ɄPaulo na bhasontwa abhi‑ilenga
11
Hwope nkashele ɨyanga nanshi ɨndi nʼnema,
ɨlaabha muntejeelezye.
2 Anɨ ɨndi nɨ jɨɨla naamwɨ.
Ɨjɨɨla ɨyo ɨfuma hwa Ngʉlʉbhɨ,
pɨpo muli nanshi ʉnʼnɨndu ʉnʼduvya ʉnʼsangalusu,
ʉyo nahamʼmwɨtɨshɨɨye ahwegwe nʉ nʼnume weeka,
ʉyo yʉ Kilisiti.
3 Leelo ɨshi ɨhwogopa huje,
nanshi ɨsho ʉEeva ahagobeliilwe nɨ nzoha ɨla ɨnshevu,
shɨɨsho namwɨ musahasheele agobelwe,
musahawuleshe ʉsangalusu nʉ kʉndwa weenyu ʉwɨ lyoli hwa Kilisiti.
4 Ɨyanga ɨshi,
pɨpo amwɨ muli bhangu humʼmwambɨɨlɨle ʉmuntu ʉyo ahwɨnza hubhalʉmbɨɨlɨle ʉYeesu ʉwɨnjɨ,
ʉyo atɨ saga tahanʼnʉmbɨlɨɨye.
Nantele,
muhwambɨɨlɨla ʉMʼpepo ʉwɨnjɨ awe ɨnongwa ɨzyɨnjɨ,
ɨzyo saga mwahambɨlɨɨye afume huliitɨ.
5 Anɨ saga huje ɨndi nʼdoodo ashile ɨbho bha bhahwilola “bhasontwa bhagoosi.”
6 Hwope nkashele ɨloleha saga ɨyanga shinza,
ʉmanyiihanyi waanɨ goosi.
Tilolesiizye ɨlyo huliimwɨ hu habhaazyo honti na hwi‑idala lyonti.
7 Wɨlɨ,
nahabhombile shibhiibhi lwɨ‑ɨhwiyisiizye hwi‑idala ɨlya‑anyampaanye ɨNongwa ɨNyinza ɨzya Ngʉlʉbhɨ huliimwɨ sinta mʼposheelo,
huje amwɨ musʉmbwe?
8 Hu habhaazyo ha nahabhombaga ɨmbombo huliimwɨ,
nahali ɨhwambɨɨlɨla ɨvintu ɨvyo mwahanavwizye afume hu vibhanza ɨvyɨnjɨ ɨvya bhooziwa.
Afumilane nɨ‑ɨlyo nahali nkati ɨfyʉla ɨvintu vyabho huje ɨmbaavwe amwɨ.
9 Hu habhaazyo lwɨ‑ɨndi peeka naamwɨ,
lwɨ‑ɨmbuliliilwe,
saga nahali lizigo hwa muntu wowonti,
pɨpo abhooziwa ɨbho bhahafumile hu Makedoniya bhahampiiye ɨvyo nahali ɨmbuliliilwe.
Mwɨ‑ɨlyo,
nahali maaso huje ɨnsahabhe lizigo huliimwɨ lwonti,
nantele ɨnza hwonjeelele abhe maaso.
10 Ɨyanga ɨnjiga,
ɨlyoli ya Kilisiti nanshi shɨ‑ɨli muuhati yaanɨ,
nʉʉmo ʉmuntu mu mukowa gwonti ʉgwɨ Akaaya ʉyo anza hunzijile anɨ ahwibaade hu nongwa ɨnɨ.
11 Lwɨ‑ɨyanga ɨshi saga huje saga ɨmbagɨɨne,
ʉNgʉlʉbhɨ amɨɨnye huje ɨmbagɨɨne.
12 Ɨnza‑ajendeelele abhombe nanshi ɨsho ɨbhomba ɨshi,
huje abhasontwa ɨbho,
ɨbho bhahwibhɨɨha huje bhagoosi,
bhasahayaaje ɨfwasi ɨya hwibaade huje abheene bhabhomba ɨmbombo nanshi atɨ.
13 Abhantu nanshi ɨbho bhasontwa bhi‑ilenga,
bhɨɨbho bhabhomvi bhagobezi,
bhahwibhɨɨha nanshi abhasontwa bha Kilisiti.
14 Mwɨ‑ɨlyo saga tiswiga,
pɨpo wope ʉSeetano yʉʉyo ahwibhɨɨha nanshi ʉnʼtumia ʉwɨ lukhozyo.
15 Nantele saga tiswiga huje,
bhope abhabhomba mbombo bhaakwe bhahwibhɨɨha nanshi abhabhomvi abhagolosu.
Hu malishilo waabho bhahayambɨɨlɨla ɨgo galɨngaana nɨ mbombo zyabho.
ɄPaulo ahwibaada hu nongwa yɨ mayɨmba gaakwe
16 Ɨhubhabhʉʉzya nantele,
ɨnjiga,
ʉmuntu agandi asɨɨbhe huje anɨ ɨndi nʼnema!
Leelo hwope nkashele muyiga ɨndi nʼnema,
ɨhubhalaabha muntejeelezye,
huje nanɨ ɨhwibaade hashe.
17 Amazwi ɨgo ɨyanga ɨshi aga hwibaade,
saga ɨndajiziiwe nʉ Mwɨnɨ,
lyoli ɨyanga nanshi ʉmuntu ʉnʼnema.
18 Abhinji bhahwibaada hu nongwa yɨ mbombo ya mu nsi,
nanɨ ɨnza hwibaade hu nongwa yɨ mbombo yaanɨ.
19 Amwɨ muhwilola muli nɨ njeele,
sha shɨɨsho mujimbiilila na hubhɨɨtɨshe hu luseshelo abhantu abhapezu.
20 Mujimbiilila na humʼmwɨtɨshe hwope ʉmuntu ʉyo ahubhabhɨɨha mu kalwe,
ahubhiibhila na‑afyʉle ɨvintu vyenyu,
nantele ahwibaada na hubhalije na hubhakhome hu maaso.
21 Ɨlola ɨnsoni ayanje huje ɨshi atɨ tahali bhalema aleshe abhombe ɨgo.
Ɨshi ɨyanga nanshi ʉnʼnema,
nkashele alɨɨho ʉmuntu ʉyo akhondɨɨye ahwibaade hu nongwa yɨ hantu hohonti,
nanɨ ɨhondɨɨye ahwibaade.
22 Wɨlɨ,
abheene Bhaebulaniya?
Nanɨ ɨndi Mwebulaniya.
Wɨlɨ,
abheene Bhaizilaeeli?
Nanɨ ɨndi Mwizilaeeli.
Wɨlɨ,
abheene bhɨ shikholo ɨsha Abulahaamu?
b Nanɨ ɨndi wɨ shikholo ɨsha Abulahaamu.
23 Ɨshi ɨnjanje nanshi huje ɨmbwaluushe.
Nkashele abheene bhahwibaada huje bhabhomvi bha Kilisiti,
anɨ ɨndi mʼmomvi wa Kilisiti ashile abheene.
Anɨ ɨmbajile abhombe ɨmbombo tee,
ɨnkʉngwɨlwe mu hoobhe hahinji,
nahali mu lʉgʉ ʉwa‑afwe hahinji,
nantele ɨhomwilwe tee.
24 Ɨhomwilwe na Bhayahuudi ɨndɨɨsa amashʉmi gataatu na fundihandwɨmo (39),
ɨmbombeliilwe ɨsho hasaanu.
25 Ɨhomwilwe nɨ ndɨɨsa hataatu na Bhaluumi,
ɨhomwilwe na mawe heeka,
ɨmeeli ɨnanjishiiye anɨ hataatu,
nantele nahakhɨɨye mu nsʉmbi nʉsiku na pasanya.
26 Hahinji lwɨ‑ɨshʉʉla,
nahali mu lʉgʉ ʉwa‑abhalɨɨle na mɨnzɨ masooho,
mu lʉgʉ ʉwa‑akhatwe na bhanyambuda,
mu lʉgʉ ʉwa‑akhomwe na Bhayahuudi abhamwetu na bhantu ɨbho saga Bhayahuudi.
Nahali mu lʉgʉ mu mabooma na mu magona,
mu lʉgʉ ʉwa mu nsʉmbi na mu lʉgʉ ʉwa‑ayɨmvwe nɨ‑ɨbho bhahwibhɨɨha bhooziwa bhamwetu.
27 Ɨmbombile ɨmbombo ɨhome na‑ayɨmbe,
hahinji ɨngonile maaso,
ɨnjɨmbɨle nɨ nzala nɨ nyoota,
hahinji ɨhwiyiimile alye na‑akhale mwi‑isasa sinta menda.
28 Peeka nɨ‑ɨgo gonti,
shila lisiku ɨsɨɨbha hu nongwa yɨ vibhanza vyonti ɨvya bhooziwa.
29 Nkashele ʉmo mwonywa,
nanɨ ɨhwiyʉmvwa mwonywa.
Nkashele ʉmo bhamʼmwalangɨɨnye huje abhombe ɨmbiibhi,
nanɨ ɨhwiyʉmvwa ʉzugumizu.
30 Nkashele ɨhwanziwa ahwibaade,
ɨhwibaada hu nongwa yɨ dedebhazu waanɨ.
31 ɄNgʉlʉbhɨ,
ʉDaada ʉwa Mwɨnɨ ʉYeesu,
ʉyo akhondɨɨye amwamihwe ɨnsiku zyonti,
amɨɨnye huje saga ɨyanga ilenga.
32 Hu habhaazyo lwɨ‑ɨndi mwi‑ibooma ɨlyɨ Damesiki,
ʉnʼnongozi ʉyo ahalongozyaga hu mukowa ʉgwo gwahali mu wumwɨnɨ wa mwɨnɨ ʉAleeta,
ahabhɨɨshɨle abhalɨndɨɨlɨli mu malyango agi‑ibooma ɨlyo huje bhahate.
33 Leelo abhantu bhamo bhahanisiizye mu shiseje ashilile pi‑idiliisha ɨlyo lyahali mu lubhaga lwi‑ibooma,
nahapululila akhatwe.