Abhooziwa bha Yeesu bhahwanziwa abhe hantu heeka
4
Ɨshi anɨ wɨ‑ɨnkʉngwɨlwe mu hoobhe hu nongwa ya humʼmombele ʉMwɨnɨ ʉYeesu,
ɨhubhalaabha tee huje mulembaje nanshi shɨ‑ɨhwanziwa alɨngaane nɨ‑ɨsho ʉNgʉlʉbhɨ abhakwiziizye.
2 Mubhanje bha hwiyiisye nantele bholoolo hu gonti.
Mujimbilanaje na‑akhobhoshelane hu lugano.
3 Muhwifumyaje asʉnje ʉlwʉmvwano ʉlwo mupewiilwe nʉ Mʼpepo ʉMʼfinjile.
Ʉlwʉmvwano ʉlwo mulusʉngaje hwi‑idala ɨlya‑akhale hu tengaanu.
4 Atɨ tenti tipatihɨɨnywe nanshi ɨvipelwa ɨvya mu mʼbɨlɨ gweka,
nantele tili nʉ Mʼpepo ʉMʼfinjile weeka nanshi ɨsho ʉNgʉlʉbhɨ atikwiziizye mu lusʉʉbhɨlo lweka.
5 Tili nʉ Mwɨnɨ weeka,
ʉlwɨtɨho lweka nʉ lwozyo lweka.
6 Tili nʉ Ngʉlʉbhɨ weeka,
wope ʉyo yʉ Yise weetu tenti.
Ʉmwene yʉ nʼnongozi wa bhantu bhonti,
abhomba ɨmbombo ashilile hwa bhantu bhonti na‑akhale muuhati mwa bhantu bhaakwe bhonti.
7 Leelo mwaliitɨ ʉKilisiti ahamʼpiiye ɨshikʉnjɨlwa ɨshigoosi ʉmuntu weeka weeka alɨngaane na shiila sha‑ahanzaga ʉmwene afumye.
8 Sha shɨɨsho ɨsimbwilwe mu Nsimbo ɨMfinjile huje,
“Lwa waazʉbha ʉhwo hu mwanya,
ahabhalile na bhantu abhinji ɨbho ahabhamenile mu lʉgʉ,
ahabhapeela abhantu bhaakwe ɨmpeesya.”a
9 Ɨshi amazwi ɨga ga gayanga aje,
“Lwa waazʉbha ʉhwo hu mwanya,”
hwa huje wɨlɨ?
Hwa huje sha‑asɨɨle abhale hu mwanya ahiishile mu nsi ʉmu.b
10 Ʉmwene wa‑ahiishile mu nsi ʉmu,
ya yʉʉyo ahazʉbhɨle hu mwanya tee yɨ vintu vyonti huje abhe pantu ponti.
11 Ʉmwene ahabhapiiye abhantu ɨvikʉnjɨlwa.
Bhamo abhasaluuye huje bhabhe bhasontwa,
bhamo bhabhe bhakuwi,
bhamo bhabhe bhalʉmbɨɨlɨli,
bhamo bhabhe bhapuuti na bhamwabho bhabhe bhamanyizyi.
12 Ɨmbombo yaabho ɨbho bhonti ya hubhalɨngaanye na hubhadandamishe abhooziwa abhombe ɨmbombo yaakwe.
Bhahwanziwa abhombe ɨmbombo ɨya Ngʉlʉbhɨ huje shibhanza,
ɨsho mʼbɨlɨ gwa Kilisiti,
shizengwe.
13 Ɨnongwa ɨyo yahayijendeelela afishe atɨ tenti lwa tili nʉ lwʉmvwano mu lwɨtɨho lwetu na humʼmanye ʉMwana wa Ngʉlʉbhɨ.
Tahayibha bhantu ɨbho bhahayidandamala mu lwɨtɨho,
nantele tahayilʉnjɨha nanshi ʉKilisiti yʉʉyo.
14 Ɨsho saga tahayibha nantele bhantu bha saga bhadandamazu mu lwɨtɨho nanshi abhaana abhadoodo.
Nantele saga tahayigobelwa nɨ manyizyo ɨzyɨ waaji nʉ waaji ɨzi‑ilenga nanshi ʉwaato ʉwo amabhilingwa gahuwubunshila ʉhwu nʉ‑ʉhwo.
15 Leelo tibhɨnjɨlɨzyaje ɨlyoli na‑aganane huje tikule na‑afishile abhe nanshi ʉKilisiti mu gonti.
Ʉmwene nʼgoosi mu mpʉga ya bhooziwa,
nantele ali nanshi itwe mu mʼbɨlɨ.
16 Mwa mwene,
ʉmʼbɨlɨ gupatihɨɨnywe hwi‑idala ɨlyɨ vipelwa vyonti ɨvyɨ mʼbɨlɨ.
Ɨshi,
shila shipelwa lwa shibhomba ɨmbombo yaakwe alɨngaane na maha gaakwe,
ɨpo ʉmʼbɨlɨ gwonti gukula na‑akhamantane tee mu lugano.
Ɨnjendo ɨnjenu hwa bhooziwa
17 Ɨshi bhooziwa bhamwetu,
ɨhubhabhʉʉzya na hubhalajizye hwi‑ikhone lya Mwɨnɨ ʉYeesu huje ahwande ɨshi,
mugandi alembe nanshi ɨbho bha saga bhahumʼmwɨtɨha ʉNgʉlʉbhɨ,
abheene ɨnsɨɨbho zyabho saga zihwavwa lyolyonti.
18 Nantele ɨbha bhali mu hiisi,
saga bhamɨɨnye ɨlyoli ɨya Ngʉlʉbhɨ.
Abhantu ɨbho bhali hutali nʉ wʉʉmi ʉwo ʉNgʉlʉbhɨ ahubhapeela abhantu bhaakwe,
hu nongwa ya‑aje saga bhahwanza ahwɨtɨshe hwa hufumilana nʉ khome wɨ mooyo gaabho.
19 Bhateejile,
saga bhalola ɨnsoni,
bhanyonywa tee abhombe ɨmbombo ɨhandamanu,
bhabhomba hu pafu ɨnongwa ɨmbiibhi ɨzyɨ waaji ʉwinji.
20 Leelo amwɨ saga mumanyiiye ɨsho hu nongwa ya Kilisiti.
21 Ʉmwene yʉ wandilo wɨ lyoli yonti.
Ɨndi nʉ simishizi aje mwahamanyiiye shinza ɨnongwa nɨ manyizyo zyakwe.
22 Mwahamanyiiye aleshe ɨnjendo zyenyu ɨmbiibhi ɨzyɨ mandɨ na‑aleshe abhɨnjɨɨlɨle ɨnsʉngwo zyenyu ɨmbiibhi ɨzyo zihubhagobela na‑anangaanye amooyo geenyu.
23 Nantele mwahamanyiiye huje mubhombwe shipya mu nsɨɨbho zyenyu.
24 Nantele mubhe nʉ wʉʉmi ʉpya nanshi ɨsho ʉNgʉlʉbhɨ ahabhapelile huje mulɨngaane tee nʉ mwene,
lwa muli bhagolosu hu lyoli na sinta mbuno.
25 Ɨshi lehaji ayanje ilenga.
Shila muntu ahwanziwa humʼmʉʉzye ʉwamwabho ɨnongwa ɨzyɨ lyoli.
Ɨnjanjile ɨsho,
pɨpo atɨ tenti tili palishimo mwa Kilisiti nanshi ɨvipelwa ɨvya mu mʼbɨlɨ gweka.c
26 Nkashele muvitiilwe,
mugandi ahwɨtɨshe huje ilyoyo libhalongozye abhombe ɨmbiibhi.
d Nantele isanya ligandi aswe sha muli ni‑ilyoyo.
27 Musahasheele humʼpeele ʉSeetano ɨfwasi ɨya hubhatole.
28 Ʉmwibha aleshe ahwibhe nantele,
abagaje abhombe ɨmbombo ɨnyinza hu nyoobhe zyakwe yʉʉyo huje abhe nɨ vintu ɨvya humʼmwavwe wa‑abhuliliilwe.
29 Mugandi ayanje amazwi amabhiibhi,
lyoli muyangaje amazwi aminza aga hubhazenje abhamwenyu alɨngaane na‑abhuliililwe hwabho.
Ɨgo gabhajiiye abhe nɨ zya pa mwanya hwɨ‑ɨbho bha bhahugatejeelezya.
30 Mugandi hunʼzugumizye ʉMʼpepo ʉMʼfinjile ʉwa Ngʉlʉbhɨ,
pɨpo ʉMʼpepo ʉyo shimanyishizyo sha Ngʉlʉbhɨ huliimwɨ huje amwɨ muli bhantu bhaakwe,
afishe isiku ɨlyo ʉNgʉlʉbhɨ ahayihubhagombola.
31 Ɨshi muleshe ʉbhaavi,
ʉzanzabhazu,
ilyoyo,
ibho,
ɨndigo,
peeka nʉ bhiibhi ʉwɨnjɨ wonti.
32 Nantele bhombelanaji ɨnyinza,
lolelanaji ɨnkʉmbʉ na‑akhobhoshelane nanshi ʉNgʉlʉbhɨ sha‑ahabhakhobhoshɨɨye amwɨ ashilile hwa Kilisiti.