Ɨkalaata ɨya hwande ɨya nʼsontwa ʉPaulo hwa
Bhatesaloniike
Ʉtagaalizyo
Ɨkalaata ɨnɨ yahasimbwilwe nʉ nʼsontwa ʉPaulo hwa bhooziwa abha hu Tesaloniike, lya lyahali libooma ligoosi ɨlya hu mukowa ʉgwɨ Makedoniya, amwanya mu nsi ɨyɨ Yunaani. Ʉnʼsontwa ʉPaulo ahanzisiizye ɨshibhanza ɨsha hu Tesaloniike (bhaazya ɨMbombo ɨzya Bhasontwa 17). Ahasogola paala nalinaali, aBhayahuudi abhanjɨ lwa bhahwanza hunʼgoje. Ɨpo ahabhaazyo lwa haashila, ʉmwavwi waakwe ʉTiimoti ahɨnzɨle humʼmʉʉzye huje, abhooziwa abha hu Tesaloniike bhajendeelela nʉ lwɨtɨho hwope bhahali mu mayɨmba. Ɨshi, ʉPaulo ahasimbile ɨkalaata ɨnɨ hubhajinjizye amooyo na hugaamule ɨgo bhahamʼmʉzɨlɨzɨɨzye.
Mu kalaata ʉmu, ʉPaulo afumya ɨnsalifyo hwa Ngʉlʉbhɨ hu lwɨtɨho na hu kʉndwa ʉwo bhali nawo abhooziwa abha hu Tesaloniike, nantele ahubhiizusya ɨnjendo zyakwe ɨzyɨ shiwooziwa lwa‑ahakhalaga nabho hu Tesaloniike. Ɨshi, ahubhabhʉʉzya nanshi ɨsho zyahayibha hwa bhooziwa lwa bhaafwa nɨ‑ɨsho zyahayibhoneha hu habhaazyo ʉYeesu ʉKilisiti lwa‑ahwɨnza nantele mu nsi. Hu malishilo ahubhamanyizya nanshi ɨsho bhahwanziwa alembe hu habhaazyo ha‑asɨɨle ahwɨnze nantele mu nsi.
Ɨmbaatiho ɨzyɨ shitaabu ɨshi
1:1-10 ɄPaulo ahubhalamuha aBhatesaloniike na hunʼsalifye ʉNgʉlʉbhɨ hu lwɨtɨho lwabho
2:1-3:13 2:1-3:13 ɄPaulo ayanga ɨmbombo yaakwe hu Tesaloniike na hubhajinjizye amooyo
4:1-12 Ɨnjendo zya zihunʼkhondeezya ʉNgʉlʉbhɨ
4:13-5:11 ɄPaulo amanyizya hu nongwa yi‑isiku ɨlya hwɨnze hwa Mwɨnɨ
5:12-28 Amazwi aga hu malishilo