ɄPaulo ahubhaamula ɨbho bhahunʼsyonshela
10
Ɨshi,
anɨ nɨPaulo ɨloleha ɨndi nʼtonsu hu habhaazyo lwɨ‑ɨndi peeka naamwɨ,
leelo ɨloleha ɨndi nʼkhali hu habhaazyo lwɨ‑ɨndi hutali naamwɨ,
ɨhubhalaabha mu woloolo na mu tonsu ʉwa Kilisiti.
2 Ɨhubhalaabha huje,
lwɨ‑ɨnɨnzɨle huliimwɨ,
musahambɨɨshe huje ɨmbe nʼkhali.
Ɨnjanjile ɨsho,
pɨpo ɨmbajiiye abhe nʼkhali hwa bhantu bhonti ɨbho bhasɨɨbha huje atɨ tilondolezya aga mu nsi.
3 Poshe tikhala mu nsi ʉmu,
saga tilwa ʉlʉgʉ nanshi abhantu abha mu nsi.
4 Ɨvilwɨlo ɨvyo tilwɨla mu lʉgʉ ʉwo saga vya mu nsi ɨnɨ,
lyoli vili na maha afume hwa Ngʉlʉbhɨ,
vinangaanya amalinga gonti aga nʼnʉgʉ.
5 Tinangaanya amazwi gonti agi‑ilenga na ga hwibaade ɨgo gazijila abhantu humʼmanye ʉNgʉlʉbhɨ.
Nantele,
tikhata ɨnsɨɨbho zyonti huje zinʼtinishe ʉKilisiti.
6 Hu habhaazyo lwa mwahayibha munʼtiniishe lwonti,
atɨ tahayibha nzɨɨla hubhafunde abhantu ɨbho saga bhahunʼtiniha ʉKilisiti hu lyolyonti.
7 Amwɨ muhwenya ɨvyo viloleha pitagaalila lyenyu.
Ʉmuntu wowonti ʉyo ahwisimishizya huje ʉmwene wa Kilisiti,
amanye huje natɨ tili bhantu bha Kilisiti nanshi ʉmwene.
8 Saga ɨlola ɨnsoni ahwibaade hu nongwa yi‑ikhone ɨlyo ʉMwɨnɨ atipiiye,
pɨpo ikhone ɨlyo saga lihubhanangaanya,
lyoli lihubhaavwa mu lwɨtɨho.
9 Saga ɨhwanza ɨndoleshe huliimwɨ huje ɨhwanza hubhoogofye mu kalaata ɨzyo ɨhubhasimbila.
10 Ɨyanga ɨsho,
pɨpo abhanjɨ bhayiga,
“Ɨkalaata ɨzya Paulo zili na mazwi amakhali,
nantele zili na mazwi amakhome.
Leelo hu habhaazyo lwa‑ali peeka naatɨ abha saga ali ni‑ikhone,
nantele amazwi gaakwe saga gali na hantu.”
11 Ʉmuntu ʉyo ayanga ɨsho amanye huje,
ɨgo tihubhasimbila hu habhaazyo lwa tili hutali,
ga gɨɨgo tahayibhomba hu habhaazyo lwa tili naamwɨ.
12 Saga tihwibhɨɨha lwonti mu mpʉga ɨmo hwope ahwilɨngaanisye na bhantu ɨbho bhahwibaada bhɨɨbho.
Abhantu ɨbho bhahwibaada na hwilɨngaanisye bhɨɨbho,
saga bhamɨɨnye nahamo.
13 Leelo atɨ saga tihwibaada tee ashile ɨshipimilo ɨshɨ mbombo ɨyo atipiiye ʉNgʉlʉbhɨ.
Ɨmbombo ɨyo ya yɨɨyo tibhomba hwope huliimwɨ.
14 Saga tihwibaada ashile ɨshipimilo ɨshɨ mbombo yeetu lwa tiyanga hwi‑ikhone huliimwɨ,
nantele atɨ tahali bha hwande hubhaleetele ɨNongwa ɨNyinza ɨzya Kilisiti.
15 Nantele saga tihwibaada hu nongwa yɨ mbombo ɨya bhantu abhanjɨ.
Lyoli tisʉʉbhɨla huje ʉlwɨtɨho lwenyu sha luhwonjeelela akule,
ɨpo ɨmbombo yeetu paahati yeenyu yahayibha ɨhwonjeelela.
16 Ɨpo tahayilʉmbɨɨlɨla ɨNongwa ɨNyinza mu nsi ɨzyɨnjɨ ʉhwo ɨnongwa ɨyo saga ɨlʉmbɨlɨɨlwe,
pɨpo saga tihwanza ahwibaade hu nongwa yɨ mbombo ɨyo ɨbhombwilwe mu nsi nʉ muntu ʉwɨnjɨ.
17 Nanshi ɨsho ɨsimbwilwe mu Nsimbo ɨMfinjile,
“Ʉmuntu wowonti ʉyo ahwibaada,
ahwibaade hu nongwa ya Mwɨnɨ ʉNgʉlʉbhɨ.”a
18 Ʉmuntu wowonti ʉyo ahwibaada yʉʉyo,
saga ahwɨtɨshɨlwa nʉ Mwɨnɨ ʉNgʉlʉbhɨ,
lyoli ʉyo abaadwa nʉ Mwɨnɨ ʉNgʉlʉbhɨ ya yʉʉyo ahwɨtɨshɨlwa.