amooyo.
22 Namwɨ mubhakalwe,
bhatinihaji hu gonti abhagoosi bheenyu abha mu nsi.
Mugandi abhombe ɨsho hu habhaazyo ha bhahubhalola lwene huje,
muhwilolesye hwa bheene huje,
muli bhinza.
Leelo mubhatinihaje wiila hu mwoyo gwonti,
pɨpo muhumʼpuuta ʉMwɨnɨ ʉYeesu.
23 Lyolyonti lya mubhomba,
bhombaji hu mwoyo gwonti.
Bhombaji hu nongwa ya‑aje muhumʼmombela yʉ Mwɨnɨ,
mugandi abhombe nanshi muhubhabhombela abhantu.
24 Mwizuhaje huje,
ʉMwɨnɨ ahayihubhapeela ɨvyo abhabhɨshɨɨye hubhapeesye,
ɨvyo wʉ gaali weenyu.
Muhumʼmombela ʉMwɨnɨ ʉKilisiti.
25 Leelo wowonti wa‑abhomba ɨmbiibhi ahayambɨɨlɨla alɨngaane nɨ mbiibhi zyakwe,
pɨpo ʉMwɨnɨ saga abaagula.a