Ɨmanyizyo ɨzya Paulo zihwɨtɨshɨlwa na bhasontwa abhanjɨ
2
Amaaha ishʉmi na ganɨ lwa gaashila,
nahabhalile nantele hu Yelusaleemu peeka nʉ Balinaaba,
nahamʼmwega nʉ Tiito,
nahabhala nawo.
2 Nahabhalile hu Yelusaleemu,
pɨpo ʉNgʉlʉbhɨ ahandolesiizye huje ɨmbale.
Lwa naafiha,
nahakhɨɨye hu mfiso na bhalongozi abhɨ shibhanza,
nahabhabhʉʉzya ɨNongwa ɨNyinza ɨzya Yeesu ɨzyo ɨlʉmbɨɨlɨla abhantu ɨbho saga Bhayahuudi.
Nahabhombile ɨsho,
hu nongwa ya huje nahali ɨhwanza huje abhalongozi ɨbha bhanɨɨtɨshe,
huje ɨmbombo yaanɨ ɨgandi ateeje lwene.
3 Bhahɨtɨɨhana naanɨ,
hwope ʉwamwetu ʉTiito ʉyo saga Nʼnyahuudi,
saga bhahamʼmwʉmɨlɨzɨɨzye alondolezye ɨndajizyo zya Moosea ɨzya‑atende ɨngoola ɨya hwitagaalila ɨyɨ lume.b
4 Ɨnongwa ɨya‑atende ɨngoola yahabhʉzɨlɨzɨɨwe na bhantu ɨbho bhahali bhahwibhɨɨha huje bhaholo bheetu.
Leelo bhantu ɨbho bhahwitʉsɨɨzye hu shevu,
huje bheenye ʉsatulwe lwetu ʉlwo tili nalwo hu nongwa ya huje tipatihɨɨnywe nʉ Yeesu ʉKilisiti.
Ɨnsɨɨbho zyabho zyahali huje bhatibhɨɨshe tibhe bhakalwe bha‑alondolezye ɨndajizyo zya Moose.
5 Atɨ saga tahɨtɨhɨɨne nabho lwonti huje bhagandi agalulanye ɨlyoli ɨyɨ Nongwa ɨNyinza ɨzya Yeesu huliimwɨ.
6 Leelo abhalongozi ɨbho,
bha bhahatinihwaga na bhantu,
saga bhahanavwizye hohonti lwɨ‑ɨlʉmbɨɨlɨla.
Lyoli bhahali bhatinihwa tee,
leelo hwaliinɨ ɨgo saga hantu hohonti,
pɨpo ʉNgʉlʉbhɨ saga asaaga ʉgoosi wa muntu.
7 Lyoli bhahamanya huje ʉNgʉlʉbhɨ ahansonteleziizye hubhalʉmbɨɨlɨle ɨNongwa ɨNyinza ɨzya Yeesu abhantu ɨbho saga Bhayahuudi,
nanshi ɨsho ahanʼsonteleziizye ʉPeeteli hubhalʉmbɨɨlɨle aBhayahuudi.
8 ɄNgʉlʉbhɨ ʉyo ahamʼmɨɨshɨle ʉPeeteli abhe nʼsontwa waakwe hwa Bhayahuudi,
ʉyo ya yʉʉyo ahambɨɨshɨle anɨ abhe nʼsontwa hwa bhantu ɨbho saga Bhayahuudi.
9 Ɨshi abhalongozi ɨbha abhagoosi,
ʉYaakobo,
ʉKeefa hwa huje ʉPeeteli,
nʉ Yoohani,
bhahazyaganya huje ʉNgʉlʉbhɨ hu mpyana yaakwe,
ahampiiye ɨmbombo ɨnɨ.
Bhahatikhata ɨnyoobhe anɨ nʉ Balinaaba,
huje shibhe shimanyishizyo sha palishimo.
Tahɨtɨɨhana huje atɨ tihwanziwa abhale abhombe ɨmbombo hwa bhantu ɨbho saga Bhayahuudi,
abheene bhabhale hwa Bhayahuudi.
10 Bhahatilaabha ahantu hamo,
huje tibhanje tihubhaavwa abhooziwa abhapɨɨna abha hu Yelusaleemu,
ahantu ɨho nanɨ ɨhwidandamiha abhombe hu maha.
ɄPaulo ahunʼkhajila ʉPeeteli
11 Ɨshi pamandɨ ʉKeefa,
hwa huje ʉPeeteli,
ahɨnza hwi‑ibooma ɨlyɨ Antiyokiya hutiyaatile,
isiku limo nahanʼkhajila pa pazelu hu nongwa ahali atulile.
12 Nahabhombile ɨsho,
pɨpo ʉPeeteli ahali alya na bhooziwa ɨbho saga Bhayahuudi,
leelo ahanda hubhaleshe ɨbho lwa bhaafiha aBhayahuudi bhamo ɨbho bhahasonteleziiwe nʉ Yaakobo.
Ahabhogʉʉpe aBhayahuudi ɨbho bhahali bhakhajiilizya huje abhooziwa bhonti bhatendwe ɨngoola ɨzya hwitagaalila ɨzyɨ lume.
13 Ɨpo aBhayahuudi bhamo bhahanda abhombe nanshi ɨsho ahabhombaga ʉPeeteli,
poshe bhahamɨɨnye huje bhabhomba ʉgulugulu.
Wope ʉBalinaaba bhahanʼteezya,
ahanda ʉgulugulu!
14 Ɨpo lwa naalola huje saga bhabhomba alɨngaane nɨ lyoli ɨyɨ Nongwa ɨNyinza ɨzya Yeesu,
nahamʼmʉzɨɨlɨzya ʉKeefa hwa huje ʉPeeteli pa pazelu pitagaalila lya bhantu bhonti nahaga,
“Poshe aawe ʉli Nʼnyahuudi,
ʉlondolezya ɨndajizyo ɨzya bhantu ɨbho saga Bhayahuudi.
Yeenu ɨshi ʉhubhabijiilizya abhantu ɨbho saga Bhayahuudi alondolezye amiiho ga Bhayahuudi?”
Abhantu bhonti bhafyʉlwa hwi‑idala ɨlya humʼmwɨtɨshe ʉKilisiti
15 Lyoli atɨ tipapwilwe na bhapaafi aBhayahuudi,
saga tili nanshi abhantu bha saga Bhayahuudi ɨbho tihubhakwizya bhabhomba mbiibhi.c
16 Atɨ timɨɨnye huje abhantu bhabhaaziwa nʉ Ngʉlʉbhɨ abhe bhagolosu hwa humʼmwɨtɨshe ʉYeesu ʉKilisiti lwene,
saga hwa‑alondolezye ɨndajizyo zya Moose.
Natɨ timʼmwɨtɨɨshe ʉYeesu ʉKilisiti huje tibhaaziwe abhe bhagolosu hu nongwa yɨ‑ɨgo ahabhombile ʉYeesu,
saga hwa‑alondolezye ɨndajizyo zya Moose.
Nʉʉmo ʉmuntu ʉyo abhaziiwe abhe nʼgolosu hwi‑idala ɨlya‑alondolezye ɨndajizyo zya Moose.d
17 Ɨshi,
tihwanza abhaaziwe abhe bhagolosu hwi‑idala ɨlya‑apatiihanywe nʉ Kilisiti,
leelo tiloleha hwa bhantu abhanjɨ huje atɨ tili bhabhomba mbiibhi,
pɨpo saga tihuzilondolezya ɨndajizyo zya Moose.
Wɨlɨ,
lyoli ʉKilisiti ahutibhɨɨha huje tibhanje tibhomba ɨmbiibhi?
Ndaali nka hashe!
18 Leelo nkashele ɨweelela ahwɨtɨshe ɨnongwa ɨyɨ mandɨ ɨya‑alondolezye ɨndajizyo,
ɨnongwa ɨyo nahakhaana,
ɨpo ɨlolesya huje anɨ ɨndi mʼmomba mbiibhi.
19 Enya,
nahali ɨhuzilondolezya ɨndajizyo zya Moose,
ɨndajizyo ɨzyo zyahali zihundonga.
Leelo ɨshi saga ɨlɨnga nantele alembe hwa‑alondolezye ɨndajizyo ɨzyo,
huje ɨmbwezye alembe nanshi ɨsho ʉNgʉlʉbhɨ ahwanza.
20 Ʉlemvu waanɨ ʉwɨ mandɨ wahayaziiwe peeka nʉ Kilisiti pa shikhobheehanyo,
leelo ɨshi ɨndi mwʉmi.
Hwope ɨsho saga huje ɨndi mwʉmi anɨ,
leelo ʉKilisiti ali mwʉmi muuhati yaanɨ.
Ʉwʉʉmi ʉwo ɨndi nawo ɨshi,
ɨndi nawo hwa humʼmwɨtɨshe ʉMwana wa Ngʉlʉbhɨ.
Ʉmwene ahangɨɨne,
ahahwifumya ʉwʉʉmi waakwe humfyʉle.
21 Saga ɨhwanza huyikhaane ɨmpyana ya Ngʉlʉbhɨ.
e Nkashele ʉmuntu abhajiiye abhe nʼgolosu hwi‑idala ɨlya‑alondolezye ɨndajizyo zya Moose,
ɨpo ʉKilisiti ahafwiye lwene!