Ɨnjendo ɨnyinza hwa bhooziwa
5
Ɨshi mubhanje mulondolezya ɨshifwani ɨsha Ngʉlʉbhɨ,
pɨpo amwɨ muli bhaana bhaakwe ɨbho abhagɨɨne tee.
2 Gananaji hu habhaazyo honti,
nanshi ʉKilisiti sha‑atigɨɨne na‑afwe hu nongwa yeetu.
Ahwifumiizye nanshi ɨnsangua ɨyɨ nunsi ʉwinza ɨyo ɨhunʼkhondeezya ʉNgʉlʉbhɨ.
3 Ɨshi nanshi shɨ‑ɨhwanziwa alembe hwa bhooziwa,
ɨnjendo zyozyonti ɨzyɨ weegu,
ɨzyɨ waavu,
awe ɨnsʉngwo ɨmbiibhi ɨyɨ vintu,
zigandi ahwʉmvwɨshe aje zibhombwa na bhooziwa.
4 Nantele mugandi ayanje amazwi agɨ nsoni,
agɨ shipezu,
hwope agɨ shaana.
Leelo munʼsalifyaje ʉNgʉlʉbhɨ hu habhaazyo honti.
5 Ɨnjanjile ɨsho huje mumanye shinza aje ʉmwegu wowonti,
awe ʉmwavu,
awe wa‑ali nɨ nsʉngwo ɨmbiibhi ɨyɨ vintu,
ɨbho bhonti saga bhahayigaala ʉwumwɨnɨ ʉwa Kilisiti nʉ wa Ngʉlʉbhɨ.
b Ʉmuntu wa‑ali nɨ nsʉngwo ɨmbiibhi ɨyɨ vintu,
nʉ‑ʉla wa‑apuuta abhangʉlʉbhɨ,
bhali hantu heeka.
6 Mugandi humʼmwɨtɨshɨle ʉmuntu wowonti hubhagobele hu mazwi agɨ shipezu.
Hu nongwa yɨ mbiibhi ɨzyo,
ilyoyo lya Ngʉlʉbhɨ lyahayihubhafunda hu khali abhantu ɨbho bha saga bhahunʼtiniha.
7 Ɨshi,
mugandi ahwavwane na bhantu bha bhabhomba amabhiibhi ɨgo.
Alembe hwa bhooziwa hubhe nanshi ʉlukhozyo
8 Ɨmandɨ amwɨ mwahalembaga mu hiisi,
leelo ɨshi,
hwi‑idala ɨlya‑apatiihanywe hwenyu nʉ Mwɨnɨ ʉYeesu,
mulemba mu lukhozyo.
Ɨshi lembaji nanshi abhantu bha bhali mu lukhozyo.
9 Ɨyanga ɨsho,
pɨpo abhantu bha bhali mu lukhozyo,
bhabhomba ɨnyinza,
agɨ golosu nɨ lyoli hu habhaazyo honti.
10 Anzaji tee hugamanye gaala ga gahunʼkhondeezya ʉMwɨnɨ ʉNgʉlʉbhɨ.
11 Mugandi ahwavwane na bhantu ɨbho bhabhomba ɨmbiibhi ɨzya mu hiisi,
leelo zikwinkulaji na‑abhe pa pazelu.
12 Lyoli,
tilola ɨnsoni huziyanje ɨzyo zibhombwa na bhantu ɨbho hu mfiso.
13 Leelo ɨmbiibhi zyabho zyonti ɨzyo lwa zivundulwa mu lukhozyo,
zyonti zyahayibhoneha pa pazelu.
14 Nkashele ʉlukhozyo lukhozye ahantu ha hali mu hiisi,
saga habha shishiila,
hope habha nʉ lukhozyo.
Ɨga ga gɨɨgo gasimbwilwe huje,
“Daamuha aawe wʉ‑ʉli nanshi ʉmuntu wa‑agonile ʉtulo!
Zyʉha aawe wʉ‑ʉli nanshi ʉmuntu wa‑afwiye.
Ɨpo ʉKilisiti wope anza hukhozye.”
15 Ɨshi leelo,
mubhanje maaso shiila sha mulemba,
mugandi alembe nanshi abhantu abhapezu,
leelo bha bhali nʉ tengamazu.
16 Bhombelaji shinza tee ahabhaazyo ɨha ha mubha naho hu nongwa ya‑aje ɨnsiku ɨzi zyɨ mbiibhi.
17 Ɨshi,
mugandi abhe bhafwasu,
leelo muhwanziwa aje mumanye gaala ʉMwɨnɨ ʉYeesu ga‑ahwanza aje mubhombaje.
18 Nantele mugandi akholwe hu nongwa ya‑aje ʉmwezi wunangaanya ʉlemvu wa muntu,
lyoli amwɨ mubhanje mulongozewa nʉ Mʼpepo ʉMʼfinjile.
19 Telelanaji ɨnteelo ɨzyɨ nsalifyo nɨ zya humʼmwamishe ʉNgʉlʉbhɨ nɨ nteelo ɨzyo ʉMʼpepo ʉMʼfinjile ahubhapeela mu mooyo geenyu.
Nantele nʼtelelaji ʉMwɨnɨ ʉYeesu hu mwoyo gwonti.
20 Nantele munʼsalifyaje ʉDaada ʉNgʉlʉbhɨ hu habhaazyo honti mu vyonti ashilile hwi‑itaawa lya Mwɨnɨ weetu ʉYeesu ʉKilisiti.
Ʉnʼnume nʉ nʼshɨ waakwe sha bhahwanziwa akhale peeka
21 Mubhanje mutiniihana pɨpo muhunʼtiniha ʉKilisiti.
22 Amwɨ mubhashɨ,
bhatinihaji abhalume bheenyu,
nanshi sha muhunʼtiniha ʉMwɨnɨ weetu ʉYeesu.
23 Ɨnjanjile ɨsho,
pɨpo ʉnʼnume ali ni‑ikhone hwa nʼshɨ waakwe,
nanshi ʉKilisiti wope sha‑ali ni‑ikhone hu shibhanza,
nantele ʉKilisiti yʉ Mʼfyʉli wɨ shibhanza,
ɨsho mʼbɨlɨ gwakwe.
24 Ɨshi,
amwɨ mubhashɨ bhatinihaji abhalume bheenyu hu gonti,
nanshi shiila ɨshibhanza sha shihunʼtiniha ʉKilisiti.
25 Namwɨ mubhalume,
bhaganaji abhashɨ bheenyu nanshi ʉKilisiti sha‑ashigɨɨne ɨshibhanza shaakwe,
ahahwifumiizye hwope afwe hwɨ‑ɨlyo.
26 Ahahwifumiizye afwe huje ashisangalusye ɨshibhanza hu mɨnzɨ na hwi‑ikhone li‑izwi lyakwe huje,
shibhe shisangalusu.
27 Ahabhombile ɨsho huje,
abhe nɨ shibhanza ɨshisangalusu sha saga shili ni‑ilando nka limo nantele sinta abhe nʉ bhiibhi wowonti awe ɨmbuno lwonti.
28 Ɨshi nanshi shiila ʉYeesu sha‑ashigɨɨne ɨshibhanza shaakwe,
bhope abhalume bhahwanziwa hubhagane abhashɨ bhaabho nanshi shiila sha bhahugagana amabɨlɨ gaabho.
Ʉmuntu wa‑ahunʼgana ʉnʼshɨ waakwe,
ahwigana yʉʉyo.
29 Nʉʉmo ʉmuntu wa‑ahuguviitilwa ʉmʼbɨlɨ gwakwe,
leelo ahugusʉnga na hugudiime shinza nanshi ɨsho ʉKilisiti wope sha‑ahushibhombela ɨshibhanza,
30 pɨpo hwa mwene atɨ tili nanshi ɨvipelwa ɨvyɨ mʼbɨlɨ gwakwe.
31 Ɨgo gali nanshi ɨsho ɨNsimbo ɨMfinjile ziyanga huje,
“Hu nongwa ɨnɨ,
ʉnʼnume ahayihunʼneha ʉyise waakwe nʉ nyina waakwe,
ahayipatiihana nʉ nʼshɨ waakwe,
bhabhɨɨlɨ ɨbho bhahayibha mʼbɨlɨ gweka.”c
32 Amazwi ɨga gali nɨ mfiso ɨngoosi,
leelo anɨ ɨyanga hu nongwa ya Kilisiti nɨ shibhanza.
33 Ɨshi ɨhubhabhʉʉzya mwenti huje shila nʼnume ahwanziwa anʼganaje ʉnʼshɨ waakwe nanshi sha‑ahwigana yʉʉyo,
wope ʉnʼshɨ ahwanziwa anʼtinihaje ʉnʼnume waakwe.