Ɨnsundo ɨzya hu malishilo
13
Ɨnɨ ɨbhala‑abhe lwa taatu anɨ ahwɨnze huliimwɨ.
ƗNsimbo ɨMfinjile ziyiga,
“Ɨnongwa yoyonti ɨsimishiziwe hu simishizi ʉwa bhantu bhabhɨɨlɨ awe bhataatu.”a
2 Hu habhaazyo ɨho nahɨnzɨle huliimwɨ ʉlwa bhɨɨlɨ,
nahabhasundile huje lwa nɨnza saga nahayibha nɨ nkʉmbʉ na bhantu ɨbho bhabhombile ɨmbiibhi.
Ɨshi,
ɨhubhabhʉʉzya ɨlyo nantele,
huje saga ɨnza‑abhe nɨ nkʉmbʉ hwa bheene na bhanjɨ bhonti.
3 Nahayibhomba ɨlyo,
pɨpo muhwanza ɨshimanyishizyo ɨsha‑amanye huje ʉKilisiti ayanga ashilile huliinɨ.
ɄKilisiti ʉyo saga dedebhazu,
lyoli ali ni‑ikhone,
ya yʉʉyo abhomba ɨmbombo paahati yeenyu.
4 Hwope nkashele ʉKilisiti saga ahali ni‑ikhone hu habhaazyo lwa‑akhomeelwa pa shikhobheehanyo na‑afwe,
ɨshi ali mwʉmi mwi‑ikhone lya Ngʉlʉbhɨ.
Sha shɨɨsho,
natɨ saga tili ni‑ikhone mwa Kilisiti,
leelo lwa tihubhabhombela amwɨ,
tahayibha bhʉʉmi peeka nʉ mwene mwi‑ikhone lya Ngʉlʉbhɨ.
5 Ɨshi muhwiyenyaaje mwɨmwɨ,
huje mumanye nkashele muli nʉ lwɨtɨho.
Wɨlɨ,
saga mumɨɨnye huje ʉYeesu ʉKilisiti ali muuhati yeenyu?
Nkashele saga mumɨɨnye,
ɨpo mupotiilwe.
6 Leelo ɨsʉʉbhɨla huje amwɨ munza‑amanye huje atɨ saga tipotiilwe.
7 Tihunʼnaabha ʉNgʉlʉbhɨ huje mugandi abhombe ɨmbiibhi.
Saga aje tihwanza aloleshe huje tɨtɨshɨlɨɨlwe,
leelo tihwanza amwɨ mubhombe ɨnyinza,
hwope atɨ tiloleshe huje tipotiilwe.
8 Ɨnjanjile ɨsho,
pɨpo saga tili ni‑ikhone ɨlya‑azijile ɨlyoli,
lyoli asimishizye ɨlyoli.
9 Tiseshela,
pɨpo atɨ tili bhadedebhazu,
leelo amwɨ muli ni‑ikhone.
Tihunʼnaabha ʉNgʉlʉbhɨ hubhaavwe mubhe bhalʉnjɨsu.
10 Ɨhubhasimbila amazwi ɨga hu habhaazyo lwɨ‑ɨnsɨɨle ahwɨnze,
huje lwa nahayɨnza huliimwɨ,
ɨngandi hugalole ɨgo gabhajiiye humbɨɨshe huje ɨmbe nʼkhali hu nongwa yi‑ikhone ɨlyo ampiiye ʉMwɨnɨ.
Ɨnjanjile ɨsho,
pɨpo ʉMwɨnɨ saga ampiiye ikhone ɨlya hubhanangaanye,
leelo ɨlya hubhakhamantanye mu lwɨtɨho.
Amazwi aga hu malishilo
11 Ɨshi bhooziwa bhamwetu seshelaji.
Mubhanje bhalʉnjɨsu,
muzinzanyaaje,
mubhe palishimo,
mubhe nʉ tengaanu.
Wope ʉNgʉlʉbhɨ wa‑ali nʉ kʉndwa nʉ tengaanu ahayibha peeka naamwɨ.
12 Mulamuhanaje hu kʉndwa wa Yeesu ʉKilisiti.
13 Abhooziwa bhonti ɨbho tili peeka bhahubhalamuha.
14 Ɨmpyana ya Mwɨnɨ ʉYeesu ʉKilisiti,
nʉ kʉndwa wa Ngʉlʉbhɨ,
nʉ lwʉmvwano lwa Mʼpepo ʉMʼfinjile,
vibhanje peeka naamwɨ mwenti.