Londolezyaji ahwiyiisye nanshi ʉYeesu ʉKilisiti
2
Wɨlɨ,
ʉKilisiti ahubhadandamiha amooyo geenyu?
Nantele,
ahubhagwɨzya mu kʉndwa waakwe?
Wɨlɨ,
muli nʉ lwʉmvwano nʉ Mʼpepo ʉMʼfinjile?
a Wɨlɨ,
mukʉndwa na‑alolelwe ɨnkʉmbʉ nʉ Kilisiti?
2 Ɨgo gonti gɨ lyoli,
ɨshi nsʉngwɨzyaji tee hwi‑idala ɨlya‑abhe nʉ lwʉmvwano ʉlwinza,
ʉkʉndwa weeka,
ʉmwoyo gweka nɨ nsɨɨbho yeeka.
3 Mugandi abhe nʉ lwɨlano awe amabaado lwa mubhomba ɨmbombo yoyonti ɨla.
Lyoli shila muntu ahwiyisyaje na‑alole huje,
ʉwamwabho akhondɨɨye ashile ʉmwene yʉʉyo.
4 Shila muntu agandi ahwisɨbhɨɨlɨle yʉʉyo lwene,
lyoli shila muntu abhasɨbhɨlɨlaje na bhanjɨ.
5 Musɨɨbhaje nanshi ɨsho sha‑ahasɨɨbhaga ʉYeesu ʉKilisiti.
6 Ʉmwene,
poshe ahali Ngʉlʉbhɨ,
leelo saga ahalolile huje,
abhe Ngʉlʉbhɨ hantu ha‑alwɨle.
7 Leelo ahahwibhɨɨha saga hantu,
hwa hwibhɨɨshe abhe mʼmomvi,
na‑apaapwe abhe muntu.
Lwa wabha muntu lwonti,
8 ahahwiyiisya pa nsi tee,
ahanʼtiniishe ʉNgʉlʉbhɨ afishe afwe,
afishe agogwe pa shikhobheehanyo!b
9 Ɨpo ʉNgʉlʉbhɨ ahamʼmwamisya tee,
ahamʼpeelile itaawa imwamu ashile aganjɨ gonti.
10 ɄNgʉlʉbhɨ ahabhombile ɨsho huje
ɨvipelwa vyonti vinʼsugamililaje,
vibhe vya hu mwanya,
awe ɨvya mu nsi,
awe ɨvya huzimu.c
11 Nantele,
shila muntu alaataje huje,
ʉYeesu ʉKilisiti yʉ Mwɨnɨ,
hu nongwa ya‑amwamihwe ʉDaada ʉNgʉlʉbhɨ.
Abhooziwa bhabhanje lukhozyo mu nsi
12 Ɨshi bhakʉndwe bhaanɨ,
hu habhaazyo ha tahali peeka,
mwahanʼtinihaga ʉNgʉlʉbhɨ hu habhaazyo honti.
Shɨnɨɨsho,
poshe ɨshi hu habhaazyo hɨ‑ɨndi hutali naamwɨ,
mujendelelaje abhombe ɨgo gahwanziwa hwa bhantu ɨbho ʉNgʉlʉbhɨ abhafyʉlɨle.
Mubhombe ɨgo hwi‑idala ɨlya‑ayinje,
ʉhwo hufumilana na humʼmwogope ʉNgʉlʉbhɨ.
13 Bhombaji ɨsho pɨpo ʉNgʉlʉbhɨ wa‑abhomba ɨmbombo mwaliimwɨ,
ahubhapeela amaha aga hwanze hunʼtinishe na‑abhombe gaala ga gahunʼkhondeezya.
14 Zyonti ɨzyo mubhomba,
muzibhombaje sinta mbuno,
awe adaliihane,
15 huje mubhe bhagolosu nantele sinta mbuno.
Ɨpo munza‑abhe bhaana bha Ngʉlʉbhɨ bha bhali sinta malando hu habhaazyo ha mulemba mu nsi ɨya bhantu abhabhiibhi.
Muuhati ya bhantu ɨbho,
amwɨ muloleha nanshi ɨhozyo sha zikhozya mu nsi,
16 hwa‑akhatiilile izwi lya lihubhapeela ʉwʉʉmi.
Ɨpo pa pɨɨpo nanɨ nahayihulyaga idala ɨlya hwibaade isiku ɨlyo ʉKilisiti lya‑ahayiweela.
Ɨnjanjile ɨsho,
pɨpo yahayilolesya huje ʉdandamazu waanɨ nɨ mbombo yaanɨ saga vyahali vyɨ lwene.
17 Ʉlwɨtɨho lwenyu hwa Ngʉlʉbhɨ na humʼmombele hwenyu vilɨngaana nɨ nsangu,
d ahantu heenyu ahɨ nshɨnshɨ ɨho muhumʼfumizya.
Hwope nkashele bhambude,
ʉfwe waanɨ wuli nanshi ɨnsangu ɨyɨnjɨ,
ɨyo ɨyonjeziiwe mu nsangu zyenyu.
Ɨsho sha shɨɨsho ɨseshela tee peeka naamwɨ mwenti.
18 Ɨshi namwɨ mukhondɨɨye aseshele shɨɨsho peeka naanɨ.
ɄPaulo ahunʼsonteelezya ʉTiimoti nʉ Epafulodiito
19 Ɨsʉʉbhɨla huje ʉMwɨnɨ ʉYeesu nkashele wasʉngwa,
nahayihunʼsonteelezya ʉTiimoti ayɨnze huliimwɨ shɨnɨɨshi,
huje abhajinjizye amooyo.
Nantele pamandɨ anjinjizye ʉmwoyo nanɨ lwa waweela ambʉʉzye ɨnongwa zyenyu.
20 Saga ɨndi nawo ʉmuntu ʉwɨnjɨ nanshi ʉmwene wa tibhomba peeka,
wa‑abhajiiye hubhasaajile tee.
21 Abhanjɨ bhonti bhasaaga ɨvyabho lwene,
leelo saga bhabhomba ɨgo ʉYeesu ʉKilisiti ga‑ahwanza.
22 Leelo amwɨ mumɨɨnye ɨsho ʉTiimoti sha‑ahwilolesiizye huje muntu mwinza.
Abhombile ɨmbombo ɨya‑anyampaanye ɨNongwa ɨNyinza ɨzya Yeesu ʉKilisiti peeka naanɨ nanshi ʉmwana nʉ yise waakwe.
23 Ɨshi,
ɨsʉʉbhɨla hunʼsonteelezye ʉyo shɨnɨɨshi,
lwa naamanya ga gahayihunaaga.
24 Ɨhunʼsʉʉbhɨla ʉMwɨnɨ huje hwope nanɨ nɨɨnɨ saga nahayikhaabha ahwɨnze ʉhwo.
25 Leelo ɨshi,
ɨndolile huje,
ɨkhondɨɨye ahunʼsonteelezye ʉholo weetu ʉEpafulodiito,
ʉyo mwahanʼsonteleziizye huliinɨ nɨ vintu ɨvya hunaavwe anɨ.
Ʉmwene mʼmomvi wamwetu,
ʉyo ya yʉʉyo tihwidandamiha peeka nanshi abhalwi bha bhalwɨla ɨNongwa ɨNyinza.
26 Ɨhunʼsonteelezya pɨpo anyonywa hubhalole amwɨ mwenti,
nantele ʉmwoyo gwakwe guzugumiiye alɨngaane na‑aje mwahʉmvwɨzye huje,
ahabhinile.
27 Ahali mʼminu tee,
nantele ahapalamiiye afwe.
Leelo ʉNgʉlʉbhɨ ahatilolɨɨye ɨnkʉmbʉ atɨ tenti huje,
ʉzugumizu waanɨ wugandi ahwonjeelele hahinji.
28 Ɨshi,
ɨhwanza tee hunʼsonteelezye huliimwɨ,
huje hu habhaazyo ha mwahayihunʼnola,
mwahasʉngwaje.
Nanɨ ʉzugumizu waanɨ nka wʉndaje.
29 Mʼmwambɨlɨlaji nanshi ʉmwoziwa mwa Mwɨnɨ hu nseho tee.
Muhwanziwa hubhapeele ɨnshɨnshɨ abhantu bha bhali nanshi ʉyo,
30 pɨpo ahapululiiye afwe hu nongwa yɨ mbombo ya Kilisiti.
Nantele saga ahasajiiye ʉwʉʉmi waakwe,
hu nongwa ya hunaavwe gaala ga mwahapotiilwe humbombele amwɨ pɨpo mwahali hutali.