4
Ɨshi,
amwɨ mubhooziwa mubhamwetu bhakʉndwe,
ɨnyonywa tee alolane naamwɨ.
Amwɨ muli luseshelo lwanɨ nantele mpeesya yaanɨ ɨyo ɨnambɨlɨɨye hu mbombo ɨyo ɨmbombile.
Ɨshi bhakʉndwe bhaanɨ,
mujendelelaje shɨɨsho ahwɨmɨɨlɨle hu dandamazu hunʼsʉʉbhɨle ʉMwɨnɨ ʉYeesu.
ɄPaulo ahubhalajizya aBhafiliipi
2 Ɨhunʼnaabha ʉEwodiya nʉ Sintike huje bhɨtɨɨhane,
pɨpo bhamʼmwɨtɨɨshe ʉMwɨnɨ ʉYeesu.
3 Nawe holo waanɨ nʼsundwa,
ɨhulaabha huje,
ʉbhaavwe ahwɨtɨɨhane abhashɨ ɨbho bhabhɨɨlɨ.
Ɨhulaabha ɨsho,
pɨpo bhahabhombile ɨmbombo ɨya‑anyampaanye ɨNongwa ɨNyinza ɨzya Yeesu ʉKilisiti hu dandamazu peeka naanɨ.
Tahali peeka nʉ Kelementi na bhabhomvi abhamwetu abhanjɨ bhonti.
Amataawa gaabho gasimbwilwe mu shitaabu ɨshɨ wʉʉmi.a
4 Seshelaji mwa Mwɨnɨ ʉYeesu ɨnsiku zyonti,
nantele ɨnjiga seshelaji!
5 Ʉwoloolo weenyu wumanyihaje hwa bhantu bhonti.
ɄMwɨnɨ ʉYeesu apalamiiye ahwɨnze.
6 Mugandi asaaje hu hantu hohonti,
lyoli hu shila hantu nʼnaabhaji ʉNgʉlʉbhɨ hu gaala ga muhwanza,
peeka na hunʼsalifye.
7 Wope ʉtengaanu wa Ngʉlʉbhɨ,
wa wushila ɨnjeele zyonti ɨzya bhantu,
wunza‑alɨndɨɨlɨle shinza amooyo geenyu nɨ nsɨɨbho zyenyu hu nongwa ya huje mupatihɨɨnywe nʉ Yeesu ʉKilisiti.
8 Ɨshi leelo,
bhooziwa bhamwetu,
mugasɨbhɨɨlɨle ɨga ga gali gɨ lyoli,
ga gali gɨ nshɨnshɨ,
agɨ sangalusu,
ga saga gali nʉ bhiibhi wowonti,
ga gakhondɨɨye,
ga gakhondɨɨye atinihwe,
ga gali minza tee,
nɨ‑ɨgo ga gakhondɨɨye asʉmbwe.
9 Bhombaji gaala ga mwahambɨlɨɨye na hwʉmvwe afume huliinɨ na hugalole ɨbhomba.
Wope ʉNgʉlʉbhɨ wa‑ahutipeela ʉtengaanu ahayibha peeka naamwɨ.
ɄPaulo ahubhasalifya aBhafiliipi hu mpeesya zyabho
10 Ɨshi ɨndi nʉ luseshelo ʉlugoosi mwa Mwɨnɨ huje hu malishilo mwansɨbhɨɨlɨla shipya anɨ.
Lyoli mwahali muhunsɨbhɨɨlɨla na hunsaajile ɨnsiku zyonti leelo mwahapotiilwe idala ɨlya hunaavwe.
11 Lwɨ‑ɨyanga ɨsho saga huje ɨmbuliliilwe hohonti,
ndaadi!
Anɨ ɨmanyiiye ahwɨtɨɨhane na lyolyonti lya lihunɨnzɨla.
12 Ɨmɨɨnye abhuliililwe,
nantele ɨmɨɨnye abhe nɨ vinji.
Ɨmanyiiye akwɨlane hu zyonti,
ɨmanyiiye angute,
ɨmanyiiye abhe nɨ nzala,
ɨmanyiiye abhe nɨ vinji awe abhuliililwe.
13 Ɨmbajiiye abhombe zyonti ɨzyo,
pɨpo ʉKilisiti ahumpeela amaha.
14 Hwope ɨsho,
mubhombile shinza hunaavwe ɨmpeesya mu mayɨmba gaanɨ.
15 Amwɨ muBhafiliipi,
mumɨɨnye shinza mwɨmwɨ huje,
afume lwa nahandile hubhalʉmbɨɨlɨle amwɨ ɨNongwa ɨNyinza ɨzya Yeesu ʉKilisiti,
hu habhaazyo ha nahafumile hu mukowa gwenyu ʉgwɨ Makedoniya,
amwɨ mubheene mwɨmwɨ shibhanza sha shahanavwizye.
Lyoli amwɨ mubheene mwɨmwɨ tahavwɨne naanɨ ahwambɨɨlɨle na‑apeelane.
16 Ɨshi hwope lwa nahali hwi‑ibooma ɨlyɨ Tesaloniike,
mwahandetelaga ɨvintu ɨvya hunaavwe hashe.
17 Saga ɨyanga ɨsho,
pɨpo ɨhwanza ahwambɨɨlɨle ɨmpeesya ɨyɨnjɨ afume huliimwɨ,
ndaadi.
Lyoli ɨhwanza huje muzyambɨɨlɨle ɨnsayo ɨzya Ngʉlʉbhɨ afumilane nɨ nkʉmbʉ zyenyu.
18 Ɨshi,
ɨnambɨlɨɨye ɨvintu vyonti vya mwahampiiye,
nantele vinji ashile sha nahanzaga.
Ɨndi navyo vyonti,
pɨpo ʉEpafulodiito ahandetɨɨye ɨvintu vyenyu.
Ɨvintu ɨvi vili nanshi ɨnsangu yɨ‑ɨnunshila shinza,
ɨnsangu yɨ‑ɨhwɨtɨshɨlwa nʉ Ngʉlʉbhɨ na hunʼkhondeezye.
19 Wope ʉNgʉlʉbhɨ waanɨ anza hubhapeele shila sha muhwanza alɨngaane nʉ tabhazi waakwe ʉgoosi,
ashilile hwa Yeesu ʉKilisiti.
20 ɄNgʉlʉbhɨ,
ʉDaada weetu,
amwamihwaje wiila na wiila.
Aameni!
Amazwi aga hu malishilo
21 Mundamushilaje abhooziwa bhonti abha Yeesu ʉKilisiti hu Filiipi ʉhwo.
Abhaholo bha bhali peeka naanɨ ɨpa bhahubhalamuha.
22 Nantele abhooziwa bhonti bha bhakhala mwi‑ibooma ɨlyɨ Luumi bhahubhalamuha,
tee bha bhakhala mu nyumba ɨya Mwɨnɨ ʉnʼgoosi ʉKayisali.
23 Ɨmpyana ya Mwɨnɨ ʉYeesu ʉKilisiti ɨbhanje peeka naamwɨ.