Ɨkalaata ɨya nʼsontwa ʉPaulo hwa
Bhafiliipi
ɄPaulo ahubhalamuha aBhafiliipi
1
Ɨkalaata ɨnɨ ɨfumile huliinɨ anɨ nɨPaulo peeka nʉ Tiimoti,
tibhabhomvi bha Yeesu ʉKilisiti.
a Tihubhasimbila amwɨ mwenti mubhooziwa mwa muhumʼmwɨtɨha ʉYeesu ʉKilisiti mwa mukhala mwi‑ibooma ɨlyɨ Filiipi,
peeka na bhenyeelezi bheenyu na bhaavwi abhɨ shibhanza.
2 Ɨmpyana nʉ tengaanu afume hwa Ngʉlʉbhɨ,
ʉDaada weetu,
na hwa Mwɨnɨ weetu ʉYeesu ʉKilisiti,
vibhanje peeka naamwɨ.
ɄPaulo ahubhapuutila aBhafiliipi
3 Ɨnsiku zyonti ɨzyo ɨhubhiizuha,
ɨhunʼsalifya ʉNgʉlʉbhɨ waanɨ.
4 Nantele,
mu mpuuto zyanɨ zyonti ɨhubhapuutila amwɨ mwenti wiila hu luseshelo.
5 Ɨseshela pɨpo amwɨ mujendeelela ahwavwane naanɨ anyampaanye ɨNongwa ɨNyinza ɨzya Yeesu ʉKilisiti.
Mubhombile ɨsho afume isiku ɨlyo mwahɨtɨɨshe ɨNongwa ɨNyinza afishe ɨleelo.
6 Nantele ɨseshela pɨpo ɨmɨɨnye hu lyoli huje ʉNgʉlʉbhɨ ʉyo wa‑ahandile ɨmbombo ɨnyinza mu mooyo geenyu,
ahayijendeelezya afishe ɨbhombeshe mwi‑isiku ɨlyo ʉYeesu ʉKilisiti ahayiweela ʉlwa bhɨɨlɨ.
7 Ɨhondɨɨye hubhasɨbhɨɨlɨle ɨsho amwɨ mwenti pɨpo ɨmbagɨɨne tee.
ɄNgʉlʉbhɨ mu mpyana yaakwe abhavwizye amwɨ mwenti peeka naanɨ abhombe ɨmbombo ɨya‑alwɨle na‑asimishizye ɨlyoli ɨyɨ Nongwa ɨNyinza ɨzya Yeesu ʉKilisiti lwɨ‑ɨnkʉngwɨlwe.
8 ɄNgʉlʉbhɨ nʼsimishizi waanɨ,
ɨsho ɨnyonywa tee alolane naamwɨ nantele,
hu kʉndwa wuwuula nanshi ʉYeesu ʉKilisiti sha‑abhagɨɨne amwɨ.
9 Ɨhubhapuutila hwa Ngʉlʉbhɨ huje ʉkʉndwa weenyu wujendeelele ahwonjeelele tee,
lwa muli mu tengamazu nʉ manyiihanyi ʉwɨ lyoli,
10 huje mumanye gaala ga gali minza.
Ɨpo pa pɨɨpo mwahayibha na mooyo aminza,
nantele mwahayibha sinta nsoni afishe isiku ɨlyo ʉKilisiti ahayiweela ʉlwa bhɨɨlɨ.
11 Nantele mubhanje nɨ njendo ɨnyinza zya muhuzyaga ashilile hwa Yeesu ʉKilisiti,
huje ʉNgʉlʉbhɨ amwamihwaje na hwɨmɨshɨlwe.
Akʉngwe hwa Paulo hu nongwa ya‑anyampaanye ɨNongwa ɨNyinza
12 Ɨshi bhooziwa bhamwetu,
ɨhwanza huje mumanye gaala ga gahanaajile gavwizye tee anyampaanye ɨNongwa ɨNyinza ɨzya Yeesu ʉKilisiti.
13 Afumilane nɨ‑ɨgo,
abhalwi bhonti abha pa shinamwɨnɨ sha mwɨnɨ ʉnʼgoosi ʉKayisali,
b peeka na bhanjɨ bhonti,
bhamɨɨnye huje,
ɨnkʉngwɨlwe hu nongwa ɨya humʼmombele ʉKilisiti.
14 Peeka nɨ‑ɨsho,
ɨmɨɨnye huje akʉngwe hwanɨ ʉhwu huhubhabhɨɨha abhooziwa abhamwetu abhinji huje bhadandamale amooyo hunʼsʉʉbhɨle ʉMwɨnɨ ʉYeesu.
Ɨshi bhawaajile ʉdandamazu ʉwa‑alʉmbɨɨlɨle abhantu ɨnongwa ɨzya Kilisiti,
sinta wooga.
15 Lyoli,
bhamo bhalʉmbɨɨlɨla ɨnongwa ɨzya Kilisiti pɨpo bhahundolela ɨjɨɨla,
nantele bhahwanza adaliihane naanɨ.
Leelo abhanjɨ bhalʉmbɨɨlɨla hu mwoyo ʉnʼgolosu.
16 Ɨbho bhalʉmbɨɨlɨla lwa bhali nʉ kʉndwa huliinɨ,
pɨpo bhamɨɨnye shinza huje ʉNgʉlʉbhɨ ahansaluuye anɨ ɨmbe mu hoobhe ʉmu,
hu nongwa ɨya‑alwɨle ɨNongwa ɨNyinza ɨzya Yeesu ʉKilisiti.
17 Leelo abhi‑idali ɨbho bhalʉmbɨɨlɨla ɨnongwa ɨzya Kilisiti hu nongwa ɨya‑alwe naanɨ,
saga hu mwoyo ʉnʼgolosu.
Bhasɨɨbha huje abhombe ɨsho bhahwonjeezya amayɨmba aga‑akʉngwe hwanɨ.
18 Leelo ha hananjiishe heenu?
Enya,
hu nsɨɨbho ɨnyinza awe hu nsɨɨbho ɨmbiibhi,
ɨnongwa ɨzya Kilisiti zilʉmbɨɨlɨlwa,
nɨ‑ɨlyo lya lihunsʉngʉʉsya.
Nantele ɨnza‑ajendeelele asʉngwe,
19 pɨpo ɨmɨɨnye huje,
hwɨ‑ɨgo gahanaajile nahayifyʉlwa hu mpuuto zyenyu na hu nyaavwo ɨya Mʼpepo ʉwa Yeesu ʉKilisiti.
20 Ɨsʉʉbhɨla na‑anyonywe tee huje nahamo ɨho hahayihundeetela ɨnsoni.
Lyoli nahayibha ɨjendeelela ahumʼmwamishe ʉKilisiti hu dandamazu hu gonti ɨgo ɨbhomba.
Ɨbhomba ɨsho hu habhaazyo honti,
ɨmbe ɨlemba awe ɨmfwe.
21 Ɨnjanjile ɨsho,
pɨpo anɨ ɨlemba hu nongwa ya Kilisiti,
c nantele nkashele ɨfwa,
afwe hwanɨ hubha hwinza.
22 Nkashele ɨmba mwʉmi,
ɨnza‑ajendeelele abaje abhombe ɨmbombo ɨya Kilisiti.
Wɨlɨ,
ɨnsalule yeenu ʉwʉʉmi nʉ fwe?
23 Ɨpa pɨ‑ɨndi,
ɨndi nago ɨgo gabhɨɨlɨ.
Ɨnyonywa afwe huje ɨmbale akhale peeka nʉ Kilisiti.
Ɨlyo hwaliinɨ lya likhondɨɨye tee.
24 Leelo hu nongwa yeenyu ɨhwanziwa aje ɨmbe mwʉmi mu nsi ɨnɨ.
25 Lyoli ɨndi nʉ simishizi hu nongwa ɨyo,
ɨshi ɨmɨɨnye huje ɨmbala‑abhe mwʉmi.
Nantele ɨmbala‑abhe peeka naamwɨ mwenti,
huje ɨmbaavwe ajendeelele ajine mu lwɨtɨho lwenyu na‑abhe nʉ luseshelo.
26 Mu habhaazyo haala lwa nahayibha peeka naamwɨ mwahayiseshela tee hu nongwa ya huje,
ʉYeesu ʉKilisiti ahayibha anavwizye anɨ huje ɨmbwele huliimwɨ nantele.
27 Ha hahwanziwa tee hwa huje,
ɨnjendo zyenyu zilɨngaanaje nɨ manyizyo ɨnyinza ɨzya Kilisiti.
Ɨpo nkashele ɨnɨnze hubhalole awe saga ɨnɨnze,
ɨhwanza ɨnʉmvwaje huje mujendeelela abhe bhadandamazu mu nsɨɨbho yeeka hwi‑idala ɨlya‑alwɨle peeka ʉlwɨtɨho ʉlwo lufumilana nɨ Nongwa ɨNyinza ɨzya Yeesu.
28 Mugandi hubhoogope abhalʉgʉ bheenyu,
lyoli mubhe nʉ dandamazu ɨnsiku zyonti.
Ɨlyo lilolesya huje abheene bhahayiyaziwa,
nantele lilolesya huje amwɨ mwahayifyʉlwa hu nongwa ya‑aje ʉNgʉlʉbhɨ ya yʉʉyo ahubhapeela ʉfyʉli.
29 Ɨnjanjile ɨsho,
pɨpo ʉNgʉlʉbhɨ saga abhapiiye amwɨ ɨmpyana ɨya humʼmwɨtɨshe ʉKilisiti lwene,
lyoli abhapiiye hwope ɨmpyana ɨya‑ayɨmbe hu nongwa yaakwe.
30 Ɨshi,
mulwa ʉlʉgʉ wuwuula peeka naanɨ,
nanshi sha mwahandolile ɨlwa hu habhaazyo haala.
Ɨndi shɨ‑ɨlwa,
nanshi sha muhwʉmvwa.