ɄNgʉlʉbhɨ ahutifyʉla hu mpyana yaakwe
2
Amwɨ mwahali nanshi abhafwe hu nongwa ya huje mwahazileshile ɨndajizyo zya Ngʉlʉbhɨ na‑abhombe ɨmbiibhi.
2 Mwahabhɨnjɨlɨzyaga ɨnjendo ɨmbiibhi nanshi abhantu abhanjɨ abha mu nsi ɨnɨ.
Nantele mwahali muhunʼtiniha ʉSeetanoa ʉyo nʼgoosi wɨ mapepo gonti hu mwanya.
Ʉmwene hu habhaazyo ɨha,
abhomba ɨmbombo muuhati mwa bhantu ɨbho bha saga bhahunʼtiniha ʉNgʉlʉbhɨ.
3 Lyoli atɨ tenti tahakhɨɨye nanshi abheene.
Tahabhɨnjɨlɨzyaga ɨnsʉngwo ɨzyɨ mʼbɨlɨ,
hwa huje tahabhombaga gonti ɨgo amooyo geetu agɨ mbiibhi gahasɨɨbhaga na‑asʉngwe.
Atɨ tahapapwilwe nʉ wuntu ʉwɨ mbiibhi,
hu nongwa ɨyo ʉNgʉlʉbhɨ ahativitiliilwe,
tahakhondela ʉlufundo nanshi abhantu abhanjɨ.
4 Leelo ʉNgʉlʉbhɨ ali nɨ nkʉmbʉ tee,
nʉ lugano lwakwe huliitɨ saga luli nʉ malishilo.
5 Poshe tahali tifwiye hu nongwa yɨ mbiibhi zyetu,
ʉNgʉlʉbhɨ ahatifyʉlɨle na hutibhɨɨshe bhʉʉmi peeka nʉ Kilisiti hu nongwa yɨ mpyana yaakwe.
6 Ahatizyʉsyɨzye peeka nʉ Kilisiti huje tahalongozyaje peeka nʉ mwene ʉhwo hu mwanya.
Ahabhombile ɨli hwi‑idala ɨlya hutipatiihanye nʉ Yeesu ʉKilisiti.
7 ɄNgʉlʉbhɨ ahabhombile zyonti ɨzyo huje hu habhaazyo ha hahwɨnza,
alolesye hwonti ɨmpyana yaakwe ɨngoosi nantele ɨya‑aswijizye huliitɨ.
Ahuyilolesya ɨmpyana yaakwe ɨyo hwi‑idala ɨlya hutipatiihanye palishimo nʉ Yeesu ʉKilisiti.
8 ɄNgʉlʉbhɨ abhafyʉlɨle hu mpyana yaakwe hwi‑idala ɨlya humʼmwɨtɨshe ʉKilisiti.
Ʉfyʉli ʉwo saga wufumilana nɨ mbombo zyenyu ɨnyinza,
lyoli mpeesya afume hwa Ngʉlʉbhɨ.
9 Saga ahabhafyʉlɨle afumilane nɨ mbombo zyenyu ɨnyinza,
huje ʉmuntu wowonti asahasheele ahwibaade.
10 ɄNgʉlʉbhɨ ya yʉʉyo atipelile nanshi sha tili.
Ʉmwene atipelile abhe bhapya hwi‑idala ɨlya hutipatiihanye palishimo nʉ Yeesu ʉKilisiti,
huje tibhanje tibhomba ɨmbombo ɨnyinza ɨzyo ahatibhɨshɨɨye huje tibhombaje.
ɄNgʉlʉbhɨ abhapatihɨɨnye aBhayahuudi na bha saga Bhayahuudi ashilile hwa Yeesu ʉKilisiti
11 Ɨshi,
izuhaji sha mwahali ɨmandɨ amwɨ mwa saga muli Bhayahuudi.
ABhayahuudi bhahali bhabhasyonshɨɨye amwɨ hubhakwizye huje saga mutendiilwe ɨngoola ɨzya hwitagaalila ɨzyɨ lume.
b Lyoli abheene bhahali bhahwiyanga huje bhantu bha bhatendiilwe.
Leelo atendwe ʉhwo yɨ mbombo ɨyo ɨbhombwa na bhantu hu mʼbɨlɨ lwene.
12 Izuhaji huje hu habhaazyo ɨho saga mwahamʼmɨɨnye ʉKilisiti,
mwahali mulegɨɨne na bhantu abha hu Izilaeeli.
Mwahali bhajenu bha saga bhabhajiiye abhe palishimo mwi‑ilaganoc ɨlyo ʉNgʉlʉbhɨ ahalapile hwa bhantu ɨbho.
Amwɨ mwahakhalaga mu nsi sinta abhe nʉ lusʉʉbhɨlo na humʼmanye ʉNgʉlʉbhɨ.
13 Leelo ɨshi,
ʉhwa‑apatiihanywe hwenyu nʉ Yeesu ʉKilisiti,
amwɨ mwa mwahali hutali nʉ Ngʉlʉbhɨ ɨmandɨ,
ɨshi mwabha pa pɨɨpɨ hwi‑idala ɨli‑idanda lya Kilisiti ɨlyo lyahitiishe pa shikhobheehanyo.
14 ɄKilisiti yʉʉyo atipiiye ʉtengaanu mwaliimwɨ,
aBhayahuudi na bha saga Bhayahuudi.
Atɨ ta tahali tilegɨɨne,
ɨshi atibhɨɨshɨle abhe peeka.
Ashilile ʉfwe waakwe ahefwizye ʉlʉgʉ ʉwo wahatipahɨɨnye nanshi ʉlubhʉmba.
15 Ɨndajizyo zya Bhayahuudi zili nɨ ndajizyo ɨnyinji,
leelo ʉKilisiti ahazyefwizye.
Ahabhombile ɨsho huje atɨ tiBhayahuudi naamwɨ mwa saga muli Bhayahuudi tibhe mpʉga yeeka hwi‑idala ɨlya‑apatiihanywe nʉ mwene.
Ɨsho sha shɨɨsho ahabhombile aje,
tibhe nʉ tengaanu.
16 Hwi‑idala ɨlya‑afwe pa shikhobheehanyo,
ahefwizye ʉlʉgʉ wa Bhayahuudi nɨ‑ɨbho bha saga Bhayahuudi na hubhabhɨɨshe abhe mpʉga yeeka.
Nantele ahabhabhɨɨha bhonti huje bhʉmvwane nʉ Ngʉlʉbhɨ.
17 Ahɨnzɨle alʉmbɨɨlɨle ɨNongwa ɨNyinza ɨya‑aleete ʉtengaanu huliimwɨ amwɨ mwa saga muli Bhayahuudi mwa mwahali hutali nʉ Ngʉlʉbhɨ,
naatɨ tiBhayahuudi ta tahali mu pɨɨpɨ nawo.
18 Ɨshi hu nongwa ya gaala ga‑atibhombɨɨye ʉKilisiti,
gahutibhɨɨha atɨ tiBhayahuudi peeka naamwɨ mwa saga muli Bhayahuudi huje tibhe bhasatulwe bha humʼfishile ʉDaada hwi‑idala ɨlya Mʼpepo ʉMʼfinjile yʉyʉʉla.
19 Ɨshi,
amwɨ mwa saga muli Bhayahuudi,
saga muli bhajenu nantele.
Lyoli muli bhaana bha Ngʉlʉbhɨ,
nantele muli bhakhaaya peeka na bhooziwa bhonti.
20 Amwɨ muli nanshi amawe ga bhazenjɨɨye ɨnyumba.
Bhope abhasontwa na bhakuwi bhali nanshi ʉlwalo ʉlwɨ nyumba ɨyo.
Nantele ʉYeesu ʉKilisiti yʉʉyo wa‑ali nanshi iwe igoosi ɨlya pa mpɨnga yɨ lwalo ʉlwɨ nyumba ɨyo.
21 Ʉmwene ya yʉʉyo azenga ɨnyumba yonti afishe ɨkhamantane shinza na huyibhombe abhe ngoosi nanshi ɨnyumba ɨmfinjile ɨya Ngʉlʉbhɨd hu nongwa ya Mwɨnɨ ʉYeesu.
22 Ɨshi,
hwi‑idala ɨlya‑apatiihanywe nʉ mwene,
naamwɨ mwa saga muli Bhayahuudi muzengwilwe pa mwanya yɨ lwalo ʉlwɨ nyumba ya‑akhala ʉNgʉlʉbhɨ hwi‑idala ɨlya Mʼpepo waakwe.