4
Ɨshi,
ɨnongwa ɨyo ɨhwanza hubhabhʉʉzye hwa huje,
nkashele wa‑ahushigaala ɨshʉʉma ɨsha yise waakwe lwa‑ali sha mwana,
ʉmwana ʉyo ali nanshi ʉnʼkalwe poshe ɨshʉʉma shonti shaakwe.
2 Hu habhaazyo ɨho honti wa‑ahushigaala,
ali pa nsi ya bhasʉnji na bhenyeelezi afishe hu habhaazyo ɨho habhɨhwɨlwe nʉ yise waakwe.
3 Natɨ shɨnɨɨsho,
hu habhaazyo lwa‑asɨɨle ahwɨnze ʉKilisiti,
tahali bhakalwe bhɨ miiho ɨgo galongozya abhantu mu nsi.
4 Leelo hu habhaazyo ɨho ahabhɨɨshɨle lwa haafiha,
ʉNgʉlʉbhɨ ahanʼsonteelezya mu nsi ʉMwana ʉyo ahapapwilwe ahabha muntu nanshi atɨ,
ahabha alongozewa nɨ ndajizyo zya Moose.
5 Ahanʼsonteleziizye huje atifyʉle atɨ ta tahali bhakalwe bhɨ ndajizyo zya Moose.
Ahabhombile ɨsho,
huje atɨ tenti tibhe bhaana bha Ngʉlʉbhɨ.
6 ɄNgʉlʉbhɨ ahanʼsonteleziizye ʉMʼpepo wa Mwana waakwe mu mooyo geetu,
hu nongwa ya‑aje tili bhaana bhaakwe.
ɄMʼpepo ʉyo ya yʉʉyo ahutibhɨɨha huje tinʼkwizye ʉNgʉlʉbhɨ huje,
“Daada weetu.”
7 Amwɨ saga muli bhakalwe nantele,
leelo muli bhaana bha Ngʉlʉbhɨ.
Nkashele muli bhaana,
ɨshi amwɨ mwahayambɨɨlɨla vyonti ɨvyɨ gaali ɨvyo ʉNgʉlʉbhɨ abhabhɨshɨɨye abhaana bhaakwe.
ɄPaulo ahubhasunda aBhagalatiya
8 Ɨmandɨ amwɨ lwa musɨɨle humʼmanye ʉNgʉlʉbhɨ,
mwahali bhakalwe bha bhangʉlʉbhɨ.
9 Leelo hu habhaazyo ɨha,
mumʼmɨɨnye ʉNgʉlʉbhɨ,
hwa huje wope abhamɨɨnye amwɨ.
Ɨshi mubhajiiye wɨlɨ aweelele amiiho agɨ mandɨ ɨgo saga gali ni‑ikhone,
nantele ɨgo saga gabhajiiye ahwavwe hohonti?
Wɨlɨ,
muhwanza mubhe bhakalwe nantele?
10 Musɨɨle mukhata amiiho agɨ vikulukulu ɨvya Bhayahuudi?
Mutiniha isiku limo ɨlyɨ lʉngʉ,
ɨlyɨ meezi nɨ lyɨ mwaha,
huje vikulukulu vya hunʼtinishe ʉNgʉlʉbhɨ?
11 Ɨhwogopa huje ɨmbombo ɨyo ɨnjɨmbɨle naamwɨ,
ɨsahasheele abhe saga ɨbhavwizye hohonti!
12 Bhooziwa bhamwetu,
ɨhubhalaabha tee huje,
mubhe bhantu bha bhali bhasatulwe nanshi anɨ,
pɨpo ɨshi ɨndi nanshi amwɨ mwa saga muli Bhayahuudi,
nanshi ɨsho muli bhasatulwe afume mu ndajizyo.
Saga mwahambombɨɨye ʉbhiibhi wowonti.
13 Mumɨɨnye huje ʉbhinu ʉwo nahali nawo,
wa wʉʉwo wahampeelile ahabhaazyo aha hubhalʉmbɨɨlɨle ɨNongwa ɨNyinza amwɨ.
14 Hwope ɨsho hu habhaazyo haala saga mwahansyonshela awe huhaane hu nongwa yɨ woonywa waanɨ,
poshe zyahali ɨnjelo huliimwɨ.
Leelo mwahanambɨlɨɨye nanshi ɨsho humʼmwambɨɨlɨle ʉnʼtumi wa Ngʉlʉbhɨ awe nanshi humʼmwambɨɨlɨle ʉYeesu ʉKilisiti yʉʉyo.
15 Luli hwoshi ɨshi ʉluseshelo ʉlwo mwahali nalwo hu habhaazyo haala?
Ɨyanga ɨlyoli,
hu habhaazyo haala nkashele yabhajilaga,
mwɨnzaga‑afyonkole amaaso geenyu na humpeele anɨ.
16 Wɨlɨ,
ɨshi nabha nʼnʉgʉ weenyu hu nongwa ya hubhabhʉʉzye ɨlyoli?
17 Abhamanyizyi bhaala abhi‑ilenga bhahwidandamiha huje bhabhaaje amwɨ,
leelo ɨgo bhahwanza saga minza.
Bhahwanza hubhabaagule amwɨ afume hwaliinɨ,
huje mubhatinihaje abheene.
18 Shinza ahwidandamishe abhombe aminza.
Bhombaji ɨsho hu habhaazyo honti,
hwope hu habhaazyo ɨho saga ɨndi peeka naamwɨ.
19 Bhaana bhaanɨ bhakʉndwe,
anɨ ɨyɨmba ʉlwa bhɨɨlɨ hu nongwa yeenyu,
nanshi ɨsho ʉnʼshɨ ʉyo ali nʉ lwanda sha‑ayɨmba hu habhaazyo aha‑apaape.
Ɨhwiyʉmvwa ʉbhaavi afishe hu habhaazyo ɨho ɨnjendo ya Kilisiti lwa yahayibhoneha mu lemvu weenyu.
20 Ɨnyonywa tee abhe peeka naamwɨ hu habhaazyo ɨha,
huje ɨmbajinjizye hu mazwi agɨ woloolo!
Leelo ɨmenwa ɨsha hubhaavwe pɨpo ɨndi hutali naamwɨ!
Ɨshifwani ɨsha Hajiili nʉ Saala
21 Mbʉʉzyi anɨ,
amwɨ mwa musʉngwa alongozewe nɨ ndajizyo zya Moose,
wɨlɨ,
muhwʉmvwa lyoli ɨsho ɨyiga ɨndajizyo?
22 Ɨsimbwilwe mu Nsimbo ɨMfinjile huje ʉAbulahaamu ahali na bhaana bhabhɨɨlɨ abhɨ shilume,
weeka hwa nʼshɨ ʉnʼkalwe ʉHajiili,
ʉwa bhɨɨlɨ hwa nʼshɨ ʉnʼsatulwe ʉSaala.
23 Ʉmwana wa nʼshɨ ʉnʼkalwe ʉla ahapapwilwe nʉ Abulahaamu hwa‑alɨnje asimishizye ɨndapo ɨya Ngʉlʉbhɨ.
Leelo ʉmwana ʉwa nʼshɨ ʉnʼsatulwe ahapapwilwe hu nongwa ya Ngʉlʉbhɨ asimishizye ɨndapo yaakwe.
24-25 Ɨnongwa ɨzyo shifwani.
Abhashɨ bhabhɨɨlɨ bhakholɨɨne nanshi amalagano gabhɨɨlɨ.
ɄHajiili shifwani shi‑ilagano ɨlya hwande lya lyahabhombɨɨshe mwi‑igamba ɨlyɨ Sinaayi mu nsi ɨyɨ Alaabiya,
abhaana bhaakwe bhapaapwa nanshi abhakalwe abhɨ ndajizyo zya Moose.
Abhantu abhɨ‑ɨshi abha hu Yelusaleemu bhali nanshi abhaana abha Hajiili,
pɨpo bhakalwe bhɨ ndajizyo zya Moose,
nanshi ʉHajiili na bhaana bhonti.
26 Leelo ʉnʼshɨ ʉwɨnjɨ ʉSaala shifwani shi‑ibooma ɨlyɨ Yelusaleemu ɨlya hu mwanya.
Ʉmwene yʉ nʼshɨ ʉnʼsatulwe,
nantele yʉ nyina weetu.
27 Mu Nsimbo ɨMfinjile ɨsimbwilwe hu nongwa yaakwe huje,
“Seshela aawe wʉ‑ʉli nʼgʉmba wʉ saga ʉpaapa,
bwaga ibwago aawe wʉ saga ʉlɨnjɨle abhe nʉ mwana,
pɨpo abhaana bha nʼshɨ ʉla,
ʉyo alehwilwe nʉ nʼnume,
bhinji
ashile abhaana bha nʼshɨ wa‑ali nʉ nʼnume.”a
28 Ɨshi bhooziwa bhamwetu,
amwɨ muli bhaana bha Ngʉlʉbhɨ afumilane nɨ ndapo yaakwe,
nanshi ɨsho ʉIsaaka ahali.
29 Leelo mu nsiku ziila,
ʉmwana ʉyo ahapapwilwe nʉ Abulahaamu hwa‑alɨnje asimishizye ɨndapo ɨya Ngʉlʉbhɨ,
ahanʼnetɨɨye amayɨmba ʉmwana ʉyo ahapapwilwe hwi‑ikhone lya Mʼpepo ʉMʼfinjile.
Shɨnɨɨsho ɨnsiku ɨzi,
abhakalwe abhɨ ndajizyo bhahubhalavya amwɨ mwa saga muli bhakalwe bhɨ ndajizyo.
30 Leelo ɨNsimbo ɨMfinjile ziyiga wɨlɨ?
Ziyiga,
“Munʼdaje ʉnʼshɨ ʉnʼkalwe peeka nʉ mwana waakwe,
hu nongwa ya‑aje ʉmwana ʉwa nʼshɨ ʉnʼkalwe saga ahwambɨɨlɨla ʉgaali peeka nʉ mwana ʉwa nʼshɨ ʉnʼsatulwe.”b
31 Ɨshi bhooziwa bhamwetu,
atɨ saga tili bhaana bha nʼshɨ ʉnʼkalwe,
leelo tili bhaana bha nʼshɨ ʉnʼsatulwe.