Ahwavwane
6
Bhooziwa bhamwetu,
nkashele mwamanya huje ʉmuntu abhomba ʉbhiibhi,
amwɨ mwa mulongozewa nʉ Mʼpepo ʉMʼfinjile munʼsunde hu woloolo huje alaate ɨmbiibhi zyakwe.
Leelo mubhanje maaso huje amwɨ mwɨmwɨ mugandi ajelwe alondolezye ɨnjendo zyakwe.
2 Avwanaji mu mayɨmba geenyu.
Abhombe ɨsho hulondolezye ɨndajizyo zya Kilisiti.
3 Ʉmuntu wowonti ʉyo ahwilola akhondɨɨye ashile abhanjɨ,
leelo saga ali ɨsho,
ʉyo ahwigobela yʉʉyo mwene.
4 Leelo shila muntu ahwiyeenye ɨnjendo zyakwe yʉʉyo.
Nkashele ʉmuntu abhomba ʉwinza,
ɨpo abhajiiye ahwibaade hu winza ʉwo abhombile.
Leelo agandi ahwilɨngaanisye nʉ muntu ʉwɨnjɨ ɨgo abhombile.
5 Ɨnjanjile ɨsho,
pɨpo shila muntu ahwanziwa abhʉʉsye izigo lyakwe yʉʉyo.
6 Ʉmuntu ʉyo amanyizya izwi lya Ngʉlʉbhɨ,
abhanje ahumʼpeela ʉmʼmanyizyi waakwe ɨvintu ɨvinza ɨvyo avyajile.
7 Mugandi ahwigobele,
ʉNgʉlʉbhɨ saga agobelwa.
Ʉmuntu ahayivuna ɨvyo ahavyalile.
8 Ɨshi,
ʉmuntu ʉyo alondolezya ɨnsʉngwo ɨzyɨ mʼbɨlɨ,
ʉyo ahayambɨɨlɨla ʉfwe.
Leelo ʉyo alondolezya ʉMʼpepo ʉMʼfinjile,
ʉyo ahayambɨɨlɨla ʉwʉʉmi ʉwa wiila.
9 Ɨshi,
tigandi alite abhombe ɨnyinza.
Nkashele tijimbiilila abhombe ɨnyinza,
tahayambɨɨlɨla ɨnyinza ahabhaazyo lwa haafiha.
10 Ɨshi,
ahabhaazyo honti ɨho tili nɨ fwasi,
tibhanje tihubhabhombela ɨnyinza abhantu bhonti,
tee hwa bhooziwa abhamwetu.
Ɨnsundo ɨzya hu malishilo
11 Enyaaji ɨsho ɨsimba hu nsimbo ɨngoosi.
Ɨshi ɨhubhasimbila hu nʼkhono gwanɨ nɨɨnɨ.
12 Abhantu ɨbho bhahubhabijiilizya amwɨ atende ɨngoola ɨya hwitagaalila ɨyɨ lume,
bhabhomba ɨsho pɨpo bhahwanza bhatinihwe na Bhayahuudi.
Bhabhomba ɨsho huje gasahabhaaje amayɨmba ɨgo gafumilana na‑alʉmbɨɨlɨle hu nongwa yɨ shikhobheehanyo sha Kilisiti.
13 Nantele abhantu bhaala bha bhahwanza huje abhooziwa bhonti bhatende ɨngoola ɨya hwitagaalila ɨyɨ lume,
abheene saga bhahuzilondolezya ɨndajizyo zyonti.
Bhahwanza amwɨ mutende ɨngoola huje bhahwibaade hu shimanyishizyo ɨsho mu mabɨlɨ geenyu.
14 Leelo anɨ saga ɨhwibaada ahantu hohonti,
leelo ɨhwibaada hu nongwa yɨ shikhobheehanyo ɨsha Mwɨnɨ weetu ʉYeesu ʉKilisiti.
Afumilane nɨ shikhobheehanyo ɨsho,
ɨnongwa zyonti ɨzya mu nsi saga zili nɨ zya pa mwanya hwaliinɨ,
nantele ɨgo gɨ‑ɨlola huje gali nɨ zya pa mwanya,
abhantu abha mu nsi bhalola huje saga gali nɨ zya pa mwanya.
15 Atende ɨngoola ɨya hwitagaalila ɨyɨ lume awe asinte atende saga huhwavwa ahantu hohonti,
leelo apelwe shipya nʉ Ngʉlʉbhɨ ʉhwo hwa huhwavwa.
16 Ʉtengaanu nɨ nkʉmbʉ ɨvya Ngʉlʉbhɨ vibhanje peeka na bhantu bhonti ɨbho bhalondolezya ɨlyoli ɨnɨ.
Abheene lyoli bhasalulwe bha Ngʉlʉbhɨ.