Ɨkalaata ɨya nʼsontwa ʉPaulo hwa
Bhagalatiya
ɄPaulo ahubhalamuha aBhagalatiya
1
Ɨkalaata ɨnɨ ɨfumile huliinɨ anɨ nɨPaulo nɨnʼsontwa.
Anɨ saga nahasonteleziiwe na bhantu awe hu ndajizyo ɨya muntu ʉmo.
Leelo nahasonteleziiwe nʉ Yeesu ʉKilisitia yʉʉyo,
nʉ Daada ʉNgʉlʉbhɨ ʉyo ahanʼzyʉsyɨzye ʉYeesu afume hwa bhafwe.
2 Anɨ na bhooziwa abhamwetu bhonti ɨbho bhali peeka naanɨ,
tihubhalamuha amwɨ mwa muli mu vibhanza ɨvya mu mukowa ʉgwɨ Galatiya.
3 Ɨmpyana nʉ tengaanu afume hwa Ngʉlʉbhɨ,
ʉDaada weetu,
na hwa Mwɨnɨ weetu ʉYeesu ʉKilisiti,
vibhanje peeka naamwɨ.
4 ɄKilisiti afumiizye ʉwʉʉmi waakwe hu nongwa ɨya huzyefwe ɨmbiibhi zyetu,
huje atifyʉle afume mu nsi ɨnɨ ɨmbiibhi.
Ahabhombile ɨsho alɨngaane nʉ kʉndwe wa Ngʉlʉbhɨ,
ʉyo yʉ Daada weetu.
5 ɄNgʉlʉbhɨ amwamihwaje wiila na wiila.
Aameni!
Nazimo ɨNongwa ɨNyinza ɨzyɨnjɨ ɨzyɨ lyoli
6 Anɨ ɨswiga tee hu nongwa yeenyu!
Ahabhaazyo hashe lwene hashilile,
amwɨ muhunʼsambushila ʉNgʉlʉbhɨ ʉyo ahabhakwiziizye hu mpyana ya Kilisiti,
nantele mulondolezya ɨmanyizyo ɨzyɨnjɨ ɨzyo abhanjɨ bhayanga huje Nongwa Nyinza ɨzya Yeesu.
7 Lyoli nazimo ɨNongwa ɨNyinza ɨzyɨnjɨ.
Leelo bhalɨɨho abhantu bha bhahubhataamya amwɨ,
nantele ɨbha bhahwanza agalulanye ɨNongwa ɨNyinza ɨzya Kilisiti.
8 Leelo,
hwope nkashele tɨɨtɨ tibhasontwa,
awe bhantumib afume hu mwanya,
ahwɨnza ʉmuntu na hubhalʉmbɨɨlɨle ɨNongwa ɨNyinza ɨzyo zili paayo nɨ‑ɨzyo tahabhalʉmbɨlɨɨye atɨ,
ʉNgʉlʉbhɨ anʼgune ʉmuntu ʉyo!
9 Ɨhubhabhʉʉzya amwɨ nantele nanshi ɨsho nahabhabhʉzɨɨzye hu habhaazyo haala huje,
nkashele ʉmuntu ʉmo ahubhalʉmbɨɨlɨla ɨNongwa ɨNyinza ɨzyɨnjɨ,
ɨzyo zili paayo nɨ‑ɨzyo mwahambɨlɨɨye,
ʉNgʉlʉbhɨ anʼgune ʉmuntu ʉyo!
10 Wɨlɨ,
ɨshi musɨɨbha huje ɨhwanza aganwe na bhantu?
Ndaali,
ɨhwanza aganwe nʉ Ngʉlʉbhɨ yʉʉyo!
Nkashele nanzaga aganwe na bhantu,
anɨ saga nɨnzaga‑abhe nʼkalwe wa Kilisiti.
ɄPaulo asonteleziiwe nʉ Ngʉlʉbhɨ alʉmbɨɨlɨle ɨNongwa ɨNyinza
11 Bhooziwa bhamwetu,
ɨhwanza mumanye huje,
ɨNongwa ɨNyinza ɨzya Yeesu ɨzyo nahabhalʉmbɨlɨɨye anɨ saga zyahafumile hwa bhantu.
12 Saga nahambɨlɨɨye ɨnongwa ɨzyo afume hwa bhantu awe amanyiziwe nʉ muntu wowonti.
Lyoli ʉYeesu ʉKilisiti yʉʉyo ʉyo ahandolesiizye anɨ ɨnongwa ɨzyo.
13 Amwɨ mwʉmvwɨzye ɨnongwa ɨzyɨ njendo zyanɨ ɨzyɨ mandɨ mu mpuuto ɨya Bhayahuudi,
nanshi nahashilaviizye tee ɨshibhanza ɨsha Ngʉlʉbhɨ na‑ahwanze hushiyazye lwonti.
14 Lyoli nahabhatolile abhamwetu abhinji ɨbho tahapapwilwe peeka nabho alwɨle ɨmpuuto ɨya Bhayahuudi.
Nahabajile tee akhate ɨmanyizyo ɨzya bhayise bheetu.
15 Leelo ʉNgʉlʉbhɨ,
hu mpyana yaakwe,
ahansaluuye shɨ‑ɨnsɨɨle apaapwe,
ahankwizya huje ɨmbe ɨhumʼmombela.
16 ɄNgʉlʉbhɨ ahalola shinza andolesye ʉMwana waakwec sha‑alɨɨho,
huje ɨndʉmbɨɨlɨle ɨNongwa ɨNyinza ɨzya Mwana waakwe hwa bhantu bha saga Bhayahuudi.
Hu habhaazyo ɨho,
saga nahajehɨɨne nʉ muntu wowonti,
17 nantele saga nahabhalile hwi‑ibooma ɨlyɨ Yelusaleemud hwɨ‑ɨbho bhahali bhasontwa bha hwande huliinɨ.
Lyoli nahabhalile heeka hu nsi ɨyɨ Alaabiya,
pamandɨ nahaweela hwi‑ibooma ɨlyɨ Damesiki.
18 Amaaha gataatu lwa gaashila,
ɨpo nahabhala hu Yelusaleemu huje ɨhomaane nʉ Keefa hwa huje ʉPeeteli.
Nahakhɨɨye hwa mwene ɨnsiku ishʉmi na zisaanu lwene.
19 Leelo saga nahakhomɨɨne nʉ nʼsontwa ʉwɨnjɨ,
lyoli ʉYaakobo ʉnʼdoodo wa Mwɨnɨ ʉYeesu.
20 ɄNgʉlʉbhɨ amɨɨnye huje ɨgo ɨhubhasimbila gɨ lyoli,
saga gi‑ilenga.
21 Ɨshi,
pamandɨ nahabhalile hu mukowa ʉgwɨ Siiliya nʉ gwɨ Kilikiya.
22 Hu habhaazyo ɨho,
abhooziwa abha Kilisiti abha mu vibhanza ɨvyɨ mukowa ʉgwɨ Yudeeya,
saga bhahamɨɨnye anɨ.
23 Bhahazimɨɨnye lwene ɨnongwa ɨzyo bhahʉmvwɨzye huje,
“Ʉmuntu ʉyo ahali ahutilavya hu wandilo,
ɨshi alʉmbɨɨlɨla ɨNongwa ɨNyinza ɨzyɨ lwɨtɨho luluula ʉlwo ahanzaga huluyazye.”
24 Ɨpo bhahamʼmwamiha ʉNgʉlʉbhɨ hu nongwa yɨ‑ɨgo nahali ɨbhomba.