Ɨkalaata ɨya nʼsontwa ʉPaulo hwa
Bhakolosaayi
ɄPaulo ahubhalamuha aBhakolosaayi
1
Ɨkalaata ɨnɨ ɨfumile huliinɨ anɨ nɨPaulo,
nɨnʼsontwa wa Yeesu ʉKilisitia nanshi ʉNgʉlʉbhɨ sha‑ahwanza.
Anɨ peeka nʉ holo weetu mu lwɨtɨho ʉTiimoti,
2 tihubhasimbila amwɨ mwa mukhala mwi‑ibooma ɨlyɨ Kolosaayi,
amwɨ mwa muli bhooziwa bhamwetu bhalʉnjɨsu mwa Kilisiti.
Ɨmpyana nʉ tengaanu afume hwa Ngʉlʉbhɨ,
ʉDaada weetu,
vibhanje peeka naamwɨ.
Ɨmpuuto nɨ nsalifyo
3 Lwa tihubhapuutila amwɨ,
tihunʼsalifya ʉNgʉlʉbhɨ,
ʉDaada wa Mwɨnɨ weetu ʉYeesu ʉKilisiti,
ɨnsiku zyonti.
4 Tibhomba ɨsho,
pɨpo tʉmvwɨzye huje muhumʼmwɨtɨha tee ʉYeesu ʉKilisiti na hubhagane abhooziwa bhonti mwa Ngʉlʉbhɨ.
5 Ʉlwɨtɨho lwenyu nʉ kʉndwa weenyu vifumilana nʉ lusʉʉbhɨlo ʉlwɨ wʉʉmi ʉwo ʉNgʉlʉbhɨ abhabhɨshɨɨye nzɨɨla hu mwanya.
Mwʉmvwɨzye ɨnongwa ɨzyo ɨzyɨ lusʉʉbhɨlo afume hu wandilo lwa mwahalʉmbɨlɨɨlwe izwi ɨlyɨ lyoli,
hwa huje ɨNongwa ɨNyinza ɨzya Yeesu ʉKilisiti.
6 Ɨnongwa ɨzyo zya zyahalʉmbɨlɨɨlwe huliimwɨ,
zinyampɨɨne mu nsi zyonti.
Ɨshi zihubhagalulanya abhantu,
nanshi shiila sha zyahabhagalulɨɨnye amwɨ afume isiku ɨlyo lya mwahʉmvwɨzye na huyaaganye ɨlyoli hu nongwa ya Ngʉlʉbhɨ nɨ mpyana yaakwe ɨnyinza shɨ‑ɨli.
7 Mwahamanyiiye ɨNongwa ɨNyinza ɨzyo afume hwa Epaafula.
Ʉmwene wamwetu nʼkʉndwe,
nantele mʼmomvi wa Kilisiti,
ahubhabhombela amwɨ hu lʉnjɨsu.
8 Ʉmwene atibhʉzɨɨzye ɨnongwa ɨzyɨ kʉndwa weenyu ʉwo wufumilana nʉ Mʼpepo ʉMʼfinjile.b
9 Ɨshi hu nongwa yɨ‑ɨgo,
afume hu habhaazyo ɨho lwa tahʉmvwɨzye ɨnongwa zyenyu,
tihubhapuutila ɨnsiku zyonti.
Tipuuta huje ʉNgʉlʉbhɨ abhapeele ʉmanyiihanyi wonti hu gaala ga‑asʉngwa ʉmwene,
hwa hubhapeele ʉtengamazu wonti nɨ njeele afume hwa Mʼpepo ʉMʼfinjile.
10 Ɨshi tipuuta ɨsho huje mulembaje ʉlemvu ʉwa humʼmwamishe ʉMwɨnɨ ʉYeesu na‑abhombe ga gahunʼkhondeezya ʉmwene shila lidala.
Mubhombaje ɨgo huje mufishile abhombe ɨmbombo ɨnyinza ɨzyɨ waaji wuwinji na hwonjeelele humʼmanye ʉNgʉlʉbhɨ.
11 Tihubhapuutila huje ʉNgʉlʉbhɨ abhavwaje hwi‑ikhone lyɨ mwamu waakwe huje mujimbililaje hu gonti.
12 Munʼsalifyaje ʉDaada ʉNgʉlʉbhɨ hu luseshelo,
pɨpo abhabhɨshɨɨye amwɨ aje mwambɨɨlɨle gaala ga‑ahalapile hubhapeele abhooziwa bhaakwe mu wumwɨnɨ ʉwɨ lukhozyo.
13 Ahatifyʉlɨle afume mwi‑ikhone ɨlyɨ hiisi,
ahatisaamya na hutitʉʉsye mu wumwɨnɨ ʉwa Mwana waakwec ʉnʼkʉndwe.
14 Ashilile hwa Mwana waakwe ʉyo,
tisatuliilwe,
hwa huje tikhobhosheliilwe ɨmbiibhi zyetu.
Ɨmbombo nʉ mwamu wa Kilisiti
15 ɄNgʉlʉbhɨ aloleha ashilile hwa Mwana waakwe,
hwope nkashele saga tibhajiiye hunʼnole ʉNgʉlʉbhɨ.
ɄMwana waakwe ali ni‑ikhone hu vipelwa vyonti.
16 Ashilile hwa mwene,
ʉNgʉlʉbhɨ ahapelile ɨvintu vyonti,
vya vili hu mwanya,
nɨ‑ɨvyo vili mu nsi,
vya viloleha na vya saga viloleha,
hwa huje,
ɨmpepo zya zilongozya,
awe abhamwɨnɨ,
awe abhagoosi,
awe abhi‑ikhone.
ɄNgʉlʉbhɨ ahapelile vyonti ashilile hwa Mwana waakwe,
nantele hu mwamu wa Mwana waakwe.
17 Ʉmwene ahalɨɨho vyonti lwa visɨɨle apelwe,
nantele ʉmwene ya yʉʉyo ahavibhɨɨshɨle ɨvintu vyonti
akhale pa pahwanziwa.
18 Ʉmwene ali nanshi itwe mu mʼbɨlɨ,
hwa huje,
nʼgoosi wɨ shibhanza.
Ʉmwene yʉ wandilo wɨ wʉʉmi,
nantele wa hwande azyʉshe afume hwa bhafwe,
huje abhe nʼgoosi hu vyonti.
19 ɄNgʉlʉbhɨ mwene ahakhondeziiwe huje,
ʉlʉnjɨsu waakwe wonti wukhale mwa Mwana waakwe ʉYeesu.
20 Nantele ʉNgʉlʉbhɨ ahakhondeziiwe huje,
hwi‑idala ɨlya Yeesu avipatiihanye ɨvintu vyonti nʉ mwene,
ɨvintu vya vili mu nsi ʉmu na viila vya vili hu mwanya.
Ɨshi ʉhwo hwa huje ahabhɨɨshɨle ʉtengaanu
ashilile idanda lya Mwana lya lyahitiishe pa shikhobheehanyo.
21 Ɨmandɨ,
amwɨ mwahali hutali nʉ Ngʉlʉbhɨ,
nantele mwahali bhalʉgʉ bhaakwe,
hu nongwa yɨ nsɨɨbho nɨ njendo zyenyu ɨmbiibhi.
Leelo ɨshi,
ʉNgʉlʉbhɨ abhapatihɨɨnye nʉ mwene
22 hwi‑idala ɨlyɨ mʼbɨlɨ gwa Kilisiti,
hwa huje afwe hwakwe.
Ahabhombile ɨsho huje,
abhaleete pitagaalila lyakwe sha muli bhasangalusu,
sinta malando awe ɨmbuno.
23 Ɨshi mujendelelaje akhale mu gaala ɨgo muhwɨtɨha,
mukhamantanaje na‑abhe ni‑ikhone.
Mugandi ahwɨtɨshe aleshe ʉlusʉʉbhɨlo ʉlwo mwahambɨlɨɨye lwa mwahʉmvwɨzye ɨNongwa ɨNyinza ɨzya Yeesu ʉKilisiti.
Ɨzi zyɨ Nongwa ɨNyinza ɨzyo zyahalʉmbɨlɨɨlwe hwa bhantu bhonti abha mu nsi,
nantele ɨzyo Nongwa Nyinza ɨzyo ɨlʉmbɨɨlɨla anɨ nɨPaulo wɨ‑ɨndi mʼmomvi.
Ɨmbombo ya Paulo mu vibhanza
24 Ɨshi ɨyɨmba hu nongwa yeenyu.
Leelo ɨseshelela amayɨmba ɨgo,
pɨpo ɨhwanziwa ayɨmbe nanshi ʉKilisiti sha‑ahayɨmbɨle.
Ɨyɨmba mu mʼbɨlɨ gwanɨ hu nongwa yɨ mʼbɨlɨ gwakwe,
hwa huje shibhanza.
25 Anɨ ʉNgʉlʉbhɨ ansaluuye abhe mʼmomvi wɨ shibhanza ɨsho huje ɨmbaleetele izwi lyakwe nanshi sha lilɨɨho.
26 Izwi ɨlyo lyɨ mfiso,
lyahafisiilwe nʉ Ngʉlʉbhɨ afume halɨ na hu mpaapo zyonti,
ɨshi libhɨhwɨlwe pa pazelu hwa bhooziwa bhaakwe.
27 Ɨbho bha bhɨɨbho ʉNgʉlʉbhɨ asʉngwa hubhilulile ɨmfiso ɨyo shɨ‑ɨhwɨli.
Ɨmfiso ɨyo lizwi ɨlyo lili nʉ mwamu ʉwa‑aswijizye hwa bhantu bha saga Bhayahuudi.
Ɨmfiso ɨyo yʉ Kilisiti wa‑ali muuhati yeenyu,
ʉmwene wa‑ahubhapeela ʉlusʉʉbhɨlo ʉlwa hwambɨɨlɨle ʉmwamu.
28 ɄKilisiti ʉyo ya yʉʉyo tihubhalʉmbɨɨlɨla abhantu bhonti,
tihubhasunda na hubhamanyizye hu tengamazu wonti.
Tibhomba ɨsho huje tibhaleete bhonti pitagaalila lya Ngʉlʉbhɨ lwa bhali bhajinile hu nongwa ɨya‑apatiihanywe nʉ Kilisiti.
29 Hwɨ‑ɨli ɨbhomba ɨmbombo hu dandamazu na hwifumye hwi‑ikhone igoosi ɨlyo ʉKilisiti ahumpeela.