Ʉsatulwe lwa bhooziwa
5
ɄKilisiti atawuuye huje tibhe bhasatulwe.
Ɨshi,
mwɨmɨɨlɨle hu dandamazu,
mugandi ahwɨtɨshe abhe bhakalwe bhɨ ndajizyo nantele.
2 Tejeelezyi!
Anɨ nɨPaulo ɨhubhabhʉʉzya ɨga!
Nkashele muhwɨtɨha atende ɨngoola ɨya hwitagaalila ɨyɨ lume,
hu nongwa ɨya‑alondolezye ɨndajizyo zya Moose,
ʉKilisiti saga ali nɨ mbombo yoyonti huliimwɨ.
3 Ɨhubhakhajila nantele pa pazelu huje ʉnʼnume wowonti ʉyo ahwɨtɨha atende ɨngoola ɨya hwitagaalila ɨyɨ lume,
ahwanziwa akhate ɨndajizyo zyonti ɨzya Moose.
4 Nkashele musʉʉbhɨla huje ʉNgʉlʉbhɨ anza hubhabhaazizye abhe bhagolosu hwi‑idala ɨlya‑alondolezye ɨndajizyo,
ɨshi mumanye huje muhwiyefwizye mwɨmwɨ hwa Kilisiti,
ɨpo hwa huje muli hwʉnzɨ yɨ nkʉmbʉ ya Ngʉlʉbhɨ.
5 Leelo atɨ,
ashilile ikhone lya Mʼpepo ʉMʼfinjile tisʉʉbhɨla abhaaziwe abhe bhagolosu hwi‑idala ɨlya humʼmwɨtɨshe ʉYeesu.
6 Ɨshi,
nkashele tipatihɨɨnywe nʉ Yeesu ʉKilisiti,
atende ɨngoola ɨya hwitagaalila ɨyɨ lume awe asinte atende saga huhwavwa ahantu hohonti.
Lyoli lya lihwanziwa lwɨtɨho lwetu ʉlwo lubhoneha hwa‑alembe hu kʉndwa.
7 Ɨpo hu wandilo mwahali mujendeelela shinza ahunʼnondolezye ʉKilisiti!
Ɨshi,
yʉ naanu wa‑ahubhadindizya huje muleshe alondolezye ɨlyoli?
8 Hubhadindizye ʉhwo saga hufuma hwa Ngʉlʉbhɨ ʉyo abhakwiziizye amwɨ.
9 Ɨmanyizyo ɨzi‑ilenga zihubhateezya abhantu abhinji,
nanshi ɨsho abhantu bhayanga huje,
“Ʉsafu ʉdoodo lwene wududula ɨshikhando shonti!”a
10 Ɨndi nʉ simishizi huje amwɨ mupatihɨɨnywe nʉ Mwɨnɨ ʉYeesu,
ɨshi saga munza hwɨtɨshe agobelwe.
Leelo ʉmuntu wowonti ʉyo anza hubhagobele,
hwope nkashele abhe weenu,
ahayifundwa.
11 Bhooziwa bhamwetu,
abhanjɨ bhayanga huje,
anɨ ɨnsɨɨle ɨlʉmbɨɨlɨla huje bhonti bhahwanziwa atende ɨngoola ɨya hwitagaalila ɨyɨ lume.
Nkashele yabhanga lyoli huje ɨlʉmbɨɨlɨla ɨsho,
yeenu ɨshi aBhayahuudi bhahundavya?
Nkashele nayangaga ɨsho,
alʉmbɨɨlɨle hwanɨ ɨnongwa ɨzya pa shikhobheehanyo ɨzya Yeesu handɨ saga hwabhavisyaga.
12 Ɨnyonywa huje abhantu ɨbho bha bhahubhataamya amwɨ hwi‑idala ɨlya hubhasonshezye atende ɨngoola ɨya hwitagaalila ɨyɨ lume,
bhajendeelele hwope ahwifuuse bheene!
13 Bhooziwa bhamwetu,
ʉNgʉlʉbhɨ abhakwiziizye huje mubhe bhasatulwe.
Leelo mugandi abhombele ʉsatulwe lwenyu hu nsʉngwo ɨzyɨ mʼbɨlɨ,
leelo mutʉlanaje hu lugano.
14 Ɨndajizyo zyonti ɨzya Moose zilɨɨho mu ndajizyo yeeka ɨyo ɨyiga,
“Ʉnʼganaje ʉmʼpalamani waaho nanshi shʉ‑ʉhwigana aawe.”b
15 Leelo nkashele muvwalazanya na‑agwenyane mwɨmwɨ hu mwɨmwɨ nanshi ɨhanu ɨhali ɨzya mwi‑igona,
mwenyaaje huje musahamalane mwɨmwɨ hu mwɨmwɨ.
Hunʼsʉʉbhɨle ʉMʼpepo ʉMʼfinjile
16 Ɨshi,
ɨnongwa ɨyo ɨhwanza hubhabhʉʉzye hwa huje,
ʉlemvu weenyu wulongozewaaje nʉ Mʼpepo ʉMʼfinjile,
ɨpo saga mwahayilondolezya nantele ɨnsʉngwo ɨzyɨ mʼbɨlɨ.
17 Enya,
ɨvintu vyonti vya vili nsʉngwo zyɨ mʼbɨlɨ,
saga vya vyɨvyo nsʉngwo zya Mʼpepo ʉMʼfinjile.
Nantele ɨnsʉngwo ɨzya Mʼpepo ʉMʼfinjile,
saga vya vyɨvyo nsʉngwo zyɨ mʼbɨlɨ,
hwa huje ʉMʼpepo ʉMʼfinjile nʉ mʼbɨlɨ vilwa.
Alɨngaane nɨ‑ɨsho,
amwɨ saga mubhajiiye abhombe gogonti ɨgo muhwanza.
18 Nkashele mulongozewa nʉ Mʼpepo ʉMʼfinjile,
ɨpo saga muli bhakalwe bhɨ ndajizyo zya Moose.
19 Ɨnjendo zya muntu ʉyo alongozewa nɨ nsʉngwo ɨzyɨ mʼbɨlɨ zili pa pazelu.
Ɨnjendo ɨzyo zya zyɨzi,
ʉweegu,
ʉkhandamanu,
ʉbhembusu,
20 apuute abhangʉlʉbhɨ,
ʉlozi,
ʉlʉgʉ,
ibho,
ɨjɨɨla,
ilyoyo,
idali,
ilenga,
21 ʉwiimi,
ʉmwezi,
ʉpafu na ganjɨ ɨgo galɨngaana nanshi ɨgo.
Ɨhubhabhʉʉzya nantele nanshi ɨsho nahali ɨmbabhʉzɨɨzye,
abhantu ɨbho bhabhomba ɨgo,
saga bhahayitʉʉha mu wumwɨnɨ ʉwa Ngʉlʉbhɨ.
22 Leelo nkashele tilongozewa nʉ Mʼpepo ʉMʼfinjile,
tibha na mantongooni ɨga,
ʉlugano,
ʉluseshelo,
ʉtengaanu,
ʉjimbiilizu,
ʉwinza,
ɨmpyana,
ʉlʉnjɨsu,
23 ʉwoloolo na hwitabhaale.
Nɨɨmo ɨndajizyo ɨyo ɨkhaana ɨgo.
24 Abhantu bhonti ɨbho bhapatihɨɨnywe nʉ Yeesu ʉKilisiti,
bhaleshile alondolezye ɨnjendo ɨzyɨ mʼbɨlɨ,
ʉhwo hwa hukholana na hugukhomeele ʉmʼbɨlɨ ʉgwɨ mbiibhi pa shikhobheehanyo.
25 ɄMʼpepo ʉMʼfinjile atipiiye ʉwʉʉmi ʉpya,
ɨshi tibhanje tilondolezya ʉlongozi waakwe.
26 Tigandi ahwibaade,
tigandi ahwandilizanye,
awe alolelane ɨjɨɨla.