4
Namwɨ mubhagoosi bha bhakalwe,
bhabhombelaji abhakalwe bheenyu hu winza wonti nʉ golosu.
Mwizuhaje huje,
namwɨ shɨnɨɨsho muli nawo ʉMwɨnɨ ʉwa hu mwanya.
Ɨndajizyo zya Paulo hwa Bhakolosaayi
2 Mumʼpuutaje ʉNgʉlʉbhɨ ɨnsiku zyonti,
mubhanje maaso mu mpuuto,
nantele munʼsalifyaje.
3 Mutiputilaje natɨ huje,
ʉNgʉlʉbhɨ atigulile idala ɨlya‑alʉmbɨɨlɨle izwi lyakwe,
hwa huje ɨmfiso zya Kilisiti.
Anɨ ɨnkʉngwɨlwe mu hoobhe hu nongwa ya‑alʉmbɨɨlɨle izwi ɨlyo.
4 Mupuutaje huje,
ɨmbilulile pa pazelu nanshi shɨ‑ɨhwanziwa.
5 Mubhe nɨ njendo ɨnyinza ɨzyɨ tengamazu pitagaalila lya bhantu bha saga bhooziwa,
na huhabhombele shinza tee ahabhaazyo ha muhuhaaga.
6 Amazwi geenyu hwa bheene gabhanje nɨ mpyana ɨnsiku zyonti nantele ga gahwavwa.
Mumanye hubhaamule shinza abhantu bhonti.
Amazwi aga hu malishilo
7 Ʉnʼkʉndwe ʉwamwetu ʉTikiiko,
ʉmʼmomvi ʉnʼnʉnjɨsu ʉyo tibhomba ɨmbombo ya Mwɨnɨ ʉYeesu peeka,
ahayihubhabhʉʉzya ɨnongwa zyanɨ zyonti.
8 Ɨnʼsonteleziizye ʉyo huliimwɨ huje,
ayɨnze abhabhʉʉzye ɨnongwa zyetu na hubhajinjizye amooyo geenyu.
9 Ahwɨnza peeka nʉ Oneesimo,
ʉholo weetu ʉnʼkʉndwe ʉnʼnʉnjɨsu,
nantele muntu wʉ‑ʉhwo huliimwɨ.
Abheene bhahayihubhabhʉʉzya zyonti zya zibhombeha ɨpa.
10 ɄAlisitaalʉko,
ʉyo akʉngwɨlwe peeka naanɨ mu hoobhe,
ahubhalamuha.
Wope ʉMaalʉko,
ʉvyala wa Balinaaba,
ahubhalamuha.
Amwɨ mwambɨlɨɨye nzɨɨla ɨndajizyo hu nongwa ya Maalʉko,
ɨshi mumʼmwambɨɨlɨle shinza nkashele wɨnza ʉhwo.
11 Wope ʉYeesu wa bhayiga Yuusito,
ahubhalamuha.
Mu Bhayahuudi bha bhambɨlɨɨye ʉlwɨtɨho,
ɨbha bhataatu lwene bha bhabhomba ɨmbombo ɨyɨ wumwɨnɨ ʉwa Ngʉlʉbhɨa peeka naanɨ.
Nantele bhahunaavwa anɨ tee.
12 ɄEpaafula ʉmʼmomvi wa Yeesu ʉKilisiti,
ʉmuntu wa‑afuma ʉhwo huliimwɨ,
ahubhalamuha.
Hu habhaazyo honti ahwifumya hubhapuutile amwɨ huje,
mukhamantanaje na‑ajine mu lwɨtɨho,
na‑abhe nʉ dandamazu hu gonti ɨgo ahwanza ʉNgʉlʉbhɨ.
13 Ɨsimishizya huje ahwifumya hu dandamazu abhombe ɨmbombo hubhaavwe amwɨ na bhantu abha hwi‑ibooma ɨlyɨ Lawodikiya na bha hwi‑ibooma ɨlyɨ Hiyelapooli.
14 ɄLuuka ʉnʼganga weetu ʉnʼkʉndwe nʉ Deema bhahubhalamuha.
15 Mubhalamuhaje abhaholo bheetu mu lwɨtɨho abha hwi‑ibooma ɨlyɨ Lawodikiya.
Nantele munʼnamuhaje ʉNimfa,
peeka nɨ shibhanza ɨsho shikhomaana mu nyumba yaakwe.
16 Ɨkalaata ɨnɨ lwa yabhaaziwa huliimwɨ,
mubhombe lyolyonti huje ɨkalaata ɨyo ɨbhaaziwe hwope hu bhooziwa abhɨ shibhanza ɨsha hwi‑ibooma ɨlyɨ Lawodikiya.
Namwɨ nantele,
shɨɨsho mwanze idala ɨlya‑abhaazye ɨkalaata ya nahabhasimbiiye abheene.
17 Mumʼmʉʉzye ʉAlikiipo huje,
amale shinza ɨmbombo ya‑ahapewiilwe nʉ Mwɨnɨ.
18 Anɨ nɨPaulo ɨnsimbile ɨndamuho ɨzi hu nʼkhono gwanɨ nɨɨnɨ.
Ɨshi mwizuhaje huje,
ɨnkʉngwɨlwe mu hoobhe.
Ɨmpyana ɨya Mwɨnɨ ʉYeesu ɨbhanje peeka naamwɨ mwenti.