ɄPaulo ahunʼsʉʉbhɨla ʉKilisiti lwene
3
Ɨshi amwɨ mubhooziwa mubhamwetu,
mushanje pɨpo mupatihɨɨnywe nʉ Mwɨnɨ ʉYeesu.
Amazwi ɨgo nahabhasimbiiye,
saga ɨlita hugaweelele nantele ɨpa,
hu nongwa ɨmɨɨnye huje ganza‑adiime ʉlwɨtɨho lwenyu.
2 Mubhe maaso nɨ‑ɨbho bha bhabhomba ɨmbiibhi,
bha bhali nanshi ɨmbwa,
a bhakhajiilizya huje,
atende ɨngoola ɨya hwitagaalila ɨyɨ lumeb huleeta ʉfyʉli.
3 Enya,
atɨ tɨɨtɨ titendiilwe mu mooyo geetu,
wope Mʼpepo wa Ngʉlʉbhɨ ahutaavwa humʼpuute ʉNgʉlʉbhɨ.
Nantele,
atɨ tihwibaada pɨpo tihumʼmwɨtɨha na hunʼsʉʉbhɨle ʉYeesu ʉKilisiti,
lyoli saga tisʉʉbhɨla ɨnjendo zyetu ɨzyɨ mʼbɨlɨ huje tiwaaje ʉfyʉli.
4 Anɨ nɨɨnɨ ɨmbajiiye huzisʉʉbhɨle ɨnjendo ɨzyɨ mʼbɨlɨ.
Nkashele pabhanga nʉ muntu wa‑asɨɨbha huje akhondɨɨye abhombe ɨsho,
anɨ ɨhondɨɨye tee.
5 Anɨ nahatendiilwe ɨngoola ɨya hwitagaalila ɨyɨ lume isiku ɨlya naana afume lwa napaapwa.
Anɨ ɨndi Mwizilaeeli afume mu shikholo ɨsha Benjamiini.
Anɨ ɨndi Mwebulaniya wɨ lyoli.
Huzikhate ɨndajizyo zya Moose,
c anɨ nahazikhɨɨte shinza tee pɨpo nahali Mʼfalisaayo.d
6 Nantele nahabajile tee abhombe ɨgo nahagaga gahunʼkhondeezya ʉNgʉlʉbhɨ.
Ɨsho sha shɨɨsho shahambɨɨshɨle huje ɨmbalavye abhooziwa bha Kilisiti.
Alɨngaane na huzikhate ɨndajizyo zya Moose,
nahali muntu nʼgolosu sinta mbuno.
7 Leelo gaala gonti ga nahagabhazizyaga huje,
gahunaavwa,
ɨshi saga ɨhugabhaazizya lwonti,
hu nongwa ya gaala ʉKilisiti ga‑ambombɨɨye.
8 Nantele ɨshi saga ɨgo lwene.
Lyoli ɨhugalola aganjɨ gonti huje saga hantu huliinɨ,
nkashele ɨhugakholanya nʉ winza ʉgoosi ʉwa humʼmanye ʉYeesu ʉKilisiti,
ʉMwɨnɨ waanɨ.
Ɨngaleshile aganjɨ gonti hu nongwa yaakwe.
Ɨhugalola ɨgo gonti nanshi amavi huje ɨmʼmanye ʉKilisiti,
9 nantele ɨmpatiihanywe nʉ mwene.
Saga ɨsʉʉbhɨla nantele abhe nʼgolosu pitagaalila lya Ngʉlʉbhɨ hwa‑akhate ɨndajizyo zya Moose,
lyoli ɨsʉʉbhɨla abhe nʼgolosu hwa humʼmwɨtɨshe ʉKilisiti.
ɄNgʉlʉbhɨ ya yʉʉyo ambaziziizye abhe muntu nʼgolosu pɨpo ɨhumʼmwɨtɨha ʉKilisiti.
10 Ahantu hɨ‑ɨhwanza anɨ humʼmanye ʉKilisiti na hulimanye ikhone lya lyahanʼzyʉsyɨzye afume hwa bhafwe.
Ɨhwanza ayɨmbe nanshi ɨsho ahayɨmbɨle ʉmwene,
nantele ɨhwanza afwe nanshi ɨsho ahafwiye ʉmwene.
11 Ɨsʉʉbhɨla huje,
ɨpo nanɨ nahayizyʉsyɨwa afume hwa bhafwe.
Ajimbe afishe hu malishilo
12 Saga ɨhwibaada huje naatola awe huje,
nabha nʼnʉnjɨsu hu gonti.
Leelo ɨjendeelela ahwidandamishe huje ɨngaaje gonti ɨgo ʉYeesu ʉKilisiti ansaluuye huje ɨngaaje.
13 Amwɨ mubhooziwa mubhamwetu,
saga ɨhwibhaazizya huje ɨngaajile ɨgo gonti.
Leelo ɨbhomba ahantu heeka ɨha,
ɨndeshile asɨɨbhe ɨgo gali hwisinda,
lyoli ɨbaga huje ɨngaaje ga gali hwitagaalila.
14 Ɨkhalagana ajende huje ɨmfishe hu malishilo,
ɨnambɨɨlɨle ɨshʉʉbhalo ɨsha‑abhale hu mwanya,
ɨsho ʉNgʉlʉbhɨ atikwiziizye huje tishaaje ashilile hwa Yeesu ʉKilisiti.
15 Ɨshi atɨ ta tili bhadandamazu mu lwɨtɨho,
tisɨbhɨlɨlaje ɨsho.
Leelo nkashele musɨɨbha shɨnjɨ mu hantu hamo,
ʉNgʉlʉbhɨ ahayihubhalolesya pa pazelu huje mugamanye.
16 Leelo shinza tee huje tijendelelaje akhatiilile liila ɨlyo tilifishiiye.
Abhooziwa bhalondolezyaje ɨnjendo zya Paulo
17 Amwɨ mubhooziwa mubhamwetu,
muzilondolezyaje ɨnjendo zyanɨ na‑amanyile afume hwa bhaala ɨbho bhalondolezya ɨshifwani sha tahabhabhɨshɨɨye.
18 Ɨmbabhʉzɨɨzye ɨnongwa ɨzi hahinji,
nantele ɨweelela ayanje hu mansozi huje,
abhantu abhinji sha bhalemba bhahuzidindizya ɨnongwa ɨzya‑afwe hwa Kilisiti pa shikhobheehanyo.
19 Abhantu ɨbho bhalongolwa nɨ nsʉngwo zyabho ɨzyɨ mʼbɨlɨ,
bhahwibaada hu mbombo zyabho ɨzyo bhabhomba zya zili zyɨ nsoni.
Nantele ɨnsɨɨbho zyabho bhasɨɨbha ɨvintu ɨvya mu nsi ʉmu.
Ʉmalishilo wa bhantu ɨbho hunanjishe.