ɄPaulo alʉmbɨɨlɨla ɨNongwa ɨNyinza hwa bha saga Bhayahuudi
3
Alɨngaane nɨ nongwa ɨzyo,
anɨ nɨPaulo ɨhubhapuutila hwa Ngʉlʉbhɨ.
Anɨ ɨnkʉngwɨlwe mu hoobhe hu nongwa yɨ mbombo ɨyo ʉYeesu ʉKilisiti ahampiiye hu bhantu bha saga Bhayahuudi.
2 Lyoli ɨhwɨtɨha aje mwahʉmvwɨzye huje,
hu mpyana yaakwe ʉNgʉlʉbhɨ ambɨɨshɨle abhe mʼmomvi waakwe ʉwa hubhalʉmbɨɨlɨle amwɨ.
3 ɄNgʉlʉbhɨ yʉʉyo ahandolesiizye ɨmfiso yaakwe hwi‑idala ɨlya hunilulile nanshi shɨ‑ɨmbasimbiiye amazwi mashe.a
4 Nkashele mubhaazya ɨzyo zyɨ‑ɨmbasimbiiye,
mubhajiiye amanye ɨsho ɨmɨɨnye ɨnsɨɨbho ɨzya hu mfiso ɨzya Ngʉlʉbhɨ hu nongwa ya Kilisiti.
5 Ɨmandɨ,
ʉNgʉlʉbhɨ saga ahabhamanyiziizye abhantu ɨmfiso ɨyo.
Leelo ɨshi,
hwi‑idala ɨlya Mʼpepo waakwe ʉMʼfinjile ahubhamanyizya abhasontwa na bhakuwi bhaakwe abhasangalusu.
6 Ɨmfiso ɨyo ya yɨɨnɨ,
hwi‑idala ɨlya hwɨtɨshe ɨNongwa ɨNyinza ɨzya Yeesu,
bhonti bha saga Bhayahuudi na Bhayahuudi bhahayambɨɨlɨla ɨnsayo ziziila afume hwa Ngʉlʉbhɨ.
Bhonti bhahayibha peeka nanshi ɨvipelwa ɨvya mu mʼbɨlɨ.
Hwa huje ashilile hwa Yeesu ʉKilisiti bhahwambɨɨlɨla peeka ɨnsayo ɨzyo ʉNgʉlʉbhɨ zya‑ahalapile hubhasaye aBhayahuudi.
7 ɄNgʉlʉbhɨ hu mpyana yaakwe,
ambɨɨshɨle abhe mʼmomvi waakwe ʉwa hubhalʉmbɨɨlɨle ɨNongwa ɨNyinza.
Andolɨɨye ɨnkʉmbʉ ɨyo alɨngaane ni‑ikhone lyakwe igoosi.
8 Peeka na huje anɨ saga ɨhondɨɨye ashile abhooziwa bhonti,
nahali ɨmpewiilwe ɨmpyana ɨnɨ,
huje ɨmbalʉmbɨɨlɨle abhantu bha saga Bhayahuudi ɨnongwa ɨzyɨ nsayo afume hwa Kilisiti ɨzyo saga zili nɨ shipimilo.
9 ɄNgʉlʉbhɨ ʉyo Mʼpeli wɨ vintu vyonti,
ya yʉʉyo ahampiiye ɨmbombo ɨya hubhamanyizye abhantu bhonti ɨnsɨɨbho zyakwe ɨzya hu mfiso sha zibhombeha.
Ɨnsɨɨbho ɨzyo ahazifisile hu mbaazyo zyonti ɨzyɨ mandɨ.
10 Leelo hu habhaazyo ɨha,
ashilile hu shibhanza ʉtengamazu waakwe ʉwɨ waaji nʉ waaji wumanyiishe hwa bhalongozi na bhi‑ikhone mu nsi ya saga ɨbhoneha pa maaso amazelu.
11 Ɨzyo zyahali nsɨɨbho zya Ngʉlʉbhɨ afume hu mbaazyo zyonti ɨzyɨ mandɨ.
Ahazimalɨzɨɨzye ashilile hu mbombo ɨyo ʉMwɨnɨ weetu ʉYeesu ʉKilisiti ahabhombile.
12 Hwi‑idala ɨlya‑apatiihanywe nʉ Yeesu ʉKilisiti na humʼmwɨtɨshe ʉmwene,
tili nʉ dandamazu ʉwa‑abhale pitagaalila lya Ngʉlʉbhɨ sinta wooga.
13 Ɨshi ɨhubhalaabha huje mugandi atengushe amooyo hu nongwa yɨ malabha ɨgo ɨlabha hu nongwa yeenyu.
Amalabha ɨgo gahubhaleetela ʉmwamu.
ɄPaulo ahubhapuutila abhooziwa abha hu Efeeso
14 Ɨshi mwɨ‑ɨgo gonti,
ɨsugamila pitagaalila lya Daada weetu ʉNgʉlʉbhɨ na hubhapuutile amwɨ.
15 Ʉmwene yʉ Wandilo wɨ vipelwa vyonti ɨvya hu mwanya nɨ vya mu nsi.
16 Ɨpuuta hwa Ngʉlʉbhɨ huje ashilile hwa Mʼpepo waakwe,
abhapeele amaha mu mooyo alɨngaane nʉ mwamu waakwe ʉwa‑aswijizye.
17 Nantele ɨhubhapuutila huje hwi‑idala ɨlyɨ lwɨtɨho,
ʉKilisiti alembaje mu mooyo geenyu.
Ɨpo pa pɨɨpo ʉlugano lwakwe lwahayihubhapeelaga ikhone ɨlya hwɨmɨɨlɨle hu dandamazu,
nanshi ikwi sha lisiizye amalandazi gaakwe pa nsi tee awe nanshi ɨnyumba ɨyo shɨ‑ɨzengwilwe mu lwalo ʉlukhome.
18 ɄNgʉlʉbhɨ abhapeele amwɨ peeka na bhooziwa bhonti ikhone ɨlya‑amanye shiila ʉKilisiti sha‑atigɨɨne.
Ʉmwene atigɨɨne hu lugano ʉlwa‑aswijizye,
nantele lwa saga luli nɨ shipimilo.
19 Ɨlaabha huje mumanye ʉlugano lwa Yeesu ʉKilisiti sha luli lugoosi tee,
ʉlugano ʉlwo lushila ɨnjeele zyenyu.
Ɨpo saga mwahayibhuliililwa hohonti afume hwa Ngʉlʉbhɨ.
20 ɄNgʉlʉbhɨ amwamihwaje hu nongwa yi‑ikhone lyakwe ɨlya‑aswijizye!
Lyoli abhajiiye hutibhombele amagoosi tee ashile ɨgo ga tilaabha awe asɨɨbhe!
Abhajiiye hutibhombele ɨgo alɨngaane ni‑ikhone lyakwe lya libhomba ɨmbombo mu mooyo geetu.
21 Amwamihwaje ʉNgʉlʉbhɨ na bhooziwa bhaakwe abhɨ habhaazyo honti hu nongwa ya Yeesu ʉKilisiti wiila na wiila.
Aameni!