Ɨkalaata ɨya nʼsontwa ʉPaulo hwa
Bhaefeeso
ɄPaulo ahubhalamuha aBhaefeeso
1
Ɨkalaata ɨnɨ ɨfumile huliinɨ anɨ nɨPaulo,
nɨnʼsontwa wa Yeesu ʉKilisitia nanshi ʉNgʉlʉbhɨ sha‑ahwanza.
Ɨhubhasimbila amwɨ mubhooziwa mwa mukhala mwi‑ibooma ɨlyɨ Efeeso,
# nantele mwa muhumʼmwɨtɨha ʉYeesu ʉKilisiti.
2 Ɨmpyana nʉ tengaanu afume hwa Ngʉlʉbhɨ,
ʉDaada weetu,
na hwa Mwɨnɨ weetu ʉYeesu ʉKilisiti,
vibhanje peeka naamwɨ.
Ɨnsayo afume hwa Ngʉlʉbhɨ
3 Amwamihwaje ʉNgʉlʉbhɨ,
ʉDaada wa Mwɨnɨ weetu ʉYeesu ʉKilisiti,
ʉyo atisayile hu nsayo zyonti ɨzya hu mwoyo,
ɨzyo zifuma hu mwanya hwa Ngʉlʉbhɨ.
Ɨnsayo ɨzyo tihuzyambɨɨlɨla,
pɨpo tipatihɨɨne nʉ Kilisiti.
4 Hu habhaazyo ʉNgʉlʉbhɨ lwa‑asɨɨle apele ɨnsi,
ahatigɨɨne na hutisalule huje tibhe bhantu bhaakwe hwi‑idala ɨlya hutipatiihanye atɨ nʉ Kilisiti.
Ahabhombile ɨsho huje tibhe bhasangalusu sinta malando pitagaalila lyakwe.
5 ɄNgʉlʉbhɨ ahasɨbhɨlɨɨye afume halɨ hutibhɨɨshe huje tibhe bhaana bhaakwe ashilile hwa Yeesu ʉKilisiti.
Ahabhombile ɨsho alɨngaane nɨ nsɨɨbho zyakwe na shiila sha‑ahakhondeziiwe.
6 Ɨshi,
timʼmwamihaje ʉNgʉlʉbhɨ hu mpyana yaakwe ɨya‑aswijizye ɨyo ahatipiiye ashilile hwa Mwana waakweb ʉnʼkʉndwe.
7 Hwi‑idala ɨli‑idanda ɨlya Yeesu ɨlyo lyahitiishe hwa‑afwe hwakwe pa shikhobheehanyo,
atɨ tisatuliilwe,
hwa huje tikhobhosheliilwe ɨmbiibhi zyetu.
Ɨga gabhombɨɨshe alɨngaane nʉ goosi ʉwɨ mpyana yaakwe
8 ya‑atipiiye tee.
ɄNgʉlʉbhɨ ahatipiiye ɨmpyana ɨyo hu tengamazu wonti na hu manyiihanyi wonti.
9 Ahatilanganyiziizye ɨnsɨɨbho yaakwe ɨyɨ mfiso ɨyo ahasɨbhɨlɨɨye alɨngaane na shiila sha‑akhondezewa.
Ɨnsɨɨbho ɨyo ahasɨbhɨlɨɨye huyimalɨɨzɨzye ashilile hwa Mwana waakwe ʉyo.
10 Ahayihuyimalɨɨzɨzya ɨnsɨɨbho yaakwe ɨyo,
lwa haafiha ahabhaazyo haakwe hahabhɨhwɨlwe.
Ɨnsɨɨbho ɨyo ya yɨɨnɨ,
ahayibhʉngaanya peeka ɨvipelwa vyonti ɨvya hu mwanya,
nɨ vya mu nsi na huvibhɨɨshe pa nsi yi‑ikhone ɨlya Kilisiti.
11 Ɨvintu vyonti vibhombeha alɨngaane nɨ nsɨɨbho nʉ lugamulo lwa Ngʉlʉbhɨ.
Wope ʉNgʉlʉbhɨ ahatisaluuye atɨ tiBhayahuudi afume halɨ huje,
tibhe bhaana bhaakwe hwi‑idala ɨlya hutipatiihanye nʉ Kilisiti.
12 Ahabhombile ɨsho huje atɨ ta tili bha hwande humʼmwɨtɨshe ʉKilisiti,
timʼmwamishe ʉNgʉlʉbhɨ hu mwamu waakwe.
13 Namwɨ mwa saga muli Bhayahuudi,
mwahʉmvwɨzye izwi ɨlya nalyoli,
hwa huje ɨNongwa ɨNyinza ɨzya hubhafyʉle.
Hu habhaazyo lwa mwahʉmvwɨzye,
mwahamʼmwɨtɨɨshe ʉKilisiti,
wope ʉNgʉlʉbhɨ ahabhabhɨɨshɨle ɨshimanyishizyo abhonesye huje muli bhaakwe.
Ɨshimanyishizyo ɨsho yʉ Mʼpepo ʉMʼfinjilec ʉyo ahalapile hubhapeele.
14 Ahatipiiye ʉMʼpepo waakwe ʉyo abhe nanshi isombo ɨlya hwande asimishizye huje ahayihubhagombola abhantu bhaakwe lwonti.
Ahabhombile ɨsho huje amwamihwaje hu mwamu waakwe!
ɄPaulo ahubhapuutila aBhaefeeso
15 Ɨhunʼsalifya ʉNgʉlʉbhɨ,
hu nongwa yɨ‑ɨgo gonti ɨgo ahatibhombɨɨye.
Afume lwa nʉmvwa huje muhumʼmwɨtɨha tee ʉMwɨnɨ weetu ʉYeesu na hubhagane abhooziwa bhonti mwa Ngʉlʉbhɨ,
16 saga ɨndeshile hunʼsalifye ʉNgʉlʉbhɨ hu nongwa yeenyu,
hwope aleshe hubhapuutile.
17 Ɨhunʼnaabha ʉNgʉlʉbhɨ ʉwa Mwɨnɨ weetu ʉYeesu ʉKilisiti,
ʉyo Yise Mʼmwamu,
huje abhapeele ʉmwoyo ʉgwɨ njeele huje mubhe nʉ manyiihanyi na humʼmanye shinza ʉNgʉlʉbhɨ.
18 Nantele ɨhunʼnaabha abhiigule amaaso aga hu mwoyo,
huje mumanye shinza ʉlusʉʉbhɨlo lwenyu hu nongwa ya‑aje atikwiziizye abhe bhantu bhaakwe.
Ɨshintu ɨsho wʉ tabhazi wɨ gaali ʉwɨ mwamu ʉwo ahalapile hubhapeele abhooziwa.
19 Nantele ɨhunʼnaabha huje,
mugamanye amaha gaakwe sha gali magoosi hu nongwa yeetu atɨ ta tihumʼmwɨtɨha ʉYeesu.
20 Amaha ɨgo ga gɨɨgo ʉNgʉlʉbhɨ ahabhombɨɨye hunʼzyʉsye ʉKilisiti na humʼmɨɨshe hu nʼkhono gwakwe ʉgwa hu lɨɨlo,
apantu apɨ nshɨnshɨ tee hu mwanya.
21 Ɨshi ʉKilisiti ali ni‑ikhone igoosi ʉhwo ashile ɨvipelwa vyonti vya vili nʉ goosi hwope ni‑ikhone,
hwope ʉwumwɨnɨ,
nɨ‑ɨvyo vya vilongozya.
Saga huje ali ni‑ikhone hu habhaazyo hɨɨha lwene,
leelo ali ni‑ikhone hwope na hu mbaazyo ɨzyo zya zihwɨnza.
22 ɄNgʉlʉbhɨ ahamʼpiiye ʉKilisiti ikhone ɨlya‑alongozye ɨvintu vyonti na humʼmɨɨshe mu shibhanza,
huje abhe Mwɨnɨ wɨ vintu vyonti nanshi itwe mu mʼbɨlɨ.
23 Ɨshibhanza shili nanshi ʉmʼbɨlɨ gwa Kilisiti,
shilʉnjɨhwa nʉ Kilisiti ʉyo alʉnjɨha ɨvintu vyonti hu mbali zyonti.