ABhagalatiya 3

Humʼmwɨtɨshe ʉYeesu awe huzilondolezye ɨndajizyo

Amwɨ muBhagalatiya, amwɨ saga muli nɨ njeele! Yʉ naanu wa‑abhalojile? Nahabhabhʉzɨɨzye pa pazelu huje, yeenu ʉYeesu ʉKilisiti ahafwiye pa shikhobheehanyo. 2 Ɨgo ɨhwanza ɨmanye afume huliimwɨ ga gɨɨga, wɨlɨ, mwahambɨlɨɨye ʉMʼpepo ʉMʼfinjile hwi‑idala ɨlya‑alondolezye ɨndajizyo, awe hwi‑idala ɨlya hwʉmvwe ɨNongwa ɨNyinza ɨzya Yeesu na huzyɨtɨshe? 3 Wɨlɨ, amwɨ saga muli nɨ njeele nanshi ɨsho? Amwɨ mwahandile shinza hwi‑idala ɨli‑ikhone ɨlya Mʼpepo ʉMʼfinjile, leelo ɨshi muhwanza amale hwi‑ikhone ɨlyɨ mʼbɨlɨ. 4 Wɨlɨ, zyonti ɨzyo zyahabhaajile amwɨ, saga zyahabhavwizye hohonti? Anɨ saga ɨhwɨtɨha huje saga zyahabhavwizye hohonti! 5 Wɨlɨ, ʉNgʉlʉbhɨ abhapiiye ʉMʼpepo ʉMʼfinjile na‑abhombe amayele paahati yeenyu pɨpo mulondoleziizye ɨndajizyo, awe pɨpo mwʉmvwɨzye ɨNongwa ɨNyinza ɨzya Yeesu na huzyɨtɨshe?

6 Sɨɨbhaji ɨnongwa ɨzya Abulahaamu nanshi sha zisimbwilwe mu Nsimbo ɨMfinjile huje, “Ʉmwene ahamʼmwɨtɨɨshe ʉNgʉlʉbhɨ. Ɨshi, afumilane nɨ‑ɨsho, ʉNgʉlʉbhɨ ahamʼmaazizya abhe nʼgolosu pitagaalila lyakwe.” 7 Ɨshi, mumanye huje abhantu ɨbho bhamʼmwɨtɨɨshe ʉNgʉlʉbhɨ, bha bhaana bha Abulahaamu bhɨ lyoli! 8 ƗNsimbo ɨMfinjile zisimishizya afume halɨ huje, abhantu bha saga Bhayahuudi bhahayibhaaziwa abhe bhagolosu hwi‑idala ɨlyɨ lwɨtɨho lwabho. ɄNgʉlʉbhɨ ahamʼmʉzɨɨzye ʉAbulahaamu ɨmandɨ ɨNongwa ɨNyinza huje, “Ashilile aawe abhantu abhɨ nsi zyonti bhahayisayiwa.” 9 Ɨshi, ɨbho bhahumʼmwɨtɨha ʉNgʉlʉbhɨ bhasayiwa nanshi shiila ʉAbulahaamu sha‑ahasayiiwe hu nongwa ya hwɨtɨshe.

10 Leelo abhantu bhonti ɨbho bhasʉʉbhɨla afyʉlwe hwi‑idala ɨlya‑abhombe ɨgo gahwanziwa nɨ ndajizyo zya Moose, bhaguniilwe. ƗNsimbo ɨMfinjile ziyiga, “Wowonti ʉyo saga akhata na‑abhombe gonti ɨgo gasimbwilwe mu Shitaabu ɨshɨ Ndajizyo, ʉyo aguniilwe.” 11 Lyoli nʉʉmo ʉmuntu ʉyo abhajiiye abhaaziwe abhe nʼgolosu pitagaalila lya Ngʉlʉbhɨ hwi‑idala ɨlya huzilondolezye ɨndajizyo, pɨpo ɨNsimbo ɨMfinjile ziyiga, “Ʉmuntu ʉyo abhaaziwa abhe nʼgolosu hwi‑idala ɨlyɨ lwɨtɨho, ʉyo ahayibha nʉ wʉʉmi.”  12 Lyoli ɨndajizyo zya Moose saga zisʉʉbhɨla ʉlwɨtɨho, leelo ɨmbombo, nanshi ɨNsimbo ɨMfinjile ziyiga, “Ʉyo abhomba gonti ɨgo gahwanziwa nɨ ndajizyo, ahayibha nʉ wʉʉmi hwi‑idala ɨlya‑alondolezye ɨndajizyo.”

13 ɄKilisiti ahatifyʉlɨle afume mu gunwe ʉwɨ ndajizyo hwi‑idala ɨlya hweje ʉgunwe ʉwo hu nongwa yeetu. ƗNsimbo ɨMfinjile ziyiga, “Wowonti ʉyo akhomeliilwe pa shikhobheehanyo aguniilwe.” 14 Ɨga gahabhombeshe huje ɨnsayo ɨyo ahapewiilwe ʉAbulahaamu, ɨbhɨnzɨle abhantu ɨbho saga Bhayahuudi bhope hwi‑idala ɨlya‑apatiihanywe nʉ Yeesu ʉKilisiti. Ɨshi hwi‑idala ɨlya humʼmwɨtɨshe ʉYeesu ʉKilisiti tibhajiiye humʼmwambɨɨlɨle ʉMʼpepo ʉMʼfinjile, ʉyo ʉNgʉlʉbhɨ ahalapile hutipeele.

Ɨndajizyo nɨ ndapo

15 Bhooziwa bhamwetu, ɨlaabha ɨnjanje hu shifwani ɨsha‑afume mu lemvu weetu ʉwa shila lisiku. Nkashele abhantu bhabhɨɨlɨ bhɨtɨhɨɨne na‑asimbilane, nʉʉmo ʉmuntu ʉyo abhajiiye anangaanye awe ahwonjeezye ahantu hohonti. 16 Ɨshi, ʉNgʉlʉbhɨ ahalapile hwa Abulahaamu ʉmaama weetu, ʉmwene peeka nɨ shikholo shaakwe. ƗNsimbo ɨMfinjile saga ziyiga, “Nɨ vikholo vyakwe,” hwa huje bhinji, leelo ziyiga, “Nɨ shikholo shaakwe,” hwa huje weeka, ʉyo yʉ Kilisiti. 17 Ɨgo ɨhwanza ayanje ga gɨɨga, ʉNgʉlʉbhɨ ahabhɨɨshɨle ɨndapo yaakwe nʉ Abulahaamu amaaha ɨmya zinɨ na mashʉmi gataatu lwa bhasɨɨle abhe nɨ ndajizyo zya Moose. Ɨshi, ɨndajizyo ɨzyo saga zibhajiiye anangaanye ɨndapo ɨyo, awe huyigalulanye ɨndapo. 18 Nkashele abhantu bhɨnzaga hwambɨɨlɨle ɨnsayo zyabho afume hwa Ngʉlʉbhɨ hwi‑idala ɨlya huzilondolezye ɨndajizyo, ɨshi ɨnsayo saga zyabhajilaga hutisʉʉbhɨzye ɨndapo ɨya Ngʉlʉbhɨ. Leelo ʉNgʉlʉbhɨ, hu mpyana yaakwe, ahamʼpiiye ʉAbulahaamu ɨnsayo ɨzi‑ilagano hu nongwa ahanʼnapiiye ɨsho. 19 Ɨshi ɨndajizyo zyashi? Ɨzyo zyahonjeziiwe mwi‑ilagano lwa haashila ahabhaazyo ahatali, hu nongwa ya hubhalolesye abhantu huje bhali nɨ mbiibhi, afishe ɨpo ahayɨnza ʉyo mpaapo ya Abulahaamu, ʉyo ʉNgʉlʉbhɨ ahatilapiiye. ɄNgʉlʉbhɨ ahamʼpiiye ɨndajizyo ʉMoose ashilile hwa nʼtumi. Ʉmwene ʉMoose ahabha nʼkʉndanyi wa bhantu nʉ Ngʉlʉbhɨ. 20 Ʉnʼkʉndanyi ahwanziwa abhanje, nkashele ɨmbali zibhɨɨlɨ zibhɨɨha ilagano. Leelo ʉNgʉlʉbhɨ ali weeka, ʉmwene ya yʉʉyo ahalibhɨɨshɨle ilagano nʉ Abulahaamu, ʉnʼkʉndanyi nʉʉmo.

Ɨnsɨɨbho ɨyɨ ndajizyo

21 Wɨlɨ, ɨndajizyo zisintana nɨ‑ɨgo ahalapile ʉNgʉlʉbhɨ? Ndaali! Nkashele ɨndajizyo zyabhanga zibhɨhwɨlwe hubhapeele abhantu ʉwʉʉmi, ɨshi tabhajilaga abhaaziwe abhe bhagolosu hwi‑idala ɨlya‑akhate ɨndajizyo. 22 Leelo saga ɨsho. ƗNsimbo ɨMfinjile ziyiga, abhantu bhonti bhalongozewa ni‑ikhone ɨlyɨ mbiibhi huje hwi‑idala ɨlya humʼmwɨtɨshe ʉYeesu ʉKilisiti lwene tihwambɨɨlɨla ɨgo ahalapile ʉNgʉlʉbhɨ.

23 Sha‑asɨɨle ahwɨnze ʉKilisiti ʉyo abhantu bhahakhondɨɨye humʼmwɨtɨshe, ɨndajizyo zyahatibhombile abhe bhakalwe, tahali tigʉʉla abhɨɨshɨlwe pa pazelu ʉlwɨtɨho ʉlwo. 24 Ɨshi ɨndajizyo ɨzyo zyahali zihutilongozya nanshi shiila ʉsʉnji weetu, afishe hu habhaazyo ɨho ʉKilisiti ahɨnzɨle, huje hwi‑idala ɨlyɨ lwɨtɨho tibhaaziwe abhe bhagolosu. 25 Leelo hu nongwa ya‑aje ɨshi timʼmwɨtɨɨshe ʉKilisiti, atɨ saga tilongozewa nantele nɨ ndajizyo ɨzyo.

26 Hwi‑idala ɨlyɨ lwɨtɨho, amwɨ mwenti muli bhaana bha Ngʉlʉbhɨ, hu nongwa ya huje mupatihɨɨnywe nʉ Yeesu ʉKilisiti. 27 Amwɨ mwenti ɨbho mwoziiwe, mupatihɨɨnywe nʉ Kilisiti, mulɨngaana nanshi ahunʼkwate ʉKilisiti. 28 Ɨpo nawumo ʉlegano ʉwa Nʼnyahuudi na wa saga Nʼnyahuudi, awe ʉmuntu ʉnʼkalwe nʉ nʼsatulwe, awe ʉnʼnume nʉ nʼshɨ. Amwɨ mwenti muli hantu heeka, hu nongwa mupatihɨɨnywe nʉ Yeesu ʉKilisiti. 29 Amwɨ muli bha Kilisiti na hwi‑idala ɨlyo muli mpaapo ya Abulahaamu, ɨshi mwahayambɨɨlɨla gaala ɨgo ʉNgʉlʉbhɨ ahanʼnapiiye ʉAbulahaamu.