Ʉkhamantanu mu lwɨtɨho mwa Kilisiti
2
Ɨhwanza aje mumanye,
huje ɨhwifumya abhombe ɨmbombo hwi‑ikhone hu nongwa yeenyu na hu nongwa ya bhantu abha hwi‑ibooma ɨlyɨ Lawodikiya na bhanjɨ bhonti bha saga titangɨɨne nka lumo.
2 Ɨbhomba ɨshi huje amooyo geenyu gajinjiziwe.
Nantele mubhʉngaane peeka mu kʉndwa na‑abhe nʉ manyiihanyi hu winji ʉwo wuhubhapeela ɨlyoli.
Ɨpo pa munza‑amanye ɨnongwa zya Ngʉlʉbhɨ ɨzya hu mfiso,
hwa huje ʉKilisiti yʉʉyo.
3 Muuhati yaakwe mwa zifisiilwe ɨmfuha zyonti ɨzyɨ tengamazu nʉ manyiihanyi.
4 Ɨhubhabhʉʉzya izwi ɨli huje ʉmuntu agandi hubhagobele na mazwi agi‑ilenga,
hwope nkashele galoleha huje minza tee.
5 Ɨyanga ɨsho,
pɨpo peeka na‑aje saga ɨndi peeka naamwɨ shimʼbɨlɨ,
leelo ɨhubhasɨbhɨɨlɨla amwɨ hu habhaazyo honti.
Ɨseshela,
pɨpo ɨnʉmvwɨzye ʉlwʉmvwano lwenyu na shiila sha mukhamantana mu lwɨtɨho lwenyu mwa Kilisiti.
Ʉlemvu ʉwinza mwa Kilisiti
6 Ɨshi,
jendelelaji humʼmɨnjɨɨlɨzye ʉmwene hu nongwa ya‑aje,
mumʼmwɨtɨɨshe ʉYeesu ʉKilisiti huje yʉ Mwɨnɨ.
7 Mwɨmɨɨlɨle hu dandamazu mwa mwene,
nantele mukhamantanaje mu lwɨtɨho nanshi sha mwahamanyiiye na‑abhe bhantu bha bhahunʼsalifya ʉNgʉlʉbhɨ tee.
8 Mubhe maaso ʉmuntu wowonti agandi hubhateezye hu manyizyo ɨzyɨ malenga zya saga zigabhaavwa.
Ɨmanyizyo ɨzyo zifumilana nɨ manyizyo zyɨ miiho ga bhantu,
zya mu nsi lwene.
Nantele saga zifuma hwa Kilisiti.
9 Ɨshi mugandi agobelwe,
pɨpo ʉlʉnjɨsu wonti ʉwa Ngʉlʉbhɨ wuli mu mʼbɨlɨ gwa Kilisiti yʉʉyo.
10 Amwɨ muwaajile ʉlʉnjɨsu wonti ʉwɨ wʉʉmi hwi‑idala ɨlya‑abhʉngaane peeka nʉ Kilisiti.
Ʉmwene yʉ nʼgoosi wa bhalongozi na bhi‑ikhone bhonti.
11 Ɨshi,
lwa mwapatiihanywa nʉ Kilisiti,
mwahatendiilwe ɨngoola ɨzya hwitagaalila ɨzyɨ lume,
a ɨmbombo ya saga yahabhombwilwe na bhantu,
leelo yahabhombwilwe nʉ Kilisiti yʉʉyo.
Atendwe ʉhwo hwa huje,
afyʉlwe afume mu wuntu ʉwɨ mbiibhi.
12 Hwi‑idala ɨlya hwozewe,
mwahafwiye na‑asyɨlwe peeka nʉ Kilisiti,
nantele mwahazyʉshɨle peeka nawo,
hu nongwa ya‑aje,
mwahasʉbhɨɨye ikhone lya Ngʉlʉbhɨ ʉyo ahanʼzyʉsyɨzye afume hwa bhafwe.
13 Ɨmandɨ amwɨ mwahali nanshi abhafwe hu nongwa yɨ mbiibhi zyenyu,
nantele hu nongwa ɨyo,
mwahali nanshi abhantu bha saga bhatendiilwe ɨngoola ɨzya hwitagaalila ɨzyɨ lume.
Ɨshi leelo,
ʉNgʉlʉbhɨ abhapiiye ʉwʉʉmi peeka nʉ Kilisiti lwa‑ahatikhobhoshɨɨye ɨmbiibhi zyetu zyonti.
14 ɄNgʉlʉbhɨ ahazyefwizye ɨnsimbo ɨzyɨ ndajizyo ɨzyo zyahali zihutitaaka hu nongwa yɨ mbiibhi zyetu,
hwi‑idala ɨlya‑akhomeelwe hwa Yeesu pa shikhobheehanyo.
15 Pa shikhobheehanyo ɨpo,
ʉKilisiti ahamenile ɨmpepo zya zilongozya na bhi‑ikhone,
ahakenyensya pa pazelu.
Ʉsatulwe afume mu miiho
16 Ɨshi ʉmuntu wowonti agandi hubhalonje amwɨ hu nongwa yɨ miiho agɨ vyalye awe ɨvimwelo,
awe ɨnsiku ɨzyɨ vikulukulu ɨvyɨ mpuuto,
awe ɨvyɨ mwezi ʉmʼpya awe isiku ɨlyɨ Sabaato.b
17 Amiiho ɨgo gahali nanshi izyʉngʉʉzi ɨlyo aBhayahuudi bhahasʉbhɨɨye ahwɨnze.
Leelo ɨnongwa ɨzyɨ nalyoli ziloleha hwa Kilisiti.
18 Mugandi ahwɨtɨshe alongwe nʉ muntu wowonti wa‑ahwibhɨɨha nkati mwoloolo nantele ahubhapuuta abhantumi.
c Ayiga ali ni‑ikhone ɨlya‑amanyizye pɨpo alolile ɨndoleshelo.
d Ɨnjeele zya muntu ʉyo,
zyɨ shikwesu,
hwope ɨnsɨɨbho zyakwe mbiibhi zya mu nsi ʉmu.
19 Nantele ahwiyefwizye mwa Kilisiti ʉyo ahubhalongozya abhantu bhaakwe nanshi itwe sha lilongozya ʉmʼbɨlɨ.
Afume hwa Kilisiti ʉmʼbɨlɨ gwonti guhwambɨɨlɨla ɨshalye na‑alembe,
ɨvipelwa nɨ hole vipatiihana na hwavwane.
Ɨshi,
ʉmʼbɨlɨ gwakwe gwonti gukula shinza nanshi ɨsho ʉNgʉlʉbhɨ ahwanza.
20 Amwɨ muli nanshi abhantu bha bhahafwiye peeka nʉ Kilisiti,
lwa‑ahabhafyʉlɨle afume mu njendo ɨmbiibhi ɨzyɨ miiho ga bhantu pa shikhobheehanyo.
Ɨshi yeenu ɨnjendo zyenyu zili nanshi zya bhantu abha mu nsi?
Yeenu leelo mubhɨnjɨɨlɨla amiiho ga gayiga,
21 “Mugandi akhate ɨha,
mugandi apalamansye,
hwope mugandi alye ɨshalye ɨshi!”
22 Ɨgo gonti ndajizyo nɨ manyizyo zya bhantu lwene,
nantele zikhajiilizya akhate ɨndajizyo hu vintu vya vinanjiha lwa vyabhombelwa.
23 Lyoli,
abhantu bha bhabhɨnjɨɨlɨla amiiho ɨgo,
bhaloleha huje,
bhali nʉ tengamazu.
Bhabhɨnjɨɨlɨla ɨmpuuto zya bhahwibhɨshɨɨye bhɨɨbho,
nantele bhali nʉ woloolo ʉwi‑ilenga na hugatabhaale amabɨlɨ gaabho hu khali.
Leelo amiiho ɨgo saga gabhajiiye azije ɨnsʉngwo ɨmbiibhi ɨzyɨ mʼbɨlɨ.