Ɨndoleshelo zya Paulo nʉ woonywa waakwe
12
Ɨhondɨɨye ahwibaade hwope nkashele saga ɨhuhaaga hohonti.
Ɨshi,
ɨhwanza ahwibaade hu nongwa yɨ ndolesheloa nɨ nongwa ɨzyɨnjɨ ɨzyo ahandolesiizye ʉMwɨnɨ ʉYeesu.
2 Ɨmʼmɨɨnye ʉmuntu ʉmo ʉnʼsundwe wa Kilisiti,
ʉyo amaaha ishʉmi na ganɨ ga gahashilile,
ahanyetuliilwe afishe hu mwanya ɨya hu mwanya tee.
b Saga ɨmɨɨnye nkashele ahali mu mʼbɨlɨ gwakwe,
awe nkashele saga ahali mu mʼbɨlɨ gwakwe hu habhaazyo ɨho ahanyetuliilwe.
Lyoli ʉNgʉlʉbhɨ ya yʉʉyo amɨɨnye.
3-4 Ɨmɨɨnye huje ʉmuntu ʉyo ahanyetuliilwe afishe huula hu Paladiiso.
c Leelo saga ɨmɨɨnye huje,
lumo ahanyetuliilwe mu mʼbɨlɨ gwakwe,
lumo saga ahali mu mʼbɨlɨ gwakwe,
lyoli ʉNgʉlʉbhɨ ya yʉʉyo amɨɨnye.
Ʉhwo ahʉmvwa amazwi aga‑aswijizye tee ɨgo ʉmuntu saga abhajiiye ayanje,
nantele saga akhondɨɨye ayanje.
5 Ɨshi ɨhwibaada hu nongwa ya muntu ʉyo.
Anɨ saga ɨhwibaada hu nongwa yɨ‑ɨsho ɨndi,
leelo anɨ ɨhwibaada hu nongwa yɨ woonywa waanɨ.
6 Hwope nkashele nanzaga hwibaade,
saga nɨnzaga‑abhe nʼnema,
pɨpo nɨnzaga‑abhe ɨyanga ɨzyɨ lyoli.
Leelo ɨhwizijila ahwibaade,
huje ʉmuntu wowonti aleshe hundole anɨ huje ɨhondɨɨye tee ashile ɨgo bhahugalola na hugʉmvwe afume hwaliinɨ.
7 Leelo huje ɨndeshe ahwibaade tee hu nongwa ɨyɨ minji aga‑aswijizye ɨgo ʉMwɨnɨ ʉYeesu andanjile,
nahapeewa amayɨmba amakhali mu mʼbɨlɨ gwanɨ ɨgo gali nanshi ɨlimvwa lya lindasile.
Amayɨmba ɨgo gali nanshi ʉnʼtumi wa Seetano,
ʉyo asonteleziiwe huje anjɨmvye,
huje ɨndeshe ahwibaade tee.
8 Nahanʼnaabha ʉMwɨnɨ ʉYeesu hataatu huje amfyʉle mu mayɨmba ɨgo.
9 Leelo ʉmwene ahambʉʉzya ahaga,
“Ɨmpyana yaanɨ ɨyiiye,
pɨpo mu woonywa mwa mwʉmwo ikhone lyanɨ liloleha.”
Mwɨ‑ɨlyo ɨmbala‑abhe ɨsalifya hu luseshelo ʉlugoosi hu nongwa yɨ woonywa waanɨ,
huje ikhone lya Kilisiti libhe peeka naanɨ.
10 Ɨsho ɨndi nʉ luseshelo hu nongwa yɨ woonywa,
aligwe,
abhe mu mayɨmba na‑atamiziwe hu nongwa ya Kilisiti,
pɨpo hu habhaazyo lwɨ‑ɨmba mwonywa,
ɨpo lwɨ‑ɨmba ni‑ikhone.
Ɨlyoga lya Paulo hu nongwa ya Bhakolinto
11 Ɨshi,
ɨyanga nanshi aje ɨndi nʼnema,
amwɨ mwɨmwɨ mumbombile huje ɨnjanje ɨsho.
Amwɨ mwahali mukhondɨɨye hunsʉmbe,
pɨpo hwope nkashele ɨloleha huje saga ɨhondɨɨye,
anɨ saga ɨndi nʼsontwa nʼdoodo ashile ɨbho muyanga bha “bhasontwa bhagoosi.”
12 Hu habhaazyo lwɨ‑ɨndi huliimwɨ,
nahali nʉ jimbiilizu na‑abhombe amayele nɨ vimanyishizyo ɨvyo vilolesya huje anɨ ɨndi nʼsontwa.
13 Nahamo ahantu ɨho nahabhombile hu vibhanza ɨvyɨnjɨ,
ɨho saga nahabhombile huliimwɨ.
Lumo nahabhabhombɨɨye shibhiibhi ɨpo saga nahali lizigo huliimwɨ.
Nkashele ʉwo wʉ bhiibhi waanɨ,
muhobhoshele!
14 Ɨshi ɨhwilɨngaanya ahwɨnze huliimwɨ ʉlwa taatu,
leelo saga ɨnza‑abhe lizigo huliimwɨ.
Saga ɨsʉngwa ɨvintu vyenyu,
lyoli ɨhubhanza amwɨ.
Ɨyanga ɨlyo,
pɨpo abhaana saga bhahwanziwa abhute ɨvintu huje vibhe vya bhapaafi,
lyoli abhapaafi bhakhondɨɨye abhute ɨvintu huje vibhe vya bhaana.
15 Anɨ ɨndi nʉ luseshelo afumye ɨvintu vyanɨ na hwifumye nɨɨnɨ hubhaavwe amwɨ.
Leelo ɨshi ɨbhoneha huje ɨpo anɨ ɨshila hubhagane tee,
amwɨ ɨpo muhwonjeezya ayʉnzye hungane.
16 Hwope nkashele muhwɨtɨha huje saga nahali lizigo huliimwɨ,
leelo abhanjɨ muuhati yeenyu bhayanga huje,
“ɄPaulo nʼshevu,
ahubhakʉndɨɨlɨzya hwi‑ilenga.”
17 Wɨlɨ,
nahabhombile ilenga huje ɨneeje ahantu hohonti huliimwɨ ashilile hwa bhantu ɨbho nahabhasonteleziizye?
18 Nahanʼnaabhile ʉTiito peeka nʉ mwoziwa ʉwamwetu ʉwɨnjɨ huje bhɨnze huliimwɨ.
Wɨlɨ,
ʉTiito ahabhombile hohonti huliimwɨ hwi‑ilenga?
Ɨshi anɨ nʉ mwene tili mwoyo gweka mu mbombo,
nantele hwope ɨnjendo zyetu zili peeka!
19 Lumo musɨɨbha huje hu habhaazyo honti ɨha tihwiyʉʉmɨla huje,
mugandi hutilole huje tili bhabhiibhi pitagaalila lyenyu.
Atɨ tiyanga ɨga,
pɨpo tipatihɨɨnywe nʉ Kilisiti,
wope ʉNgʉlʉbhɨ amɨɨnye.
Bhakʉndwe,
ɨga gonti tibhomba hu nongwa ɨya hubhaavwe amwɨ ahwɨtɨshe shinza.
20 Ɨshi ɨhwogopa huje,
ahabhaazyo ɨho nahayɨnza huliimwɨ nahayihubhaaga muli nɨ njendo ɨzyo saga ɨhuziseshela anɨ.
Ɨlyo lyahayihumbɨɨha anɨ abhombe ɨgo amwɨ saga muhugaseshela.
Ɨhwogopa huje ɨmbajiiye ahubhaaje amwɨ muli ni‑ibho,
ɨjɨɨla,
ilyoyo,
asinte ahwʉmvwane,
agobelane,
na‑ayangane shibhiibhi,
na hwibaade na‑abhe sinta zingatizu ʉwa hwʉmvwane.
21 Nantele ɨhwogopa huje lwa nahayɨnza huliimwɨ,
ʉNgʉlʉbhɨ waanɨ ahayibhomba aje ɨndole ɨnsoni pitagaalila lyenyu.
Nahayizugumila alole abhantu abhinji mwaliimwɨ ɨbho bhahabhombile ɨmbiibhi ʉhwo hwisinda,
leelo saga bhalaatile.
Bhasɨɨle bhali nɨ njendo ɨmbiibhi ɨzyɨ weegu nɨ nsʉngwo ɨmbiibhi ɨzyɨnjɨ ɨzyo bhahali nazyo.