Abhapaafi na bhaana bhaabho sha bhahwanziwa akhale peeka
6
Namwɨ mubhaana,
bhatinihaji abhapaafi bheenyu nanshi shɨ‑ɨhwanziwa hwa bhantu bha bhamʼmwɨtɨɨshe ʉMwɨnɨ ʉYeesu,
pɨpo abhombe ɨsho,
wʉ winza.
2 Ɨndajizyo ɨya hwande yɨ‑ɨli nʉ lufingo ɨyiga,
“Ʉnʼtinihaje ʉso nʉ bhɨɨnyu waaho,
3 huje ʉyambɨɨlɨle ɨnsayo na‑akhale hu habhaazyo ahatali mu nsi.”a
4 Namwɨ mubhayise mugandi hubhandiilizye abhaana bheenyu,
leelo mubhasʉngaje hu nsundo zya Mwɨnɨ ʉYeesu na hubhamanyizye ɨmanyizyo zyakwe.
Ɨmanyizyo hu nongwa ya bhagoosi na bhakalwe bhaabho
5 Amwɨ mubhakalwe,
bhatinihaji na hubhoogope abhagoosi bheenyu.
Mubhombaje ɨsho hu mwoyo gwonti,
nanshi sha muhunʼtiniha ʉKilisiti.
6 Mugandi hubhatinishe hu habhaazyo lwa bhahubhalola lwene huje bhabhasʉmbaje.
Leelo bhatinihaji hu mwoyo gwonti pɨpo amwɨ muli bhabhomvi bha Kilisiti.
Bhombaji hu mwoyo gwonti nanshi ʉNgʉlʉbhɨ sha‑ahwanza.
7 Bhabhombelaji hu mwoyo ʉmwinza nanshi shiila sha muhumʼmombela ʉMwɨnɨ ʉYeesu,
mugandi abhombe nanshi muhubhabhombela abhantu.
8 Mumanye huje ʉMwɨnɨ ʉYeesu ahayihumʼpeela ɨmpeesya ʉmuntu wowonti hu mbombo yaakwe ɨnyinza ɨyo abhomba,
sinta asaaje aje ali nʼkalwe awe saga nʼkalwe.
9 Namwɨ mubhagoosi,
bhabhombelaji shinza abhakalwe bheenyu.
Mugandi hubhoogofye,
pɨpo mumɨɨnye huje ʉMwɨnɨ waabho nʉ Mwɨnɨ weenyu ali weeka,
ali hu mwanya,
nantele mumɨɨnye huje ʉmwene saga ahumʼbaagula ʉmuntu.
Idala ɨlya humʼmene ʉSeetano
10 Ɨshi bhooziwa bhamwetu,
ɨhwanza aje mwambɨɨlɨle amaha afume hwa Mwɨnɨ ʉYeesu huje muhwikhamantanye hu dandamazu mwa mwene.
11 Kwataji amenda gonti aga‑alwɨle ʉlʉgʉ ga mupeewa nʉ Ngʉlʉbhɨ,
huje muhwizije nɨ nsɨɨbho zyozyonti ɨmbiibhi ɨzyɨ shevu wa Seetano.
12 Bhombaji ɨsho,
pɨpo saga tilwa na bhantu.
Lyoli tilwa na mapepo ɨgo gali mu nsi ɨyo saga ɨloleha pa maaso amazelu,
tilwa na bhamwɨnɨ,
abhagoosi na bhi‑ikhone ɨbho bhalongozya ɨnsi ɨyɨ hiisi.
13 Ɨshi hu nongwa ɨyo,
egaji ɨvilwɨlo vyonti vya mupeewa nʉ Ngʉlʉbhɨ huje isiku ɨlyɨ lʉgʉ lwa lyafiha,
mumʼmene ʉnʼnʉgʉ.
Nantele lwa mwamala alwe ʉlʉgʉ,
mukhamantana.
14 Muhwanziwa ahwilɨngaanye nzɨɨla nanshi ɨshi alwe nʉ Seetano.
Ɨlyoli ɨbhe nanshi ilamba mu masana geenyu nʉ golosu wubhe nanshi ɨnkwela pa shifubha.
15 Nantele nanshi abhalwi sha bhakwata ɨndaatʉ ahwilɨngaanye hu lʉgʉ,
namwɨ muhwanziwa huzisʉʉbhɨle ɨNongwa ɨNyinza zya zihutipeela ʉtengaanu,
ahwilɨngaanye alwe nʉ Seetano.
16 Peeka nɨ‑ɨgo gonti,
ʉlwɨtɨho lubhe nanshi ɨnkwela mu nyoobhe zyenyu,
ɨbhaavwe azije ɨmpalala ɨzyɨ mwoto afume hwa Mʼmiibhi ʉla ʉSeetano.
17 Nantele afume hwa Ngʉlʉbhɨ,
mwambɨlɨlaje ʉfyʉli ni‑izwi lyakwe.
Ʉfyʉli wubha nanshi ɨmpeewa ɨyɨ jela ya bhakwata abhalwi hu lʉgʉ.
Lyope izwi lyakwe libha nanshi ipanga lya mupeewa nʉ Mʼpepo ʉMʼfinjile.
18 Ɨshi bhooziwa bhamwetu,
hu habhaazyo honti mupuutaje ɨmpuuto zyonti nanshi sha mulongozewa nʉ Mʼpepo ʉMʼfinjile.
Ɨshi mubhanje maaso lwa mupuuta,
mugandi alite hubhapuutile abhooziwa bhonti.
19 Nanɨ hwope mumputilaje huje ʉNgʉlʉbhɨ ampeele amazwi aga‑ayanje,
huje ɨnjanje hu dandamazu ɨlyoli ɨyo ʉNgʉlʉbhɨ ahiluuye mu Nongwa ɨNyinza ɨzya Yeesu.
20 Anɨ ɨndi mʼfuusya wɨ nongwa ɨyo,
yope ya yɨ‑ɨnaziizye anɨ huje ɨnkʉngwe mu hoobhe.
Mumputilaje huje ɨnjendelelaje alʉmbɨɨlɨle hu dandamazu nanshi shɨ‑ɨhwanziwa.
Amazwi aga hu malishilo
21 Ʉnʼkʉndwe ʉwamwetu ʉTikiiko,
ʉmʼmomvi ʉnʼnʉnjɨsu ʉwa Mwɨnɨ ʉYeesu ahayihubhabhʉʉzya ɨnongwa zyanɨ zyonti peeka nɨ mbombo yɨ‑ɨbhomba ɨshi.
22 Ɨnʼsonteleziizye ʉyo huliimwɨ huje ayɨnze,
abhabhʉʉzye ɨnongwa zyetu na hubhajinjizye amooyo geenyu.